ޗައިނާގެ ސަރުކާރުން ރާއްޖެއަށް ކަނޑައަޅުއްވާފައި ހުންނަވާ ސަފީރު ޒަންގް ލިޒޯންގ ގެ ދައުރު ހަމަވުމާއެކު، އެ މަގާމަށް އައު ބޭފުޅަކު އައްޔަން ކޮށްފިއެވެ.

މި މަގާމަށް އައްޔަން ކޮށްފައިވަނީ ވަންގ ލީޒިން އެވެ.

މަގާމަށް އައްޔަން ކުރުމާއި ގުޅިގެން ވަންގ ކުރެއްވި ޓްވީޓެއްގައި ވިދާޅުވީ، އެކަމާ އުފާ ކުރައްވާ ކަމަށާއި، ހޮނިހިރު ދުވަހުގެރޭގެ ވަގުތެއްގައި އެކަމަނާ ރާއްޖެއަށް ވަޑައިގެންފައިވާ ކަމަށެވެ. ވަންގ ވަނީ ރާއްޖޭގެ ރީތިކަން ފާހަގަ ކުރައްވައި، އެޑިޝަނަލް ސެކެޓަރީ ޖާވިދު ފައިސަލްއާއި، ފޮރިން މިނިސްޓްރީގެ ޑެޕިއުޓީ ޗީފް ޕްރޮޓޮކޯލް އަހުމަދު މުޖުތަބާގެ ފަރާތުން ލިބިވަޑައިގެންނެވި ހޫނު މަރުހަބާ ފާހަގަ ކުރައްވައި އެކަމަށް ޝުކުރު އަދާ ކުރައްވާފައެވެ.

ވަންގ ވަނީ ރާއްޖެއާއި ޗައިނާގެ ގުޅުން އިތުރަށް ވަރުގަދަ ކުރުމަށް ދެ ގައުމު ގުޅިގެން މަސައްކަތް ކުރެއްވުމަށް އުއްމީދު ކުރައްވާކަމަށް ވިދާޅުވެފައެވެ.

ޗައިނާގެ ސަރުކާރުން ރާއްޖެއަށް ކަނޑައަޅުއްވާފައި ހުންނަވާ ސަފީރު ޒަންގް ލިޒޯންގ ގެ ދައުރު ހަމަވެފައިވާއިރު، ސަފީރު ޖަންގް ލިޖޮންގްއަކީ ދިވެހިރާއްޖޭގައި ޗައިނާގެ އެމްބަސީއެއް 2011 ގައި ހުޅުވިފަހުން ޗައިނާއިން ދިވެހިރާއްޖެއަށް ކަނޑައެޅުއްވި 3 ވަނަ ސަފީރެވެ. އެމަނިކުފާނު ސަފީރުކަމާއި ހަވާލުވީ އޮގަސްޓް 2017 ގައެވެ.

ދައުރު ހަމަ ކުރައްވައި ފުރާވަޑައިގަތުމުގެ ކުރިން ރައީސުލްޖުމްހޫރިއްޔާ އާއި ފޮރިން މިނިސްޓަރުގެ އަރިހަށް ވަދާއީ ޒިޔާރަތްކުރެއްވިއެވެ. ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ އަރިހަށް ކުރެއްވި ޒިޔާރަތުގައި، ޗައިނާގެ ސަފީރު ވަނީ ދިވެހިރާއްޖެއާއި، ޗައިނާއާ ދެމެދު އޮތް ރަހުމަތްތެރިކަމުގެ ގުޅުމުގެ މައްޗަށް އަލިއަޅުވާލައްވައި ވާހަކަފުޅު ދައްކަވާފައެވެ. އަދި ޗައިނާގެ އެހީތެރިކަމާއެކު ރާއްޖޭގައި ހިންގާފައިވާ އަދި، ހިންގަމުންދާ މަޝްރޫއުތަކާ ގުޅޭގޮތުންވެސް ދެ ބޭފުޅުން ވާހަކަފުޅު ދެއްކެވިއެވެ.