އިކޮނޮމިކް މިނިސްޓްރީން ފޯރުކޮށްދެމުން އަންނަ "ސްޕެޝަލް އެކްސްޓެންޝަން" ގެ ޚިދުމަތް ހުއްޓާލުމަށް އެ މިނިސްޓްރީން ނިންމައިފިއެވެ.

އިކޮނޮމިކް މިނިސްޓްރީން ބުނީ އޭޕްރިލް އެއް ވަނަ ދުވަހުން ފެށިގެން "ސްޕެޝަލް އެކްސްޓެންޝަން" ގެ ޚިދުމަތް ފޯރުކޮށްދިނުން ހުއްޓާލަން ނިންމާފައިވާ ކަމަށެވެ.

އެގޮތުން އެ މިނިސްޓްރީން ނެރުނު ބަޔާނެއްގައި ބުނެފައި ވަނީ ކޮވިޑް-19 ގެ ސަބަބުން ދަތުރުފަތުރު ކުރުމުގައި ކުރިމަތިވި ދަތިތަކާ ގުޅިގެން، ރާއްޖޭގެ ވަޒީފާ އަދާކުރުމަށް ގެނެވޭ ބިދޭސީންނަށް، ރާއްޖެ އެތެރެވުމަށް ދޫކުރެވޭ ހުއްދަ އަދި ކުރިން އަމަލުކުރަމުން ދިޔަ ގަވާއިދުގެ ދަށުން ދޫކޮށްފައިވާ އެމްޕްލޯއިމަންޓް އެޕްރޫވަލްގެ ދަށުން ރާއްޖެ އެތެރެވުމަށް ދެވޭ 90 ދުވަހުގެ ތެރޭގައި ރާއްޖެ އެތެރުވުމުގައި ކުރިމަތިވި ދަތިތަކަށް ލުއި ދިނުމުގެ ގޮތުން މިނިސްޓްރީން ފޯރުކޮށްދެމުން ދާ "ސްޕެޝަލް އެކްސްޓެންޝަން" ގެ ޚިދުމަތް، ހުއްޓާލަން ނިންމާފައިވާ ކަމަށެެވެ.

ބިދޭސީންނަށް ވަރކް ޕަރމިޓް ދޫކުރެވޭ ގޮތަށް އިކޮނޮމިކް މިނިސްޓްރީން ބަދަލުތަކެއް ގެނަސްފައިވާ އިރު، އެމިނިސްޓްރީން ވަނީ ވަރކް ޕަރމިޓަށް އެދި ހުށައަޅާ ލިޔެކިއުންތަކުގެ ތެރޭގައި އެހެން ބަހަކުން އޮތް ލިޔެމުއް ވާނަމަ، އެލިޔުމެއްގެ އިނގިރޭސި ތަރުޖަމާ، އަސްލާއެއްގޮތް ކަމަށް ބަޔާންކޮށް ހުށައެޅުމަށް އަންގާފައެވެ.

އިކޮނޮމިކް މިނިސްޓްރީން ބިދޭސީ މަސައްކަތްތެރިންގެ ވަރކް ޕަރމިޓް ދޫކުރަން ފަށާފައި ވަނީ ފެބްރުއަރީ 15 ވަނަ ދުވަހުއެވެ. އެގޮތުން ރާއްޖޭގައި ބިދޭސީން ވަޒީފާ އަދާކުރުމާބެހޭ ގަވައިދުގައި ބަޔާންކުރާ ގޮތަށް ވަރކް ޕަރމިޓް ދޫކުރެވޭނީ، އިކޮނޮމިކް މިނިސްޓްރީން ބިދޭސީންގެ ވެރިފިކޭޝަނެއް ފުރިހަމަ ކުރުމަށް ފަހުކަމަށާއި، އެކްސްޕެޓް ސިސްޓަމް މެދުވެރިކޮށް ވެރިފިކޭޝަން ފުރިހަމަ ކުރެވޭނެ ކަމަށް އެ މިނިސްޓްރީން ބުނެއެވެ. އަދި ވެރިފިކޭޝަން ފުރިހަމަ ކުރުމަށް އެޕޮއިންޓްމެންޓެއް ހެދުމަށްފަހު، ވަޒީފާދޭ ފަރާތުން ނުވަތަ އެ ފަރާތުން އައްޔަންކުރާ އެހެން ފަރާތަކުން، ހުރަވީ ބިލްޑިންގެ 3 ވަނަ ފަންގިފިލާގައި ހުންނަ އިކޮނޮމިކް މިނިސްޓްރީގެ އެމްޕްލޯއިމަންޓް ރަޖިސްޓްރޭޝަން ސެކްޝަންގެ ކައުންޓަރަށް ބިދޭސީން ގެންދަން ޖެހެއެވެ.

ބިދޭސީން ރާއްޖެ އެތެރެވާ ދުވަހުން ފެށިގެން، ވަރކް ޕަރމިޓް ހޯދަން ކަނޑައެޅިފައިވާ މުއްދަތު ހަމަވަންދެން ކޮންމެ ދުވަހަކުވެސް ވެރިފިކޭޝަންގެ ޚިދުމަތް ހޯދޭނެ ކަމަށް އެ މިނިސްޓްރީން ބުނެއެވެ.