ކަންކަން ހިންގުމުގައި ބަސް ބުނެވޭނީ ވޯޓު ދީގެން ކަމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ވޯޓު ދެއްވުމަށްފަހު މީޑިއާއާ ބައްދަލު ކުރައްވަމުން ރައީސް ނަޝީދު ވިދާޅުވީ، ވޯޓު ދިނުމަކީ ވަރަށް މުހިންމު ކަމެއް ކަމަށާއި، ވޯޓު ނުދިނުމަކީ ހައްލެއް ނޫން ކަމަށެވެ. ކޮންމެވެސް އެއް ފަރާތަކަށް ވޯޓު ދޭން ޖެހޭނެ ކަމަށާއި، ގައުމެއް ބިނާކުރުމުގައި ހިއްސާ ވެވޭނީ ވޯޓު ދީގެން ކަމަށެވެ. ވޯޓު ދިނުމަކީ ރައްޔިތުންގެ މަސްއޫލިއްޔަތެއް ކަމަށް ވެސް ސިފަކުރެއްވިއެވެ.
އިލެކްޝަންސް ކޮމިޝަނުން އިންތިޒާމްތައް ހަމަޖައްސާފައިވަނީ ވަރަށް ރަގަޅަށް ކަމަށާއި، ވޯޓުގެ ކަންކަން ހިނގަމުންދަނީ ވަރަށް ސުލްހަވެރިކަމާއެކު ކަމަށް ނަޝީދު ވިދާޅުވިއެވެ. އަދި އެންމެން ވެސް ވޯޓުލާން ދިއުމަށް އެދިވަޑައިގެންނެވިއެވެ.
ކައުންސިލްތަކުގެ މެޖޯރިޓީ ލިބޭނެ ކަމަށް ނަޝީދު ވިދާޅުވާ ވާހަކަފުޅު އަނެއްކާވެސް ތަކުރާނު ކުރައްވަމުން ވިދާޅުވީ، އެގްޒިޓް ޕޯލްތަކުން އެ މަންޒަރު ވަރަށް ސާފުކޮށް ފެނިވަޑައިގަންނަވާ ކަމަށެވެ. ކައުންސިލްތަކުގެ އިންތިޚާބުގައި އާއްމުކޮށް ވޯޓުލާ މީހުންގެ އަދަދު މާލޭގައި މަދު ނަަމަވެސް މިފަހަރު އެ އަދަދު ރަގަޅުވާނެ ކަމަށް ލަފާކުރެވޭ ކަމަށް ނަޝީދު ވިދާޅުވިއެވެ.
ރައްޔިތުންގެ ހިތްތަކަށް ލާމަރުކަޒީ ނިޒާމްގެ މުހިންމުކަން ވަންނާނީ ނިޒާމް ރަނގަޅަށް ހިނގައިގަތުމުން ކަމަށާއި، މިއީ ރާއްޖޭގެ ޑިމޮކްރަސީގެ ހަޔާތުގައި އުފާވެރި ދުވަހެއް ކަމަށް ވިދާޅުވިއެވެ. ޕާޓީތަކާއި، ސަރުކާރާއި ކެންޑިޑޭޓުންނަށް ވެސް އިންތިހާއަށް އުނދަގޫތަކެއް ކުރިމަތިވުމަށްފަހު މިހާރު މިކަން މިހިނގަނީ ވަރަށް ރަގަޅަށް ކަމަށްވެސް ވިދާޅުވިއެވެ.
ރައީސް ނަޝީދު ވޯޓު ލައްވާފައިވަނީ ގަލޮޅު އުތުރުގެ ވޯޓު ފޮއްޓަށެވެ.
