ރައީސް ޓްރަމްޕްގެ ރިޔާސީ ވައުދުފުޅާ އެއްގޮތަށް ރައީސް އޮބާމާގެ ހެލްތްކެއަރ ޕްލޭން، އޮބާމާ ކެއަރ އުވާލައްވައި ރައީސް ޓްރަމްޕް ހުށަހެޅުއްވި ހެލްތް ކެއަރ ބިލް ގާނޫނު ހަދާ މަޖިލީހުގެ ތިރިގެއިން ފާސްކޮށްފިއެވެ.
ދި އެމެރިކަން ހެލްތް ކެއަރ އެކްޓް(އޭއެޗްސީއޭ) ފާސްކޮށްފައި މިވަނީ މި ބިލަށް ރިޕަބްލިކަން ޕާޓީގެ މެމްބަރުންގެ ތާއީދު ހޯއްދެވުމަށްވެސް ހަފްތާތަކެއްވަންދެން މަސައްކަތް ކުރެއްވުމަށްފަހުއެވެ.
ޑެމޮކްރޭޓުންގެ ހުރިހާ މެމްބަރުން މި ބިލަށް ދެކޮޅު ހައްދަވާފައިވާއިރު އެ ޕާޓީގެ ހައުސް ލީޑަރު ނަންސީ ޕެލޯސީ ވިދާޅުވީ އެއި "ފިނޑި ނިންމުމެއް"ކަމަށެވެ.
ރައީސް ޓްރަމްޕް ހުންނެވީ މި ނިންމުމަށް މަތިގޭގެ ތާއީދު ލިބިވަޑައިގަންނަވާނެކަން ޔަގީން ކުރައްވައިގެންނެވެ.
"ގޯހެއް ނަހައްދަވާތި، މިއީ އޮބާމާކެއަރ ބާތިލް ކުރުމަށްފަހު އޭގެ ބަދަލު"ބިލް ފާސްވިތާ ކުޑަވަގުތުކޮޅެއްގެ ތެރޭގައި ވައިޓް ހައުސްގެ ރޯސް ގާޑެންގައި ވާހަކަދައްކަވަމުން ޓްރަމްޕް ވިދާޅުވިއެވެ.
އާ ރައީސްއަށް އެމަނިކުފާނުގެ ވެރިކަމުގެ ފުރަތަމަ ތިން މަސްދުވަހުގެ ތެރޭ ގާނޫނު ހަދާ މަޖިލީހުގެ ތިރިގެއިން ފުރަތަމަ ކާމިޔާބީ ލިބިވަޑައިގަތުމަކީ ހެޔޮފާލެކެވެ.
މީގެ އިތުރުން ބިލްގައި ހިމެނޭ ކަންތައްތަކަށް ރިޕަބްލިކަން ޕާޓީން އެއްބަސްނުވެވި މާޗްމަހު ބިލް ދޫކޮށްލެވިފައި އޮތުމަށްފަހު އެކަން އަނބުރާލެވުމަކީ ފާހަގަކޮށްލެވޭ ކާމިޔާބީއެކެވެ.
ބިލް ފާސްކުރުމަށް 216 ވޯޓް ބޭނުންވާއިރު ފާސްވެފައިވަނީ 217 ވޯޓުންނެވެ. ޑެމޮކްރެޓިކް ޕާޓީގެ އެއްވެސް މެމްބަރަކު ވޯޓް ދެއްވާފައެއް ނުވެއެ ވެ.
ބިލާދެކޮޅަށް މުޒާހަރާ ކުރި ފަރާތްތަކުންވަނީ ބިލް ފާސްކުރެއްވުމަށްފަހު ގާނޫނު ހަދާ މަޖިލީހުގެ މެމްބަރުން ނުކުމެވެޑައިގަތުމުން މެމްބަރުންނާ ދިމާލަށް "ލަދު ކޮބައިތޯ" އަހައި ހަޅޭއްލަވާފައެވެ.
ރައީސް ޓްރަމްޕް ސިފަ ކުރައްވާފައިވާ ގޮތުގައި އޮބަމާކެއަރ އަކީ ޚަރަދު ބޮޑު ނިޒާމެކެވެ. ނަމަވެސް ޑެމޮކްރޭޓުން ސިފަ ކުރައްވާގޮތުގައި ޓްރަމްޕް ކުރައްވާން އުޅުއްވާ ކަމަކީ މުއްސަނދިންނަށް ފައިދާވާ ނިޒާމަކަށް ގައުމުގެ ކަންކަން އަބުރާލެއްވުމެވެ.
