މިދުވަސްވަރަކީ ރާއްޖޭގައި، ޚާއްސަކޮށް މާލެސިޓީގައި މާރާމާރީތައް ގިނަ ދުވަސްކޮޅެކެވެ. ކޮންމެވެސް ދިމާލަކުން ދެމީހެއްގެ ދޭތެރޭ މާރާމާރީ ހިންގައި، ނުވަތަ ދެ ގޭންގެއްގެ ދެމެދުގައި މާރާމާރީ ހިންގައިގެން އުޅޭ ވާހަކަތައް އަޑުއިވެއެވެ. މި ކަންތައްތަކާއި ގުޅިގެން ފުލުހުންގެ ބެލުމުގެ ދަށަށް މީހުންވެސް ގެންދެއެވެ. އަދި އެމީހުންގެ ބަންދަށް ކޯޓުން މުއްދަތުވެސް ޖަހައިދެއެވެ. އެހެންނަމަވެސް ގިނަފަހަރަށް ކުށް ސާބިތުނުވާ ކަމަށް ބުނެ ނުވަތަ އެވަރަށް ހެކި ނެތްކަމަށް ބުނެ ކޯޓުން އެމީހުން ދޫކޮށްލައެވެ. މިއީ މާޒީގައި ކަން ހިނގާފައިވާ ގޮތަށް ބެލީމާ ފެންނަން އޮތް ހަގީގަތެވެ.

ފުލުހުންގެ ތަފާސްހިސާބުތަކަށް ބަލާއިރު މާލެސިޓީގައި މިއަހަރު ޖެނުއަރީ މަހުގެ އެއްވަނަ ދުވަހުން ފެށިގެން ޖޫން މަހުގެ 10 ވަނަ ދުވަހާއި ހަމައަށް ފުލުހުންނަށް ރިޕޯޓުކޮށްފައިވަނީ ބިރުދެއްކުމުގެ މައްސަލަތަކެވެ. އެގޮތުން ބިރު ދެއްކުމުގެ 159 މައްސަލަ ފުލުހުންނަށް ރިޕޯޓުކޮށްފައިވާއިރު ދެވަނައަށް އެންމެ ގިނައިން ރިޕޯޓުކޮށްފައިވަނީ މާރާމާރީގެ މައްސަލަތަކެވެ. އެގޮތުން މާރާމާރީގެ 157 މައްސަލަ ރިޕޯޓުކޮށްފައިވެއެވެ. ތަކެއްޗަށް ގެއްލުން ދިނުމުގެ 144 މައްސަލަ ރިޕޯޓުކޮށްފައިވާއިރު ޖިންސީ ފުރައްސާރައިގެ 37 މައްސަލައެއް ރިޕޯޓުކޮށްފައިވެއެވެ. ޖިންސީ އަނިޔާގެ 48 މައްސަލަ ރިޕޯޓުކޮށްފައިވާއިރު ކިޑްނެޕް ކުރުމުގެ 5 މައްސަލަ، ރޭފް ކުރުމުގެ 2 މައްސަލަ އަދި ރޯކޮށްލުމުގެ 2 މައްސަލަ ރިޕޯޓުކޮށްފައިވެއެވެ. މި މައްސަލަތަކާއެކު މާލެސިޓީން އެކަނިވެސް ކުށުގެ ޖުމްލަ 678 މައްސަލަ ވަނީ ރިޕޯޓުކޮށްފައެވެ.

މައްސަލަތައް މިހާ ގިނަ އަދަދުތަކަކަށް ރިޕޯޓު ކުރެވެމުންދާއިރު ހިތާމައަކީ މިފަދަ ކޮންމެ ކަމެއްވެސް ވުމުން އެމީހަކަށް އެހީތެރިކަމުގެ އަތެއް ދިއްކޮށްލުމުގެ ބަދަލުގައި އެ ސަރަހައްދެއްގައި ހުންނަ މީހަކު އެންމެ ފުރަތަމަ ކުރާކަމަކީ ވީޑިއޯ ކުރުމެވެ. އެއަށްފަހު އެ ވީޑިއޯ ސޯޝަލް މީޑިއާއަށް ދޫކޮށްލުމުވެ. މިއާއެކު އެކަންތައް ކުށްވެރިކޮށް އެކަމާމެދު ހިތްމަނުޖެހިގެން ގިނަ މީހުން ކޮމެންޓް ކުރަން ފަށައެވެ. ރާއްޖޭގައި މީހަކު ކިޑްނެޕް ކުރިޔަސް، މީހެއްގެ މުދަލަށް ގެއްލުން ދިނަސް އަދި މާރާމާރީއެއް ހިންގިޔަސް އެކަން ހުއްޓުވާކަށް ކުޅިބަލަން ތިބޭ މީހުން މަސައްކަތެއް ނުކުރެއެވެ. އެ ދިމާލާއެއްގައި ކިތަންމެ ގިނަ އަދެދެއްގެ މީހުން ތިއްބަސް ވަރިހަމައެވެ.

ރާއްޖެއެކޭ އިންޑިއާއެކޭ ވަކި ތަފާތެއް ނެތެވެ. ރޯމާދުވާލު ކުށަކަށް މީހަކު އަރައިގަންނަތަން ފެނުނަސް ކުޅިބަލަން ގިނަ މީހުން ތިބެނީއެވެ. މީގެ ދެމަހެއްހާ ދުވަސް ކުރިން އާންމުވި މާރާމާރީގެ ވީޑިއޯއަކަށް ބަލާއިރު އެ ވީޑިއޯގައި ވެސް ޒަޚަމްވެފައިވާ މީހާ މަގުމަތީގައި އޮތްއިރު މަގުމަތިން ދިޔަ އާންމު މީހަކު އޭނާގެ ކުރިމަތިން ހުރަސް ކުރިއެވެ. ވަރަށް ހަމަޖެހިލައިގެން އެމީހާ ހުރަސް ކަނޑާލިއިރު ފައި ދަށުގައި ޒަޚަމްވެފައިވާ މީހެއް ނެތް ކަހަލައެވެ. މިއީވެސް މި ރާއްޖޭގައި މިހާރު ފެންނަމުންދާ އެކަމަކު ބަލަން އުނދަގޫ މަންޒަރުތަކެވެ. ކަމެއް ދިމާވުމުން ކޮންމެ މީހަކުވެސް ދުއްވައިގަންނަނީ އެމީހެއްގެ ފޯނާ ދިމާލަށެވެ. އެންމެ ފުރަތަމަ މަންޒަރު ލިބޭނީ ކާކަށްތޯ ބެލުމަށެވެ.

ކުޅިބަލަން ތިބޭ މީހުންގެ ތެރެއިން ގިނަ ބަޔަކު ސިފަކުރާ ގޮތުގައި އެގޮތަށް މަގުމަތީގައި ކަމެއް ދިމާވުމުން އެހީތެރިކަމުގެ އަތެއް ދިއްކޮށްނުލަނީ އަމިއްލަ ސަލާމާތާއި ރައްކާތެރިކަމަށް ބެލުމަށްފަހުގައެވެ. އެއީ މާރާމާރީއެއް ހުއްޓުވަން މަސައްކަތް ކުރަނިކޮށް އެމީހަކަށް ގެއްލުން ވެދާނެތީ ނުވަތަ އެ ކުށެއް ހިންގި މީހަކު ބަންދުން ދޫވެގެން އައިސް އެމީހަކަށް އިންޒާރުދީ ގެއްލުން ދީފާނެކަމުގެ ބިރު އޮތުމުންނެވެ. މިއީވެސް ދޮގުވާހަކައެއް ނޫނެވެ. ކުށުގެ ވެށިން ފުލުހުން މީހަކު ހައްޔަރުކުރިޔަސް އެމީހާގެ މައްޗަށް ކުށް ސާބިތުނުވާ ކަމަށް ރާއްޖޭގެ ކޯޓުތަކުން ކަނޑައަޅާ ފަހަރު މަދެއް ނޫނެވެ.

ހުށަހެޅޭ ގިނަ މައްސަލަތަކަށް އިންސާފު ނުލިބި ދަނީ ފުނިޖެހެމުންނެވެ. އަދުލުގެ ނިޒާމާ ދޭތެރޭގައި ރައްޔިތުންގެ އިތުބާރު ދަނީ ގެއްލެމުންނެވެ. ކޮންމެ މީހަކުވެސް އުޅެން ބޭނުންވާ އުސޫލަކީ އެމީހަކާ އެމީހެކެވެ. އެއީ އުޅެން އެންމެ ބޮލަށް ފަސޭހަގޮތް ކަމަށް ގިނަ ބަޔަކު ދެކެއެވެ. ކަން މިހެން ހުރިއިރު ހިތުގައި އުފެދޭ ސުވާލަކީ ޓެކްނޮލޮޖީއާއެކު އިންސާނިއްޔަތުކަން ވެސް ނެތިދަނީ ބާއެވެ.