އައްޑޫ ސިޓީން އިތުރު ތިން މީހަކު ޕޮޒިޓިވްވެ، ޖުމްލަ 305ށް އަރައިފިއެވެ.

އައްޑޫ އެމަރޖެންސީ ސެންޓަރުން ބުނީ ބުދަ ދުވަހުގެ އިރުއޮއްސި 6:00ން ބުރާސްފަތި ދުވަހުގެ އިރުއޮއްސި 6:00ށް 124 ސާމްޕަލެއް ނަގާފައިވާއިރު، އޭގެ ތެރެއިން ތިން މީހަކު ޕޮޒިޓިވްވެފައިވާ ކަމަށެވެ.

ތަފާސް ހިސާބުތައް ދައްކާ ގޮތުން ހިތަދޫއިން 81 މީހުން، މަރަދޫ-ފޭދޫއިން 2 މީހުން، ފޭދޫއިން 2 މީހުން، ރިސޯޓުތަކުން/އެހެނިހެން 2 މީހުން، މީދޫއިން އެކަކު، ހުޅުދޫއިން 26 މީހުން އަދި މަރަދޫއިން 7 މީހަކު ޕޮޒިޓިވްވެފައިވެއެވެ. 121 އެކްޓިވް ކޭސް ހިމެނޭއިރު 182 މީހަކު ވަނީ ބަލިން ރަނގަޅުވެފައެވެ. މިހާތަނަށް އައްޑޫ ސިޓީން 4854 ސާމްޕަލެއް ނަގާފައިވެއެވެ.

އައްޑޫ ސިޓީން މިބަލީގައި ދެމީހަކު ނިޔާވެފައިވެއެވެ.

އައްޑޫ ސިޓީ ދެވަނަ ފަހަރަށް މޮނިޓަރިންގެ ހާލަތަށް ގެނައީ 1 މެއި ވީ ހޮނިހިރު ދުވަހުގެ ވަގުތެއްގައެވެ. އޭގެފަހުން ކޮންމެ ދުވަހަކު ވެސް އެސިޓީން ޕޮޒިޓިވް ކޭސްތައް ރިޕޯޓު ކުރެވެއެވެ. އައްޑޫގައި ކޮވިޑްގެ ހާލަތު ރަނގަޅު ނޫން ކަމަށާއި، ކޮންޓްރޯލް ކުރުމަށް އާއްމު ރައްޔިތުންގެ އެއްބާރުލުން ބޭނުންވާ ކަމަށް އައްޑޫ ސިޓީ ކައުންސިލުން ބުނެއެވެ.

ކޮވިޑް ކޮންޓްރޯލް ކުރުމުގެ ގޮތުން ވަނީ ގިނަ ފިޔަވަޅުތަކެއް އަޅާފައެވެ. އެގޮތުން ކޮންމެހެން ނުކުންނަން ޖެހިގެން މެނުވީ ނުނުކުތުމަށް އިލްތިމާސްކޮށްފައިވާއިރު، އަސާސީ ޚިދުމަތްތައް ފޯރުކޮށްދިނުމުގައި ރައްޔިތުންނަށް ލުއި ފަސޭހަވާނެ ގޮތަށް ކަންކަން އިންތިޒާމް ކުރުމުގެ މަސައްކަތް އައްޑޫ ސިޓީ ކައުންސިލުން ދަނީ ކުރަމުންނެވެ.