"މަގުމަތީ ފޮތްހަރު" ގޮފިތައް އަތޮޅުތެރޭގެ ރަށްރަށުގައި ބަހައްޓަން ނިންމާފައިވާކަމަށް މިނިސްޓްރީ އޮފް އާޓްސް ކަލްޗަރ އެންޑް ހެރިޓޭޖްގެ ޑެޕިއުޓީ މިނިސްޓަރު އަހްމަދު މުހުސިން ވިދާޅުވެއްޖެއެވެ.
ރާއްޖެޓީވީގެ "ފަލަސުރުޚީ" ޕްރޮގްރާމުގައި ވާހަކަފުޅު ދައްކަވަމުން މުހުސިން ވިދާޅުވީ ކޮންމެ ރަށެއްގައި ގައުމީ ކުތުބުޚާނާގެ ގޮތްޕެއް ހުޅުވުމަކީ ފަސޭހަކަމެއް ނޫންކަމަށެވެ. އެހެންނަމަވެސް ރަށްރަށުގައި ކުބުޚާނާތައް ގާއިމުކުރަން ބޭނުންވާ ކައުންސިލްތަކަށް އެހީތެރިކަން ފޯރުކޮށްދެއްވާނެ ކަމަށް ވިދާޅުވިއެވެ. އަދި ރަށު ކައުންސިލުތަކުގެ އެހީތެރިކަމާއެކު މަގުމަތީ ފޮތްހަރުތަކެއް އަތޮޅުތެރޭގެ ރަށްރަށުގައި ވެސް ބެހެއްޓިދާނެކަމަށް ވިދާޅުވިއެވެ.
ކޮންމެ ރަށެއްގަ ގައުމީ ކުތުބުޚާނާގެ ލައިބްރަރީއެއް ހުޅުވުން އެއީކީ އެހާ ފަސޭހަ ކަމަކަށް ނުވާނެ. އެހެންވީމަ ކައުންސިލުތަކަށް އެބާރު އޮތްއިރު، ކައުންސިލުތަކުން އެކަންކަން ކުރަން އަޅުގަނޑުމެން ބާރު އަޅާނަން. އަދި ކައުންސިލުތަކާއި ގުޅިގެން އަޅުގަނޑުމެން އެކަން ކުރާނަން. އޭގެ އިތުރުން މިހާރު އަޅުގަނޑުމެން ފެށި އާކަމެއް މީ މާލޭގެ ބައެއް ސަރަހައްދުތަކުގަ މަގުމަތީ ފޮތްހަރު، އިނގިރޭސިން ބުނަންޏާ ސްޓްރީޓް ލައިބްރަރީ ގާއިމުކުރަން ފަށައިފިން. ހަމަ އޭގެ ގޮފިތަކެއް އިރާދަކުރެއްވިއްޔާ ކުރިއަށް އޮތްތަނުގަ ކައުންސިލުތަކާއި ގުޅިގެން ރަށްރަށުގެ ހޮޅުއަށިތައް ކައިރީގަ ނަމަވެސް ނޫނިއްޔާ ކުޑަކުދިން އެއްވާ ސަރަހައްދުތަކުގައި ވެސް އޭގެ ބައެއް ގޮފިތަށް ގާއިމުކުރުމަކީ އިރާދަކުރެއްވިއްޔާ ވެގެން ދާނެކަމެއްމިނިސްޓްރީ އޮފް އާޓްސް ކަލްޗަރ އެންޑް ހެރިޓޭޖްގެ ޑެޕިއުޓީ މިނިސްޓަރު އަހްމަދު މުހުސިން
މާލޭގެ ހިއްތަން މައިޒާނާއި ކަޅުވަކަރު މިސްކިތް މައިޒާނުގައި ދާދިފަހުން މަގުމަތީ ފޮތްހަރު ބަހައްޓާފައިވެއެވެ. މީގެ އިތުރުން ލޮނުޒިޔާރަތް ޕާކާއި ފެރީޓާމިނަލް ސަރަހައްދުގައި ފޮތްހަރު ބެހެއްޓުމަށް ނިންމާފައިވާކަމަށް ވެސް މުހްސިން ވިދާޅުވިއެވެ.
"މަގުމަތީ ފޮތްހަރު" މިއީ ފަސޭހައިން ފޮތް ނަގާ ހެދޭނެ ގޮތަށް ތައްޔާރުކޮށްފައިވާ ކުޑަ ފޮތްހަރެކެވެ. މި ފޮތްހަރުތަކުން ފޮތް ދޫކޮށް އަދި ބަލައިގަތުމަށް އެއްވެސް ފަރާތެއް ނުވަތަ މެދުވެރިއަކު ނުހުންނާނެ ކަމަށާއި ފޮތް ގެންދިއުމާއި ފޮތް ކިޔާ ނިމުމުން އެ ފޮތް އަނބުރާ ހަރަށް ގެނެސްދިނުމަކީ ގެންދިޔަ ފަރާތުގެ ޒިންމާއެއް ކަމަށް ގައުމީ ކުތުބުޚާނާއިން ބުނެއެވެ.
