ލިވަޕޫލުގެ ކެޕްޓަން ޖޯޑަން ހެންޑަސަންގެ އެއްބަސްވުން އާކުރުމުގައި ދެބަސްވުންތަކެއް ހުރުމުން މި ފަހަރުގެ ޓްރާންސްފާ ބާޒާރުގައި ހެންޑަސަން އެ ޓީމު ދޫކޮށްލުމުގެ ފުރުސަތު އެބައޮތް ކަމަށް ރިޕޯޓުތައް ބުނެފިއެވެ.
އުމުރުން 31 އަހަރުގެ ހެންޑަސަން މި ވަގުތު ލިވަޕޫލުގެ އެއްބަސްވުމުގައި ހުރީ 2024 ވަނަ އަހަރުގެ ޖޫން މަހުގެ ނިޔަލަށެވެ. މި އެއްބަސްވުމުގެ ދަށުން ހެންޑަސަންއަށް ހަފުތާއަކު 140،000 ޕައުންޑުގެ މުސާރައެއް ލިބެއެވެ. އެކަމަކު މިދިޔަ ސީޒަނުގައި ލިވަޕޫލުން ވަނީ ހެންޑަސަންގެ އެއްބަސްވުން އާކުރުމުގެ މަސައްކަތް ފަށާފައެވެ.
ރިޕޯޓުތައް ބުނާ ގޮތުން ހެންޑަސަން އެއްބަސްވުން އާކުރަން ބޭނުންވަނީ އިތުރު ހަތަރު އަހަރަށް، ހަފުތާއަކު 180،000 ޕައުންޑުގެ މުސާރައެއް ލިބޭ ގޮތަށެވެ. އެކަމަކު ދިގު މުއްދަތަކަށް އެއްބަސްވުން އާކުރަން ލިވަޕޫލުން ބޭނުންނުވާ ކަމަށް ރިޕޯޓުތައް ބުނެއެވެ. އެހެންކަމުން މި ފަހަރުގެ ޓްރާންސްފާ ބާޒާރު ނިމުމުގެ ކުރިން ހެންޑަސަން ލިވަޕޫލް ދޫކޮށްލުމުގެ ފުރުސަތު އެބައޮތް ކަމަށްވެސް އިނގިރޭސި މީޑިއާތަކުން ވަނީ ރިޕޯޓުކޮށްފައެވެ.
ހެންޑަސަންގެ އެއްބަސްވުން އާކުރުމުގައި ދެބަސްވުންތަކެއް ހުރި ކަމަށް ރިޕޯޓުތައް ބުނިއިރު، ހިލޭ ޓްރާންސްފާއެއްގެ ދަށުން ނެދަލެންޑްސްގެ މިޑްފީލްޑަރު ޖިއޮޖީނިއޯ ވައިނަލްޑަމް ޕީއެސްޖީއަށް ބަދަލުވީވެސް އެއްބަސްވުން އެއްބަސްވުން އާކުރުމުގައި ދެބަސްވުންތަކެއް ހުރުމުން ކަމަށް ރިޕޯޓުތައް ބުނެއެވެ. އެގޮތުން ލިވަޕޫލުގައި ވައިނަލްޑަމް ބަހައްޓަން އެ ޓީމުގެ ކޯޗު ޔާގެން ކްލޮޕް ބޭނުންވި ނަމަވެސް، ވައިނަލްޑަމް ބޭނުންވި ގޮތަށް އެއްބަސްވުން އާކުރަން ލިވަޕޫލުގެ މެނޭޖުމަންޓުން ބޭނުންނުވި ކަމަށްވެސް ވަނީ ރިޕޯޓުކޮށްފައެވެ.
ހެންޑަސަން ލިވަޕޫލް ދޫކޮށްލުމުގެ ފުރުސަތު އޮތް ކަމަށް ރިޕޯޓުތައް ބުނިއިރު، އޭނާއަކީ މި ފަހުން ލިވަޕޫލުން ހޯދި ބޮޑެތި ކާމިޔާބީތަކުގެ މޭސްތިރިއެވެ. އެގޮތުން ސްޓީވެން ޖެރާޑަށްފަހު ލިވަޕޫލުގެ ކެޕްޓަންގެ މަގާމު ހެންޑަސަން އަދާކުރަމުން އަންނައިރު، އޭނާގެ ކެޕްޓަންކަމުގައި ލިވަޕޫލުން ވަނީ 30 އަހަރަށްފަހު އިނގިރޭސި ޕްރިމިއާ ލީގާއި، ޔުއެފާ ޗެމްޕިއަންސް ލީގާއި، ޔުއެފާ ސުޕަ ކަޕުގެ އިތުރުން ފީފާ ކުލަބު ވޯލްޑް ކަޕުވެސް ކާމިޔާބުކޮށްފައެވެ. އަދި ހެންޑަސަން ވަނީ މިހާތަނަށް ލިވަޕޫލަށް ކުޅެދިން 392 މެޗުގައި 30 ލަނޑު ޖަހާފައެވެ.
