ޗެލްސީއާއެކު ހަދާފައި އޮތް އެއްބަސްވުން އާކުރަން ބޭނުންވާ ކަމަށް ބްރެޒިލުގެ ޑިފެންޑަރު ތިއާގޯ ސިލްވާ ބުނެފިއެވެ.
ޕީއެސްޖީގައި އަށް އަހަރު ހޭދަކުރުމަށްފަހު ސިލްވާ ޗެލްސީއަށް ބަދަލުވީ މިދިޔަ އަހަރުގެ ހޫނު މޫސުމުގައި ހިލޭ ޓްރާންސްފާއެއްގެ ދަށުންނެވެ. އުމުރުން 36 އަހަރުގެ ސިލްވާ ޗެލްސީއާއެކު އެއް އަހަރުގެ އެއްބަސްވުމެއް ހަދާފައިވާއިރު، އެ އެއްބަސްވުމުގެ ދަށުން ސިލްވާ ބޭނުންނަމަ އިތުރު އެއް އަހަރު ޗެލްސީގައި މަޑުކުރުމުގެ ފުރުޞަތު ލިބިގެންދެއެވެ.
ދާދި ފަހުން ދިން އިންޓަވިއުއެއްގައި ސިލްވާ ބުނީ އަންނަ އަހަރުގެ ވޯލްޑް ކަޕާ ހަމައަށް އެއް ފެންވަރެއްގައި ކުޅެން ބޭނުންވާ ކަމަށާއި، އެހެންކަމުން އޭނާގެ އަމާޒަކީ ވޯލްޑް ކަޕުގެ ނިޔަލަށް ޗެލްސީގައި މަޑުކުރުން ކަމަށެވެ.
އަންނަ ސީޒަނުގައިވެސް ޗެލްސީގައި މަޑުކުރަން ސިލްވާ ބޭނުންވަނީ އެ ޓީމުގެ އައު ކޯޗު ތޯމަސް ޓުޗެލުގެ އިރުޝާދުގެ ދަށުން، ޗެލްސީން ދައްކަމުން އަންނަ ތަފާތު މޮޅު ކުޅުމުގެ ސަބަބުން ކަމަށް ރިޕޯޓުތައް ބުނެއެވެ. ސިލްވާ ބުނީ ޗެލްސީގައި ޓުޗެލް ކުރަމުން އަންނަ މަސައްކަތް ފާހަގަކޮށްލެވޭ ކަމަށާއި، އުއްމީދަކީ ޓުޗެލްއާއެކު ޗެލްސީން ގިނަ ކާމިޔާބީތަކެއް ހޯދުން ކަމަށެވެ.
ޓުޗެލުގެ އިރުޝާދުގެ ދަށުން ޗެލްސީން މި ސީޒަނުގައި ތަފާތު މޮޅު ކުޅުމެއް ދައްކަމުން އަންނައިރު، އެ ޓީމު މިހާރު ވަނީ މި ސީޒަނުގެ ޔުއެފާ ޗެމްޕިއަންސް ލީގުގެ ސެމީ ފައިނަލަށްވެސް ދަތުރުކޮށްފައެވެ. އަދި ޓުޗެލުގެ ކޯޗުކަމުގައި ޗެލްސީން މިހާތަނަށް 18 މެޗު ކުޅެފައިވާއިރު، އެ ޓީމު ބަލިވީ އެންމެ ދެ މެޗުންނެވެ.
މީގެ ކުރިން ޕީއެސްޖީއާއެކު ފްރެންޗު ލީގު ހަތް ފަހަރު ހޯދާފައިވާ ސިލްވާ، ޗެލްސީގެ އެއްބަސްވުން އާކުރަން މަސައްކަތްކުރަމުން އަންނައިރު، މި ސީޒަނުގައި ޗެލްސީއާ ގުޅެ މިހާތަނަށް އޭނާ ވަނީ އެ ޓީމަށް 23 މެޗު ކުޅެދީފައެވެ. އަދި މި މެޗުތަކުގައި އޭނާ ވަނީ މިހާތަނަށް ދެ ލަނޑު ޖަހާފައެވެ.
