ބިގްބޮސްއިން މަޝްހޫރުކަން ހޯދި ސިދާތް މަރުވެއްޖެއެވެ.

ބިގްބޮސް ސީޒަން 13އިން ބޮޑު ސަމާލުކަމެއް ހޯދި ސިދާތު މަރުވީ ހާރޓްއެޓޭކެއް ޖެހިގެން ކަމަށް ރިޕޯޓުކޮށްފައިވެއެވެ. އާއިލާގެ ގާތް ބަޔަކާ ހަވާލާދީ، އިންޑިއާގެ ނޫސްތަކުގައި ރިޕޯޓު ކޮށްފައިވަނީ، ބުދަ ދުވަހުގެރޭ ބަލިވެ އުޅުމަށްފަހު ބޭސް ކައިގެން ކޮޓަރިއަށް ނިދަން ދިޔަކަމަށެވެ. ހެނދުނު ބެލިއިރު ޚަބަރުހުސްވެފައިވާތީ ކޫޕަރ ހޮސްޕިޓަލަށް ގެންދިޔައިރު ވެސް މަރުވެފައިވާ ކަމަށް ރިޕޯޓުކޮށްފައިވެއެވެ.

މަރުގެ ހަގީގަތް ހޯދުމަށް ޕޯސްޓްމޯޓަމް ހަދަން ފަށާފައިވާ ކަމަށް ހޮސްޕިޓަލުގެ އޮފިޝަލަކާ ހަވާލާދީ އިންޑިއާގެ ނޫސްތަކުން ރިޕޯޓުކޮށްފައިވެއެވެ.

ސިދާތްގެ މަރުގެ ޚަބަރާއެކު، ބިގްބޮސް ސީޒަން 13ގައި ސިދާތްއާ އެންމެ ގާތް ގުޅުމެއް އުފެދިގެން ދިޔަ ޝެހެނާޒް ގިލްވަނީ ޝޫޓިންގ މެދުކަނޑާލުމަށްފަހު ހޮސްޕިޓަލަށް ގޮސްފައެވެ. "ސިދްނާޒް" ގެ ނަމުން މި ޖޯޑަކީ އިންޑިއާގައި މަޝްހޫރު ޖޯޑެކެވެ. މި ދެތަރިންގެ ގުޅުމާމެދު ވަކި އެއްޗެއް ދެތަރިން ބުނެފައި ނުވިޔަސް އެކި ޝޯތަކުގައި ދެ ތަރިން ވެސް ބުނެފައިވަނީ، އެ ދެމީހުންގެ މެދުގައި އޮތީ ވަރަށް ސާފު ގުޅުމެއް ކަމަށެވެ.

އުމުރުން 40 އަހަރުގައި ސިދާތް މި ދުނިޔެއާ ވަކިވެގެން ދިޔައިރު ސިދާތް އަކީ ހަށިގަނޑުން ވަރަށް ފިޓް އަދި ސިއްހަތު ރަނގަޅު މީހެކެވެ. ސިދާތް މަރުގެ ޚަބަރާއެކު ފޭނުންނަށް ބޮޑު ސިހުމެއް ލިބިގެން ދިޔަކަމަށް ރިޕޯޓްތަކުން ބުނެއެވެ.

ޓީވީ ސީރިއަލްތަކުން އެކްޓިން ކެރިއަރ ފެށި ސިދާތް ބޮލީވުޑްގެ ފިލްމަކުން ފެނިގެން ގޮސްފައިވަނީ 2014 ވަނަ އަހަރުއެވެ. ބިގް ބޮސްގެ ކާމިޔާބީއާއެކު ބޮލީވުޑުން ގިނަ ފުރުސަތުތަކެއް އޭނާއަށް ފަހިވެގެންދިޔައެވެ.