އިސްލާމީ އަގީދާ ރައްކާތެރިކޮށް، ދެމެހެއްޓުމަށް ސަމާލުވާން ޖެހޭ ކަމަށާއި، މިއަގީދާ ފުނޑުފުނޑުކޮށްލުމަށް ފިކުރީ ގޮތުން އެތައް މަސައްކަތެއް ކުރަމުންދާ ކަމަށް އީދު ޚުތުބާގައި ބުނެފިއެވެ.

ފިތުރު އީދު ދުވަހު ރާއްޖޭގެ އެކިކަންކޮޅުތަކަށް އިއްވި ޚުތުބާގައި ބުނީ މިފަދަ އުފާވެރި ދުވަހެއްގައި ހަނދާނަށް ގެންނަންޖެހޭ މުހިއްމު އެއް ކަމަކީ، އިސްލާމީ އަގީދާ އަކީ، އެންމެހާ މުސްލިމުންގެ އެކުވެރިކަމާއި، އެއްބައިވަންތަކަމާއި، އެއްބައެއްވަންތަކަމުގެ ތަނބު ކަމަށެވެ. އަދި ޖީލަކަށް، މި މަތިވެރި އަގީދާ ފޯރުކޮށްދީ، ގައުމުގެ އިސްލާމީ ޝަޚުސިއްޔަތު ރައްކާތެރިކޮށް، ދެމެހެއްޓުމަށް އަޒުމް އައު ކުރުމަށް ޚުތުބާގައި ވަނީ ގޮވާލާފައެވެ.

އިސްލާމީ އަގީދާފުނޑުފުނޑުކޮށްލުމަށް ޓަކައި ފިކުރީ ގޮތުން އެތައް މަސައްކަތެއް ކުރަމުންދާކަން ފާހަގަކޮށް ޚުތުބާގައި ބުނީ މިފަދަ ކެހިވެރި ރޭވުންތަކަށް ސަމާލުވާން ޖެހޭ ކަމަށެވެ.

ދިވެހި ގައުމުގެ ޒުވާނުންނަށް އިޝާރާތް ކުރައްވައި ޚުތުބާގައި ބުނީ ޒުވާނުން ރަމަޟާން މަހު ދެއްކި އީމާންކަމުގެ މަތިވެރި ނަމޫނާގެ މަތީގައި، ނަމާދާއި އެހެނިހެން އަޅުކަންތަކަށް ފަރުވާތެރިވާ ފަދައިން، އެމަހަށްފަހު ވެސް ފަރުވާތެރިވާން ޖެހޭ ކަމަށެވެ.

އިސްލާމީ އުއްމަތުގެ އެންމެ މުހިއްމު ބަޔަކީ، ކަނބަލުންކަން ފާހަގަކޮށް ޚުތުބާގައި ބުނީ ރަމަޟާން މަހުގެ ތަރުބަވީ މަދަރުސާއިން ލިބުނު ފިލާވަޅުތަކުން އިބުރަތް ހާސިލުކުރަން ޖެހޭ ކަމަށާއި، ރަމަޟާން މަހުން ހާސިލު ކުރެވުނު ހިދާޔަތާއި ތަޤްވާގެ އަލީގައި، ހެޔޮ ގޮތުގައި ދަރީން ތަރުބިޔަތު ކުރުމަށް ގަދައަޅައި މަސައްކަތް ކުރަން ޖެހޭ ކަމަށެވެ. މީގެ އިތުރުން އަނބީންނަށް އޯގާތެރިވެ، ވާޖިބު އަދާކުރުމަށް ނަސޭހަތްތެރިވެފައިވެއެވެ. އަދި ހެޔޮ ބަސް ބުނުމާއި، މައިންބަފައިނަށް ކަމޭހިތުމާއި، ވެރީންނަށް ކިޔަމަން ގަތުމާއި، ހެޔޮ ކަންކަމުގައި އެއްބަޔަކު އަނެއް ބަޔަކަށް ވާގިވެރިވެ އުޅުމާއި، އަމާނާތްތެރިވުމާއި، ވައުދު ފުއްދުމަށް ޚުތުބާގައި ގޮވާލާފައިވެއެވެ.

ޚުތުބާގައި ބުނީ އިސްލާމް ދީނަކީ ސަލާމަތާއި، އަމާން ކަމުގެ ދީން ކަމަށާއި، އަނިޔާވެރިކަމާއި، ހައްދު ފަހަނަ އެޅުމާ ދެކޮޅު ދީނެއް ކަމަށެވެ. މީސްތަކުންގެ ފުރާނަޔާއި މުދަލަށް ގެއްލުންދިނުން ފަދަ އަނިޔާވެރި، އަމަލުތަކުން އިސްލާމް ދީން ބަރީޢަވެގެންވާ ކަމަށް ޚުތުބާގައި ބުނެފައިވެއެވެ.

ޚުތުބާ ނިންމާލާފައިވަނީ ފަލަސްތީނާއި ދުނިޔޭގެ އެކިކަންކޮޅުތަކުގައި ހިތާމަވެރި ހާލުގައި ތިބި މުސްލިމުންގެ މަތިން ހަނދާން އައު ކުރަމުންނެވެ. އަދި އިސްލާމީ އުއްމަތަށް ނަސްރު ދެއްވުމަށް އެދި ގިނަގިނައިން ދުއާ ކުރުމަށް ޚުތުބާގައި ގޮވާލާފައިވެއެވެ.