ކޮވިޑް-19 ކޮންޓްރޯލްކުރުމަށް އަޅާފައިވާ ފިޔަވަޅުތަކަށް ބޮޑެތި ލުއިތަކެއް ދިން ނަމަވެސް މިހާރު އެކުލަވާލާފައިވާ ގައިޑްލައިންތަކާއި އެއްގޮތަށް އަމަލުކުރާނަމަ ކޭސްތައް އިތުރުވެގެންނުދާނެ ކަމަށް ހެލްތު އިމަޖެންސީ އޮޕަރޭޝަން ސެންޓަރުން (އެޗްއީއޯސީ) ބުނެފިއެވެ.
ރާއްޖޭގެ ކޮވިޑް-19ގެ ހާލަތާއި ބެހޭ ގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި އެޗްއީއޯސީގެ ތަރުޖަމާނު ޑރ. ނަޒްލާ ރަފީގު ވިދާޅުވީ ކޮވިޑް-19ގެ ހާލަތު ރަނގަޅުވަމުންދާ މިންވަރަށް ބަލާ ލުއިތައް ދެމުންދާ ކަމަށެވެ. ނަމަވެސް ބަލިން ރައްކާތެރިވުމަށް ކޮންމެހެން ކުރަންޖެހޭ ކަންކަން ކުރަން ޖެހޭނެ ކަމަށް ޑރ.ނަޒްލާ ވިދާޅުވިއެވެ. އެގޮތުން އިޖްތިމާއީ ގައިދުރުކަމާއި، މާސްކް އެޅުންފަދަ ކަންކަންކަމަށް ސަމާލުވުމަށް އިލްތިމާސްކުރައްވާފައިވެއެވެ. ޑރ.ނަޒްލާ ވިދާޅުވީ މިކަންކަން މޮނިޓަރ ކުރަމުންދާނެ ކަމަށާއި، ތަންފީޒީ އިދާރާތަކާއެކު ވެސް މަޝްވަރާކޮށްފައިވާ ކަމަށެވެ. އަދި އިންސްޕެކްޝަންގެ މަސައްކަތްތައް ކުރިއަށްދާނެ ކަމަށް ޑރ.ނަޒްލާ ވިދާޅުވިއެވެ.
ޑރ.ނަޒްލާ ވިދާޅުވީ މިހާރު އެކުލަވާލާފައިވާ ގައިޑްލައިންތަކާއި އެއްގޮތަށް އަމަލުކުރުމަކީ ވަރަށް މުހިންމު ކަމެއް ކަމަށެވެ. އެގޮތުން ޚިދުމަތްދޭ މީހުންނާއި ޚިދުމަތް ހޯދާ މީހުން ވެސް މިފިޔަވަޅުތައް ތަންފީޒު ކުރަން ޖެހޭ ކަމަށް ޑރ.ނަޒްލާ ވިދާޅުވިއެވެ.
ފިހާރަތަކާއި ރެސްޓޯރެންޓުތަކާއި ތަންތަނުން ފިޔަވަޅުތަކާ އެއްގޮތަށް އަމަލުކުރާ މިންވަރު ދެނެގަތުމަށްޓަކައި އިންސްޕެކްޝަންތައް ކުރިއަށް ގެންދާނެ. ގައިޑްލައިނާ އެއްގޮތަށް އަމަލުކުރޭތޯ ނޫނީ މީހުން މަގުމަތީގައި މާސްކް އަޅައިގެން އުޅޭތޯ ބެލުމަށް ޕޮލިސް ބޭފުޅުން ވެސް މަސައްކަތް ކުރެއްވި ކަމުގައި ވިޔަސް އަދި ތަންތަނުން ޚިދުމަތް ދެއްވާ ފަރާތްތައް މިސާލަކަށް ފިހާރަތަކާއި ރެސްޓޯރެންޓްތައް ހިންގަވާ ފަރާތްތަކުން އެތަންތަނުގައި ތިން މީހުން ވަންނަން އޮންނަ ތަނެއް ވެއްޖެއްޔާ ތިން މީހުންނަށްވުރެ ގިނައިން ވަންނަންޏާ އެކަން ހުއްޓުވުން. އެއީ އެބޭފުޅުންގެ ކަމެއް އިނގޭތޯ. ހުރިހާ ގަޑިއެއްގައި ވެސް ޚިދުމަތް ހޯއްދަވަން ވަޑައިގަންނަވާ ބޭފުޅުން އެގޮތަށް ބެއްލެވުމަކީ މުހިންމު ކަމެއް.އެޗްއީއޯސީގެ ތަރުޖަމާނު ޑރ. ނަޒްލާ ރަފީގު
ކޮވިޑް-19ގެ ތިންވަނަ ރާޅާއެކު ގިނަ ތަކުލީފުތަކެއް ހުރިހާ ރައްޔިތުންނަށް އުފުލަން ޖެހުނުކަން ފާހަގަކުރައްވައި ޑރ.ނަޒްލާ ވިދާޅުވީ އެހާލަތަށް ނުދިއުމަށް އެންމެން އެކުގައި މަސައްކަތް ކުރަންޖެހޭ ކަމަށެވެ. މިހާރު ހަދާފައިވާ ގައިޑްލައިންތަކާ އެއްގޮތަށް ގިނަ މީހުން އަމަލުކޮށްފިނަމަ ކޭސްތައް އިތުރު ވެގެންނުދާނެ ކަމަށާއި، ވަކި ވަރެއްގައި ހިފެހެއްޓިފައި ހުންނާނެ ކަމަށް ޑރ.ނަޒްލާ ވިދާޅުވިއެވެ.
ނަމަވެސް ގައިޑްލައިންތަކާ އެއްގޮތަށް އަމަލުނުކޮށް ކަންކަން ދޫކޮށްލައިފިނަމަ ކޭސްތައް ކުއްލިއަކަށް އިތުރުވެގެންދާނެ ކަމަށް ޑރ. ނަޒްލާ ވިދާޅުވިއެވެ. އަދި ވިދާޅުވީ މީގެ ކުރިން ކަންކަން ހިނގާފައިވަނީ އެގޮތަށް ކަމަށާއި، ކޭސްތައް ކޮންޓްރޯލް ކުރުމަށް އަޅާ ފިޔަވަޅުތަކުން ގެއްލުން ލިބިގެންދަނީ ރައްޔިތުންނަށް ކަމަށެވެ.
