އިސްރާއީލްގައި އުމުރުން 12 އަހަރުން މަތީގެ ކުދިންނަށް ކޮވިޑް ބޫސްޓަރ ވެކްސިން ދޭން ފަށައިފިއެވެ.
އިސްރާއީލްގައި 18 އަހަރުން މަތީގެ މީހުންނަށް ބޫސްޓަރ ވެކްސިން ދިނުމަށް ފަށާފައިވަނީ މަހެއްހާ ދުވަސް ކުރިންނެވެ. މިއާއެކު ޑެލްޓާ ވޭރިއަންޓް ފެތުރުން ދަށަށް ދިޔަކަމަށް ބޮޑުވަޒީރު ނަފްތާލީ ބެނެޓް ވަނީ ވިދާޅުވެފައެވެ.
ސިއްހީ ޚިދުމަތްތެރިންނާ ހަވާލާދީ އަލްޖަޒީރާގައި ރިޕޯޓުކޮށްފައިވާ ގޮތުން ފައިޒަރ ވެކްސިންގެ ދެ ޑޯޒް ފުރިހަމަ ކުރުމަށްފަހުވެސް ބޫސްޓަރ ޝޮޓެއް ޖެހުމުން ރައްކާތެރިކަން އިތުރުވެއެވެ. ދެ ޑޯޒުން ލިބޭ ރައްކާތެރިކަމަށްވުރެ ތިންވަނަ ޑޯޒަކުން ލިބޭ ރައްކާތެރިކަން ދިހަގުނަ އިތުރުކަމަށް ވަނީ ބުނެފައެވެ. ތިންވަނަ ޑޯޒެއް ޖަހަނީ ދެވަނަ ޑޯޒް ޖެހިތާ 5 މަސް ވެފައިވާ މީހުންނަށެވެ. މިއީ އެމެރިކާގައި ތިންވަނަ ޑޯޒެއް ދިނުމަށް ކަނޑައަޅާފައިވާ 8 މަހަށްވުރެ ކުރު މުއްދަތެކެވެ.
އިސްރާއީލްގައި ދެ މިލިއަނެއްހާ މީހުން މިހާރުވަނީ ތިންވަނަ ޑޯޒް ޖަހާފައެވެ.
"މިހާރުވެސް ނަތީޖާ ފެނޭ. ބަލީގައި ބޮޑުވަރުވާ މީހުން މަދުވާން ފަށައިފި. ހުރިހާ އެންމެންނަށް ތިންވަނަ ޑޯޒް ދިނުމަށް މި މަސައްކަތްކުރަނީ." ނަފްތާލީ ބެނެޓް އާއްމުކުރި ސްޓޭޓްމެންޓްގައި ބުނެފައިވެއެެވެ.
