މުދައްރިސުންނަށް އިތުރު އިނާޔަތްތައް ދީ، މުދައްރިސުންނާމެދު މުޖުތަމައު ދެކޭ ގޮތް ބަދަލު ކުރަން ޖެހޭ ކަމަށް އެޑިއުކޭޝަން މިނިސްޓަރ ޑރ އައިޝަތު އަލީ ވިދާޅުވެއްޖެއެވެ.
ބުދަ ދުވަހު ރާއްޖެޓީވީގެ ފަށާއިރު ޕްރޮގްރާމްގައި ވާހަކަ ދައްކަވަމުން މިނިސްޓަރ ވިދާޅުވީ މިހާރު ތައުލީމީ ދާއިރާއަށް ޝައުގުވެރިކަން ހުންނަ ކުދިން މަދުކަން ފާހަގަކުރެވޭ ކަަމަށެވެ. އެންމެ ކުރީގައި މުދައްރިސް ކަމަކީ ވަރަށް ގަދަރުވެރި ވަޒީފާއެއް ކަމަށާއި އެހާމެ މުސާރަ ވެސް ބޮޑު ވަޒީފާއެއް ކަމަށެވެ. އެހެންނަމަވެސް މިހާރު މުދައްރިސުންގެ މުސާރަ އާއި އިނާޔަތްތައް ކުޑަ ކަމަށާއި މުދައްރިސުންނާމެދު މުޖުތަމައު ދެކޭ ގޮތް ބަދަލު ކުރަން ޖެހޭ ކަމަށް ވިދާޅުވިއެވެ.
އޭޕްރިލް އެއްވަނަ ދުވަހު އެލްކޭޖީ އިން ފެށިގެން ހުރިހާ ގްރޭޑެއްގެ ކުދިންނަށް ސްކޫލްތައް ހުޅުވާއިރު އެކަމަށް ވަރަށް ބޮޑަށް ތައްޔާރުވެފައި ތިބި ކަމަށް މިނިސްޓަރ ވިދާޅުވިއެވެ. އަދި އެޗްޕީއޭގެ ގައިޑްލައިނާ އެއްގޮތަށް ސްކޫލްގެ ރައްކާތެރިކަން ކަށަވަރުވާނެ ކަމަށް ވެސް މިނިސްޓަރ ވިދާޅުވިއެވެ.
މިނިސްޓަރު ވިދާޅުވީ އެޑިއުކޭޝަން މިނިސްޓްރީއަށް އެއްވެސް ބާރެއް އޮތް ނަމަ، ދުވަހަކުވެސް ސްކޫލު ބަންދުނުކުރާނެ ކަމަށެވެ. ނަމަވެސް މިފަދަ ސިއްހީ ކާރިސާއެއްގެ ތެރޭގައި އުޅޭއިރު، އަޑުއަހަން ޖެހޭނީ ސިއްހީ މާހިރުންނާއި އެޗްޕީއޭގެ ލަފާ ކަމަށެވެ.
ސްކޫލުތައް ބަންދުކޮށްފައި ހުރި ނަމަވެސް، ދަރިވަރުންގެ ކިޔެވުން ހުއްޓުމަކަށް ނާންނާނެ ގޮތަކަށް މަސައްކަތް ކުރަމުން އަންނަ ކަމަށް މިނިސްޓަރު ފާހަގަކުރެއްވިއެވެ. މިނިސްޓަރު ވިދާޅުވީ ދުނިޔޭގެ އެހެން ގައުމުތަކުގައި ވެސް އެންމެ ފުރަތަމަ ހުޅުވަނީ ސްކޫލުތައް ކަމަށާއި، އެއީ ސްކޫލެއް ބަންދުކޮށްފައި ހުރުމުން ދަރިވަރުންނަށް ލިބޭ ގެއްލުން ބޮޑު ކަމުން ކަމަށެވެ.
މީގެ ދެ ދުވަސް ކުރިން ބޭއްވި ޔުނެސްކޯގެ މިނިސްޓީރިއަލް މީޓިންގައި ގިނަ ގައުމުތަކެއްގެ އެޑިއުކޭޝަން މިނިސްޓަރުންނާ އެކު ބައިވެރިވެވަޑައިގެންނެވި ކަމަށާއި، މިވީ އަހަރެއްހާ ދުވަހުގެ ތެރޭގައި ގޭގައި ތިބެގެން ކިޔަވަން ޖެހުމުން ދަރިވަރުންނަށް ލިބޭ ގެއްލުން އެ ހުރިހާ ބޭފުޅުންވެސް ފާހަގަކުރެއްވި ކަމަށް މިނިސްޓަރު ވިދާޅުވިއެވެ.
ދަރިވަރުން ސްކޫލަށް ހާޒިރުކޮށްގެން ކިޔައިވައި ދިނުމަކީ މުހިންމު ކަމެއްކަން ފާހަގަކުރައްވާ މިނިސްޓަރ ވިދާޅުވީ މި ދަނޑިވަޅުގައި ކޭސްތައް އިތުރުވެފައިވާއިރު ސްކޫލްތައް ހުޅުވުމަށް ނިންމުމުން ބައެއް މީހުން އެކަމާއި ކަންބޮޑުވާނެ ކަަމަށެވެ. އެހެންނަމަވެސް 95 އިންސައްތަ ޓީޗަރުން ވެކްސިން ޖެހުމުން ކުދިން ސްކޫލަށް ހާޒިރުކޮށްގެން ކިޔަވައިދިނުމުގެ ފުރުސަތު ދެވިގެންދާނެ ކަމަށް އެޗްޕީއޭ އިން މިނިސްޓްރީއަށް އަންގާފައިވާ ކަމަށް މިނިސްޓަރ ވިދާޅުވިއެެވެ. އަދި މިހާރު 95 އިންސައްތައަށް ވުރެ ގިނަ ޓީޗަރުން ވެކްސިން ޖަހާފައިވާ ކަމަށް ވެސް ވިދާޅުވިއެވެ.
އެޑިއުކޭޝަން މިނިސްޓްރީން މިހާރު ކުރަމުން ގެންދާ މުހިންމު މަސައްކަތްތަކަށް އަލިއަޅުވާލައްވަމުން މިނިސްޓަރ ޑރ އައިޝަތު އަލީ ވިދާޅުވީ މިހާރު 13 ޕީއެސްއައިޕީ ޕްރޮޖެކްޓް ނިމިފައިވާ ކަމަށާއި 30 ޕްރޮޖެކްޓެއްގެ މަސައްކަތް ކުރިއަށްދާ ކަމަށެވެ.
މިނިސްޓަރ އިތުރަށް ވިދާޅުވީ އެއް ދަންފަޅިއަށް ސްކޫލްތައް ބަދަލުކުރުމުގެ މަސައްކަތް ކުރިއަށްދާއިރު ވަރަށް ގިނަ ކްލާސްރޫމްތައް، އޭވީ ރޫމް، މަލްޓިޕާޕަސް ހޯލްތައް ބޭނުންވާ ކަމަށެވެ. އަދި އެ މަސައްކަތް ވަރަށް ބާރަށް ކުރިއަށްދާ ކަމަށެވެ.
މި ސަރުކާރުގެ އަމާޒަކީ ހަމައެކަނި ކުދިންނަށް ޓެސްޓުތައް ދީގެން، ފޮތުގައި އޮންނަ އެއްޗެއް ކިޔަވައިދިނުން ނޫން ކަމަށާއި ކިޔެވުމުގެ އިތުރުން ދިރިއުޅުމުގެ ހުނަރުތައް ވެސް ކުދިންނަށް ދަސްކޮށްދިނުމަށްވެސް ސަރުކާރުން ބޮޑު އިސްކަމެއް ދޭކަމަށް މިނިސްޓަރ ވިދާޅުވިއެވެ.
