ކުރިއަށް އޮތް ފީފާ ވޯލްޑް ކަޕާއި އޭއެފްސީ އޭޝިއަން ކަޕުގެ ޖޮއިންޓް ކޮލިފިކޭޝަނަށް ގައުމީ ފުޓްބޯޅަ ޓީމުގެ ތައްޔާރީތައް ކުރިއަށްދަނީ އާދައިގެ ގޮތަކަށް ނޫން ކަމަށް ގައުމީ ޓީމުގެ ކޯޗު ނެދަލެންޑްސްގެ މާޓިން ކޫޕްމަން ބުނެފިއެވެ.

ކޮލިފައިންގައި ރާއްޖެ ހިމެނޭ ގްރޫޕް އޭގެ ބާކީ ހުރި މެޗުތައް މި މަހުގެ 30 ވަނަ ދުވަހުން ފެށިގެން އަންނަ ޖޫން މަހުގެ 15 ވަނަ ދުވަހުގެ ނިޔަލަށް ޗައިނާގައި ކުޅެން ވަނީ ތާވަލުކޮށްފައެވެ. އެހެންކަމުން ޗައިނާއަށް ފުރުމުގެ ކުރިން 33 ކުޅުންތެރިންގެ ޕްރިލިމިނަރީ ސްކޮޑެއް މީގެ ކުރިން އެކުލަވާލިއިރު، މިދިޔަ ބުރާސްފަތި ދުވަހުގެ ވަގުތެއްގައި ގައުމީ ޓީމުގެ ކުޅުންތެރިންނާއި އޮފިޝަލުން ވަނީ ހޮޓެލް ޖެންގައި ކޭމްޕްކޮށްފައެވެ.

މައުލޫމާތު ލިބޭ ގޮތުން ގައުމީ ޓީމުން އަންނަނީ އަންނަ ބުދަ ދުވަހު ޗައިނާއަށް ފުރަން މަސައްކަތް ކުރަމުންނެވެ. އުމުރުން 64 އަހަރުގެ ކޫޕްމަންގެ އިރުޝާދުގެ ދަށުން ކޮލިފައިން މެޗުތަކާ ގައުމީ ޓީމުން ކުރިމަތިލާއިރު، އޭނާ ގައުމީ ޓީމާ ހަވާލުވެފައިވަނީ މިދިޔަ އަހަރުގެ ޖެނުއަރީ މަހުގެ 26 ވަނަ ދުވަހު ދެ އަހަރުގެ އެއްބަސްވުމެއްގެ ދަށުންނެވެ. ގައުމީ ޓީމާއެކު މިހާތަނަށް ކޫޕްމަން މެޗަކަށް ނުކުމެފައެއް ނުވެއެވެ. ދާދި ފަހުން ކޫޕްމަން ވަނީ ގައުމީ ޓީމުގެ އެއްބަސްވުން އިތުރު ތިން އަހަރަށް އާކޮށްފައެވެ.

ޖެންގައި ގައުމީ ޓީމުން ކުރިއަށްގެންދާ ފިޒިކަލް ތަމްރީނުތަކުގެ ފޮޓޯތަކެއް އިންސްޓާގްރާމުގައި ހިއްސާކުރުމަށްފަހު ކޫޕްމަން ބުނީ ވަރަށް ގިނަ ކުޅުންތެރިން އިންފެކްޓްވެފައިވާ ކަމަށާއި، އެކަމަކު ރަނގަޅު ހާލަތަކަށް ގެނެވޭތޯ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ވަރަށް ބޮޑަށް މަސައްކަތް ކުރަމުން އަންނަ ކަމަށެވެ. ނަމަވެސް ފަސް ހަފުތާ ވަންދެން ދަނޑުގައި ތަމްރީނު ނުކޮށް، ޗައިނާގައި 10 ދުވަހުން ތައްޔާރުވާން ޖެހުމަކީ ޗެލެންޖެއް ކަމަށާއި، އެކަމަކު ޓީމެއްގެ ގޮތުގައި ކުރެވެން ހުރި ހުރިހާ މަސައްކަތެއް ކުރަމުން އަންނަ ކަމަށް ކޫޕްމަން ބުންޏެވެ.

ކޫޕްމަން އިތުރަށް ބުނީ ކުރިއަށް އޮތް ކޮލިފައިން މެޗުތަކަށް ވަމުންދާ ތައްޔާރީތަކަކީ އާދައިގެ ގޮތަކަށް ދާ ކަމެއް ނޫން ކަމަށާއި، ދަނޑުމަތީގައި ތަމްރީނުތައް ކުރިއަށް ގެންދަން ފުރުސަތު ނުލިބުނަސް، ކުޅުންތެރިން ފިޓްކޮށް ތިބެން ކުރެވުނުހާ ކަމެއް ކުރަމުން އަންނަ ކަމަށެވެ.

ކޮވިޑް-19 ގެ އަސަރު ގައުމީ ޓީމަށްވެސް ކޮށްފައިވާއިރު، މީގެ ކުރިން އެކުލަވާލި 33 ކުޅުންތެރިންގެ ޕްރިލިމިނަރީ ސްކޮޑުގައި ހިމެނުނު ތަޖުރިބާކާރު މިޑްފީލްޑަރު އިސްމާއީލް އީސަ (މެސީ) ވަނީ ކޮވިޑަށް ޕޮޒިޓިވްވެފައެވެ. އެހެންކަމުން އޭނާއަށް ގައުމީ ޓީމުން ފުރުސަތު ގެއްލިފައިވެއެވެ. ފައިނަލް ސްކޮޑް އެކުލަވާލަން އަދި ދުވަސް ނަގާނެ ކަމަށް މައުލޫމާތު ލިބެއެވެ.

ކޮވިޑާ ގުޅިގެން ކޮލިފައިން މެޗުތައް ޗައިނާގައި ކުޅޭއިރު، ރާއްޖެއަށް ބާކީ ތިން މެޗު އެބައޮތެވެ. އެއީ ޗައިނާ އާއި، ސީރިއާ އަދި ފިލިޕީންސާ ދެކޮޅަށް ކުޅެން އޮތް މެޗުތަކެވެ. މީގެ ތެރެއިން ސީރިއާ މެޗަކީ ރާއްޖޭގެ ހޯމް މެޗެކެވެ.

އޭޝިއާ ސަރަހައްދުން ހަތަރު ގައުމެއް 2022 ވަނަ އަހަރުގެ ފީފާ ވޯލްޑް ކަޕަށް ކޮލިފައިވާއިރު، ކޮލިފައިންގައި ރާއްޖެ އޮތީ ހަތަރު މެޗުން ހަ ޕޮއިންޓާއެކު ގްރޫޕުގެ ހަތަރުވަނައިގައެވެ. ގްރޫޕުގެ އެއްވަނައިގައި އޮތީ ފަސް މެޗުން 15 ޕޮއިންޓާއެކު ސީރިއާއެވެ. ހަތަރު މެޗުން ހަތް ޕޮއިންޓާއެކު ދެވަނައިގައި ޗައިނާ އޮތްއިރު، ތިންވަނައިގައި އޮތީ ފަސް މެޗުން ހަތް ޕޮއިންޓް ހޯދާފައިވާ ފިލިޕީންސެވެ. އަދި ރާއްޖޭގެ ފަހަތުން ފަސްވަނައިގައި އޮތީ ފަސް މެޗު ކުޅެގެން އަދި ޕޮއިންޓެއް ލިބިފައިނުވާ ގުއާމެވެ.