ލިފްޓުގައި ދިމާވި ޓެކްނިކަލް މައްސަލައަކާ ގުޅިގެން ހިޔާ ފްލެޓްގެ ދެޓަވަރަކަށް ކަރަންޓު ދިނުން ހުއްޓިއްޖެއެވެ.

ލިފްޓުގެ މައްސަލަ ދިމާވީ ޓަވަރު 3 އަދި 4 ގައެވެ.

ސްޓެލްކޯއިން ބުނީ، ހުކުރު ދުވަހު ކަރަންޓު ދިނުމަށް ނިންމާފައިވާ ހިޔާފްލެޓްތަކުގެ 3 އަދި 4 ވަނަ ޓަވަރުގެ ލިފްޓްތަކަކަށް ދިމާވި ޓެކްނިކަލް މައްސަލައަކާ ގުޅިގެން ކަރަންޓު ދިނުމުގެ މަސައްކަތްތައް އެޗްޑީސީއާއެކު މަޝްވަރާ ކުރުމަށްފަހު މެދުކަނޑާލާފައިވާ ކަމަށެވެ.

ސްޓެލްކޯއިން ބުނެފައިވަނީ އެޗްޑީސީން މިހާރު ގެންދަނީ އެ މައްސަލަ ހައްލުކުރުމުގެ މަސައްކަތް ކުރަމުން ކަަމަށާއި، މި 2 ޓަވަަރަށް ކަރަންޓު ދިނުމުގެ މަސައްކަތް ދެން ކުރިޔަށް ގެންދާނެ ދުވަހެއް އެ ޓަވަރުތަކުން ފްލެޓް ލިބިފައިވާ ފަރާތްތަކަށް އެސް.އެމް.އެސް އަދި ސޯޝަލް މީޑިއާ މެދުވެރިކޮށް އަންގާނެ ކަމަށެވެ.

ހިޔާ ފްލެޓްތަކަށް ދާއިމީ ކަރަންޓު ފޯރުކޮށްދޭން ފަށާފައިވަނީ މި މަހުގެ 17 ވަނަ ދުވަހުއެވެ.

ހިޔާ ފްލެޓަށް ބަދަލުވުމުގެ މަސައްކަތް ބައެއް ފަރާތްތަކުން މިހާރު ވަނީ ފަށާފައެވެ. ހުޅުމާލޭ ދެވަނަ ފިޔަވަހީގައި ހިޔާ މަޝްރޫޢުގެ ދަށުން ތަރައްޤީކޮށްފައިވާ 25 ބުރީގެ 16 ޓަވަރަށް ކަރަންޓް ގުޅައިދިނުމުގެ މަސައްކަތް ކޮށްފައިވަނީ ޗައިނާ މެޝިނަރީ އިންޖިނިއަރިންގ ކޯޕަރޭޝަނުންނެވެ. ކަރަންޓް ދިނުމަށް ބޭނުންވާ ކޭބަލްތައް އެޅުމާއި، ކަރަންޓް މީޓަރުތައް ހަރުކުރުމުގެ މަސައްކަތް މިހާރު ވަނީ ނިމިފައެވެ. ހިޔާގެ 16 ޓަވަރަށާއި އަދި އިތުރު ބޭނުންތަކަށް ބެހެއްޓި 1 ޓްރާންސްފޯމަރަކާއެކު ޖުމްލަ 17 ޓްރާންސްފޯމަރު ހިޔާ ފްލެޓުތަކަށް ކަރަންޓު ދިނުމަށް ވަނީ ބަހައްޓާފައެވެ. މި ޓްރާންސްފޯމަރުތަކަށް ކަރަންޓުދީ، ފްލެޓްތަކަށް ކަރަންޓު ގުޅައިދިނުމުގެ މަސައްކަތް ކުރަމުންދަނީ ސްޓެލްކޯގެ ވެސް ބައިވެރިވުމާއެކުއެވެ.