ސައުތް އޭޝިއަން ޓްރެވަލް އެވޯޑްސް، ސަޓާ އެވޯޑްސް 2021 އަށް ކުރިމަތިލުމުގެ މުއްދަތު އިތުރުކޮށްފިއެވެ.

މުއްދަތު އިތުރުކޮށްފައިވަނީ މެއި މަހު 10 ވަނަ ދުވަހާއި ހަމައަށެވެ. އެވޯޑަށް ކުރިމަތިލުމަށް ކުރިން އޮތީ މިމަހު 10 ވަނަ ދުވަހާ ހަމައަށެވެ. މި އެވޯޑަށް ކުރިމަތިލުމުގެ މުއްދަތު އިތުރު ކޮށްފައިވަނީ، ކޮވިޑް 19 އާއި ގުޅިގެން ދިމާވި އެކި ދަތިތަކާއި ގުޅިގެން، ގިނަ ބަޔަކު މުއްދަތު އިތުރުކުރުމަށް އެދުމުން ކަމަށް ސަޓާއިން ބުނެފައިވެއެވެ.

ފޯމް ހުށަހެޅުމުގެ ފުރުސަތު ހުޅުވާލާފައިވަނީ ވެބްސައިޓް މެދުވެރިކޮށެވެ. 52 ކެޓަގަރީއަކަށް ނަން ހުށަހެޅުމުގެ ފުރުސަތު ހުޅުވާލާފައިވާ މި އެވޮޑަކީ ފަތުރުވެރިކަމުގެ ދާއިރާގެ ބްރޭޑްތަކަށް އޭޝިއާ ސަރަހައްދުގައި ދޭ އެންމެ ޝަރަފުވެރި އެވޯޑެވެ.

އެގޮތުން މި އެވޯޑަށް 52 ކެޓަގަރީއަށް ނަން ހުށަހެޅުމަށް ހުޅުވާލާފައިވަނީ، ވިޒިޓާރސް ޗޮއިސް އަދި ސްޕެޝަލް ރިކޮގްނިޝަން ހިމެނޭ ގޮތަށް ކަމަށް ސަޓާ އިން ބުނެފައިވެއެވެ. ސަޓާ އެވޯޑަކީ 2016 ވަނަ އަހަރުން ފެށިގެން ކޮންމެ އަހަރަކު ދެމުން އަންނަ އެވޯޑެކެވެ. 2017ވަނަ އަހަރު މި އެވޮޑް ހަފްލާ ބާއްވާފައިވަނި ރާއްޖޭގައެވެ. މިއަހަރުގެ ސަޓާ އެވޯޑު ހަފްލާ ބޭއްވުމަށް ނިންމާފައިވަނީ ވާޗުއަލް ކޮށެވެ.