މައްކާގައި ހައްޖުވެރިންގެ ސެކިއުރިޓީ ބަލަހައްޓާ ޓީމުގައި ފުރަތަމަ ފަހަރަށް އަންހެނަކު ހިމެނިއްޖެއެވެ.
މޯނާ ނަމަކަށް ކިޔާ މި އަންހެން މީހާ އަސްކަރިއްޔާއާ ގުޅުނީ، ނިޔާވެފައިވާ އޭނާގެ ބައްޕަގެ ފަރާތުން ހިތްވަރުލިބިގެންނެވެ. މިއާއެކު މޯނާ ހިމެނިފައި މިވަނީ މައްކާގައި ހައްޖުވެރިންގެ ސެކިއުރިޓީ ބަލަހައްޓަން އެކުލަވާލި ފުރަތަމަ އަންހެން ސިފައިންގެ ތެރޭގައެވެ.
އެޕްރީލް މަހުން ފެށިގެން، އަސްކަރިއްޔާގައި މަސައްކަތްކުރާ އަންހެން ސިފައިން އަންނަނީ ގެފުޅުގެ ސެކިއުރިޓީ ބަލަހައްޓަމުންނެވެ.
"އަހަރެން މި މަސައްކަތްކުރަނީ ބައްޕަ އަސްކަރިއްޔާގައި ކުރި ދަތުރު ފުރިހަމަ ކުރުމަށް. ގެފުޅުގެ ސެކިއުރިޓީ ބަލަހައްޓަން ލިބުމަކީ ލިބޭ ވަރަށް ބޮޑު ޝަރަފެއް." މޯނާ ބުންޏެވެ.
މި ބަދަލަކީ ސަޢޫދީގައި އިޖްތިމާޢީ އަދި އިޤްތިޞާދީގޮތުން ޒަމާނީ ބަދަލުތަކެއް ގެނައުމަށް ފަށާފައިވާ މަސައްކަތުގެ ތެރެއިން ފަށާފައިވާ ކަމެކެވެ. ސައުދީ ވަލީއަޙުދު މުޙައްމަދު ބިން ސަލްމާން 2030އަށް ކަނޑައަޅާފައިވާ ސިޔާސަތުގެ ދަށުން ވަނީ އަންހެނުންނަށް އެއްގަމު އުޅަނދު ލައިސަންސް ނެގުމުގެ ހުއްދަވެސް ދީފައެވެ.
