އައްޑޫ ސިޓީން މިހާތަނަށް 500 މީހުން ޕޮޒިޓިވްވެ، 445 މީހުން ބަލިން ރަނގަޅުވެއްޖެއެވެ.

އައްޑޫ އެމަރޖެންސީ އޮޕަރޭޝަންސް ސެންޓަރުން ބުނީ ބުދަ ދުވަހު އިރުއޮއްސި 6:00ން ބުރާސްފަތި ދުވަހުގެ އިރުއޮއްސި 6:00ށް 162 ސާމްޕަލެއް ނަގާފައިވާ ކަމަށާއި އޭގެތެރެއިން އެކަކު ޕޮޒިޓިވްވެފައިވާ ކަމަށެވެ.

ތަފާސްހިސާބުތައް ދައްކާގޮތުން އައްޑޫ ސިޓީން މިހާތަނަށް 500 މީހުން ޕޮޒިޓިވްވެ، 445 މީހުން ބަލިން ވަނީ ރަނގަޅުވެފައިވާއިރު މިހާރު އެކްޓިވް ކޭސްގެ ގޮތުގައި ހިމެނެނީ 53 ކޭސްއެވެ. އަދި އެޑްމިޓްކޮށްގެން ތިން މީހަކަށް ފަރުވާ ދެމުންދާއިރު، މިބަލީގައި މިހާތަނަށް 2 މީހަކު ވަނީ ނިޔާވެފައެވެ. އެކްޓިވް ކޭސްގެ ގޮތުގައި ހިތަދޫއިން 47 މީހުން، އަދި މަރަދޫއިން 6 މީހުން ޕޮޒިޓިވް ކަމަށް ތަފާސްހިސާބުތަކުން ދައްކައެވެ.

އައްޑޫ އެމަރޖެންސީ އޮޕަރޭޝަންސް ސެންޓަރުން ބުނީ ސާމްޕަލް ނެގުމުގެ މަސައްކަތްތަކަށް ޚާއްސަ ސަމާލުކަމެއްދީގެން ކުރަމުން ގެންދާ ކަމަށެވެ. އެގޮތުން މިހާތަނަށް 11402 ސާމްޕަލެއް ނަގާފައިވާ ކަމަށާއި، މި މަސައްކަތުގައި އާއްމު ރައްޔިތުންގެ ފަރާތުން ވަރަށް ބޮޑު އެއްބާރުލުމެއް ލިބޭ ކަމަށެވެ. އަދި ބަލީގެ އަލާމާތެއް ފެނިއްޖެނަމަ ލަސްނުކޮށް ޓެސްޓުކުރުމަށް އިލްތިމާސްކޮށްފައިވެއެވެ.

އައްޑޫ ސިޓީން ކޮވިޑް-19ގެ ހާލަތު ރަނގަޅުވަމުންދާތީ މިހާރު އަޅާފައިވާ ހަރުކަށި ފިޔަވަޅުތަކަށް ކައުންސިލް ދަނީ ލުއިތައް ދެމުންނެވެ.