ސަރުކާރުން ފައިސާ ޗާޕުކޮށް، ސަރުކާރާ ގުޅުންހުރި ފަރާތްތަކަށް ބަހަމުން ގެންދާ ގެންދިއުން ހުއްޓާލަން ގޮވާލައި ހުށަހެޅި ކުއްލި މައްސަލަ ރައްޔިތުންގެ މަޖިލީހަށް ބަލައިގަތުމަށް ނުފެންނަ ކަމަށް މަޖިލީހުން ނިންމައިފިއެވެ.

އަންގާރަ ދުވަހުގެ ރައްޔިތުންގެ މަޖިލީހުގައި މިކަމަށްޓަކައި ނެގުނު ވޯޓުގައި 35 މެންބަރުން ބައިވެރިވެވަޑައިގެންފައި ވާއިރު މި މައްސަލަ ބަލައިގަންނަން ނުފެންނަ ކަމަށް 29 މެންބަރުން ވޯޓު ދެއްވިއެވެ. އަދި އެ މައްސަލަ ބަލައިގަންނަން ފެންނަ ކަމަށް ފަސް މެންބަރުން ވޯޓު ދެއްވިއިރު އެއް މެންބަރަކު ވަނީ ވަކި ގޮތަކަށް ވޯޓުދޭން ބޭނުން ނުވާ ކަމަށް ބުނެފައެވެ.

މި ކުއްލި މައްސަލަ ހުށަހަޅުއްވާފައި ވަނީ ފަރެސްމާތޮޑާ ދާއިރާގެ މެންބަރު ހުސެން މުހައްމަދު ލަތީފެވެ. މައްސަލަ ހުށަހަޅުއްވަމުން މެންބަރު ވިދާޅުވީ ރާއްޖޭގެ އިގްތިސާދު، ވެއްޓިފައިވާ ފުން ވަޅުގަނޑުން އަދިވެސް އަރައިނުގަނެވި އިިގްތިސާދީ އަދި މާލީ ހާލަތަށް ބޮޑެތި ގޮންޖެހުންތަކެއް ކުރިމަތިވެފައިވާ ކަމަށެވެ. މެންބަރުގެ ވާހަކައިގައި ވަނީ ސަރުކާރުން އެކި މަގާމުތަކުގައި ތިއްބެވި އަދި ސަަރުކާރާ ގާތް ގުޅުން އޮންނަ މީހުންނަށް ފައިސާ ބަހަމުން ދާ ކަމަށް ވެސް ތުހުމަތު ކުރައްވާފައެވެ.

މީގެ އިތުރުން މެންބަރު ވަނީ ޝަރުއީ ކޯޓެއްގެ ނިހާއީ ހުކުމެއް ނެތި އަދި ކޯޓުން ބޭރުން ސަރުކާރުން ހަދާފައިވާ ސެޓްލްމެންޓް ކޮމިޓީގެ ތެރެއިން އެއްވެސް ކަހަލަ ބެލުމެއް ނެތި ބޮޑެތި އަދަދުތަކުން އެކި ފަރާތްތަކަށް ބަދަލުގެ ގޮތުގައި ފައިސާ ދިނުމަށް ސަރުކާރުން ނިންމަމުން ގެންދަވާ ކަމަށް ބުނެ ތަކުރާރުކޮށް ބޮޑެތި ތުހުމަތުތަކެއް ކުރައްވާފައެވެ.

އޯވަރޑްރާފްޓްގެ މުއްދަތު އެއް އަހަރަށް އިތުރުކޮށްދިނުމަށް މަޖިލީހުން ފާސްކޮށްފައިވާއިރު މަޖިލީހުން މިގޮތަށް ފާސްކުރީ ވޯޓުގައި ބައިވެރިވެވަޑައިގެންނެވި 53 މެންބަރުންގެ ތެރެއިން 47 މެންބަރުންގެ އަޣުލަބިއްޔަތުންނެވެ. ނުފެންނަކަމަށް ވޯޓު ދެއްވީ 4 މެންބަރުންނެވެ. ހުއްދަ ދީފައިވަނީ އޯވާރޑްރޯގެ އަދަދު 4.4 ބިލިއަން ރުފިޔާއަށް ވުރެ އިތުރު ނުވާނެގޮތަށެވެ.