މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ އެތެރޭގައި ހަރުކަށި ފިކުރު އޮތްކަމަށް ގަބޫލު ނުކުރައްވާކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
ސަރުކާރު ހިންގާ މައި ޕާޓީ އެމްޑީޕީގެ އެތެރޭގައި ހަރުކަށި ފިކުރު އޮތް ކަމަށާއި، ރައީސް ސާލިހާއެކު ސިޔާސީ މަސައްކަތް ނުކުރެވޭނެ ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ދާދި ފަހުން ވިދާޅުވެފައިވާއިރު، އެ ވާހަކަތަކާއި ގުޅިގެން ރާއްޖޭގެ ސިޔާސީ މަސްރަހު ވަނީ ވަރަށް ބޮޑަށް ހަލަބޮލިވެފައެވެ. އަދި ސިޔާސީ އެކި ފަރާތްތަކުން ގެންދަނީ އެކަމާމެދު ޝުއޫރު ފާޅު ކުރަމުންނެވެ.
އެކަމާ ގުޅޭގޮތުން ބުދަ ދުވަހު އޮތް ނޫސްވެރިންގެ ބައްދަލުވުމުގައި ރާއްޖެއެމްވީން ސުވާލުކުރުމުން ރައީސް ވިދާޅުވީ، އެމްޑީޕީގެ އެތެރޭގައި ހަރުކަށި ފިކުރު އޮތްކަމަށް އެމަނިކުފާނު ގަބޫލުފުޅު ނުކުރައްވާ ކަމަށެވެ. ނަމަވެސް ހަރުކަށި ފިކުރަކީ މުޅި ރާއްޖެއަށް ކުރިމަތިވެފައިވާ މައްސަލައަކަށްވާއިރު، ހުރިހާ ދިމާއެއްގައިވެސް މި ފިކުރު އުޅުމަކީ އެކަށީގެންވާކަމެއްކަން ރައީސް ފާހަގަ ކުރެއްވިއެވެ. އެމްޑީޕީގައިވެސް އެ ވިސްނުމުގެ މަދު ބަޔަކު ތިބެދާނެކަން ރައީސް ފާހަގަ ކުރެއްވިއެވެ.
ރައީސް ވިދާޅުވީ، އެމްޑީޕީގެ އެތެރޭގައި ހަރުކަށި ފިކުރު މޫލައި، އެމްޑީޕީގެ ސިޔާސަތުތަކާއި ވިސްނުންތައް އެ ދިމާއަށް އެނބުރިގެންދާ މިންވަރަށް ޕާޓީގައި އެ ފިކުރު އޮތްކަމަށް ގަބޫލުފުޅު ނުކުރައްވާ ކަމަށެވެ. އަދި އޮތްނަމަ، އެކަން އެމަނިކުފާނު ހުއްޓުވާނެ ކަމަށްވެސް ރައީސް ސާލިހު ވިދާޅުވިއެވެ.
ހަރުކަށި ފިކުރާ ދެކޮޅަށް ސަރުކާރުން މަސައްކަތް ކުރާ ކަމަށް ގިނަ ސިޔާސީ ފަރާތްތަކުން ބުނާއިރު، ކ. މާފުށީ ޖަލުގައި ތިބި ގައިދީންގެ ތެރެއިން ހަރުކަށި ފިކުުރުގެ ގައިދީން ދެނެގަތުމުގެ މަސައްކަތް ދާދި ފަހުން މޯލްޑިވްސް ކަރެކްޝަނަލް ސަރވިސްއިންވެސް ވަނީ ފަށާފައެވެ. އަދި އެފަދަ ގައިދީން ހޯދައި، އޮގަސްޓު މަހުގެ ތެރޭގައި ގައިދީން އެއް ޔުނިޓަކަށް ބަދަލު ކުރުމުގެ މަސައްކަތް ފަށާނެ ކަމަށާއި، އެ ޔުނިޓް ވެގެންދާނީ އެފަދަ ގައިދީންނަށް އަމާޒުކޮށް ތަފާތު ޕްރޮގްރާމްތައް ހިންގާ، ރިހެބިލިޓޭޓް ކުރުމުގެ ޕްރޮގްރާމްތައް ވެސް ހިންގާނެ ޔުނިޓެއްކަމަށް ކަރެކްޝަނުން ބުނެއެވެ.
މީގެ އިތުރުންވެސް ހަރުކަށި ފިކުރާ ދެކޮޅަށް މި ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ.
