އިލެކްޝަންސް ކޮމިޝަނުގައި އަންގާރަ ދުވަހު އާންމުން ހިނގި ހަމަނުޖެހުން ވާދަވެރި ސިޔާސީ ޕާޓީތަކުން ދައްކާފައިވަނީ ހަގީގަތާއި ޚިލާފަށް ކަމަށް އިލެކްޝަންސް ކޮމިޝަނުގެ ރައީސް އަހުމަދު ޝަރީފް ވިދާޅުވެއްޖެއެވެ.
އީސީން ވަނީ އަންގާރަ ދުވަހު ބައެއް ވޯޓު ޝީޓުތަކުގެ ނަތީޖާ ކަށަވަރު ކުރުމުގެ ގޮތުން ސިކިއުރޓީ އުރަތަކެއް ކެނޑުމުގެ ކަންކަން ކުރިޔަށް ގެންގޮސްފައެވެ. ޝަރީފް ވިދާޅުވީ އަންގާރަ ދުވަހު އެކަން ކުރަން އުޅުނީ ސިޔާސީ ޕާޓީއަކުން ނުވަތަ ކެންޑިޑޭޓަކު ހުށަހަޅި ޝަކުވާއަކާއި ގުޅިގެން ނޫން ކަމަށެވެ. އަދި މިއީ ވޯޓު ޝީޓުތަކުގައި ޝައްކުވުންތަކެއް ހުރުމުން ވަގުތީ ނަތީޖާ އިއުލާން ކުރުމުގެ ކުރިން ޔަގީން ކުރަން ޖެހޭ ކަންކަން ޔަގީން ކުރުމަށް ގެންދިޔަ ހަރަކާތެއް ކަމަށް ޝަރީފް ވިދާޅުވިއެވެ. އީސީގެ ވޯޓާއިބެހޭ މަރުކަޒު ހުންނަ ސަރަހައްދުގައި ހިންގި ހަމަނުޖެހުމާއި ގުޅިގެން އެކަން މިހާރު ފަސްކޮށްފައިވާ ކަމަށް ޝަރީފް ވިދާޅުވިއެވެ.
މިއަދު ހިނގި ހަމަނުޖެހުމުގެ ވާހަކަތައް ވާދަވެރި ސިޔާސީ ޕާޓީތަކުން ދައްކާފައިވަނީ ހަގީގަތާއި ހިލާފަށް. އީސީން މަސައްކަތް ކުރަނީ ހާމަކަން ބޮޑުކޮށް ދެ ފުށް ފެންނާނެހެން. އެކަމުގެ ޔަގީންކަން ހުރިހާ ފަރާތްތަކަކަށްވެސް އަރުވަން.އިލެކްޝަން ކޮމިޝަނުގެ ރައީސް އަޙްމަދު ޝަރީފް
ޝަރީފް ވިދާޅުވީ ކުރިޔަށް އޮތް ތަނުގައި މިގޮތަށް ވޯޓު ގުނާނަމަ އާންމުންނަށް ވޯޓު ގުނާ ތަނުގައި ހަރަކާތްތެރިވުމުގެ ފުރުސަތެއް ނޯންނާނެ ކަމަށާއި، އެކަމަކު ކެންޑިޑޭޓުންނާއި ކެންޑިޑޭޓުންގެ މަންދޫބުން އަދި މީޑިއާއަށް އެ ފުރުސަތު އޮންނާނެ ކަމަށެވެ.
ޝަރީފް ވަނީ ބުރާސްފަތި ދުވަހު ހިނގި ހަމަ ނުޖެހުމާއި ގުޅިގެން ސިޔާސީ ޕާޓީތަކުން ދައްކާފައިވާ ވާހަކަތައް ދޮގު ކުރައްވާފައެވެ. ޝަރީފް ވިދާޅުވީ އީސީން މަސައްކަތް ކުރަނީ އަދި ކުރާނީވެސް ވަކި ފަރާތަކަށް ބުރަ ނުވެ ދެފުށް ފެންނާނެހެން ކަމަށެވެ.
