އައްޑޫ ހޮސްޕިޓަލުގެ އޮކްސިޖަން ޕްލާންޓަށް ބޭނުންވާ ބޫސްޓަރ ޕަމްޕު ވަނީ އައްޑޫ އަށް ގެންގޮސްފައި ކަމަށް ރައީސް އޮފީހުގެ ތަރުޖަމާނު މަބްރޫކް އަޒީޒް ވިދާޅުވެއްޖެއެވެ.
ރާއްޖޭގެ ބައެއް މީޑިއާތަކުން ރިޕޯޓްކޮށްފައިވާ ޚަބަރާއި ގުޅިގެން މަބްރޫކް ވިދާޅުވީ އައްޑޫ ހޮސްޕިޓަލުގެ އޮކްސިޖަން ޕްލާންޓަށް ބޭނުންވާ ބޫސްޓަރ ޕަމްޕު އައްޑޫއަށް މިހާރު ގެންގޮސްފައިވާ ކަމަށާއި، އަދި ބޫސްޓަރ ޕަމްޕު އިންސްޓޯލް ކުރުމުގެ މަސައްކަތް ޝެޑިއުލް ކޮށްފައިވާ ކަމަށެވެ.
މަބްރޫކް އިތުރަށް ވިދާޅުވީ އައްޑޫ ހޮސްޕިޓަލަށް ގެންގޮސްފައިވާ އޮކްސިޖަން ޕްލާންޓަކީ ދުވާލަކު 48 ސިލިންޑަރަށް ބޭނުންވާ އޮކްސިޖަން ފޯރުކޮށްދިނުމުގެ ގާބިލުކަން ލިބިފައިވާ ޕްލާންޓެއް ކަމަށެވެ.
އައްޑޫގައި ކޮވިޑް-19ގެ ފެސިލިޓީއެއް ހަދާފައިވާއިރު، މިވަގުތު އެ ފެސިލިޓީއަށް އޮކްސިޖަން ސިލިންޑަރު ގެންދަނީ މާލެއިންނެވެ. އަދި އޮކްސިޖަން ސިލިންޑަރު ގެންދަނީ އައްޑޫ ހޮސްޕިޓަލުން ބަލި މީހަކު ކޮވިޑް-19 ފެސިލިޓީއަށް ބަދަލުކުރާނަމަ އެކަންޏެވެ.
