ޔޫރަޕުގެ އެންމެ ޝަރަފުވެރި ކުލަބު ފުޓްބޯޅަ މުބާރާތް ކަމަށްވާ ޔުއެފާ ޗެމްޕިއަންސް ލީގުގެ ފޯމެޓް، 2024 ވަނަ އަހަރުން ފެށިގެން ބަދަލުކުރަން ތާވަލުކުރި ބައްދަލުވުން ފަސްކޮށްފިއެވެ.

ޗެމްޕިއަންސް ލީގުގެ ފޯމެޓް ބަދަލުކުރަން ޔުއެފާއިން ނިންމި އެންމެ ބޮޑު ސަބަބަކީ ދުނިޔޭގެ މަހުޖަނުންތަކެއް ބޭނުންވެގެން ފުޓްބޯޅައިގެ މަޝްހޫރު ހުރިހާ ކުލަބެއް ހިމަނައި، ސުޕަ ލީގެއް ވުޖޫދުކުރަން އުޅޭ މަސައްކަތް ހުއްޓުވުމެވެ. އެގޮތުން ޗެމްޕިއަންސް ލީގުގެ ފޯމެޓް ބަދަލުކުރުން ޔުއެފާއިން މަޝްވަރާކުރަމުން އަންނަތާ މިހާރު ވަނީ ދެ އަހަރުވެފައެވެ.

ޗެމްޕިއަންސް ލީގުގެ ފޯމެޓް ބަދަލުކުރުން ޔުއެފާއިން މަޝްވަރާކުރަމުން އަންނައިރު، މި ވަގުތު ގިނަ ބަޔަކަށް އެންމެ ކަމުދާ މޮޑެލަކީ 10 މެޗުގެ ގްރޫޕް ސްޓޭޖެއް ކުޅެން ލިބޭ ގޮތަށް ރޭވިފައިވާ ފޯމެޓް ކަމަށް ރިޕޯޓުތައް ބުނެއެވެ. އެގޮތުން މި ޕްރޮޕޯސަލުގައިވާ ގޮތުން ޗެމްޕިއަންސް ލީގުގެ ގްރޫޕް ސްޓޭޖުގައި 32 ޓީމުގެ ބަދަލުގައި 36 ޓީމު ވާދަކުރާނެއެވެ. އަދި ވައިލްޑް ކާޑް އެންޓްރީގެ ދަށުން ދެ ޓީމަށް ގްރޫޕް ސްޓޭޖަށް ކޮލިފައިވާއިރު، އެ ދެ ޓީމު ކަނޑައަޅާނީ ޔުއެފާއިން ކަނޑައަޅާ ޚާއްޞަ ޕޮއިންޓް އުސޫލެއްގެ ދަށުން ކަމަށް ރިޕޯޓުތައް ބުނެއެވެ.

އަދި ގްރޫޕް ސްޓޭޖުގައި ކޮންމެ ޓީމަކަށް 10 މެޗު ކުޅެން ލިބޭއިރު، އެ 10 މެޗުން އެންމެ ގިނަ ޕޮއިންޓް ހޯދާ ގަދަ އަށް ޓީމު ދެވަނަ ބުރަށް ދަތުރުކުރާނެއެވެ. ދެން ލީގުގެ ނުވަވަނައިން ފެށިގެން 24 ވަނައާ ދެމެދު ނިންމާ ޓީމުތައް ޕްލޭއޮފް ބުރެއް ކުޅޭއިރު، އެ ބުރުން ކުރި ހޯދާ އަށް ޓީމު ދެވަނަ ބުރަށް ދަތުރުކުރާނެއެވެ. އެހެންކަމުން ދެވަނަ ބުރު ކުރިއަށްދާނީ މިހާރުވެސް މުބާރާތް ކުރިއަށްދާ އުސޫލުން ގަދަ 16 ޓީމުގެ މެދުގައެވެ. ދެން ލީގުގެ 17 ވަނައިން ފެށިގެން 24 ވަނައާ ދެމެދު ނިންމާ ކުލަބުތަކަށް ޔުއެފާ ޔޫރޮޕާ ލީގުގެ ޖާގަ ލިބޭއިރު، އޭގެ ފުލުން ނިންމާ އަށް ޓީމު މުބާރާތުން ކަޓާގޮތަށް ހަދަންވެސް ނިންމާފައިވާ ކަމަށް ރިޕޯޓުތައް ބުނެއެވެ.

އެހެންކަމުން ޗެމްޕިއަންސް ލީގުގެ ފޯމެޓް ބަދަލުކުރުމަށް ގޮތެއް ނިންމުމަށް ބުދަ ދުވަހު ޔުއެފާގެ ހިންގާ ކޮމިޓީން ބައްދަލުވުމެއް ބާއްވަން ތާވަލުކުރި ނަމަވެސް، މިހާރު އެ ބައްދަލުވުން ވަނީ އަންނަ އޭޕްރީލް މަހުގެ 19 ވަނަ ދުވަހަށް ފަސްކޮށްފައެވެ.

ޗެމްޕިއަންސް ލީގުގެ ފޯމެޓް ބަދަލުކުރަން މަސައްކަތްކުރަމުން އަންނައިރު، މި ވަގުތު ކުރިއަށްދާ ފޯމެޓަކީ 32 ޓީމު އަށް ގްރޫޕަކަށް ބަހާލުމަށްފަހު، ކޮންމެ ޓީމަކަށް ގްރޫޕް ސްޓޭޖުގައި ހަ މެޗު ކުޅެން ދިނުމަށްފަހު، އެންމެ ގިނަ ޕޮއިންޓް ހޯދާ ދެ ޓީމު ގަދަ 16 ބުރަށް ގޮސް، އެ ހިސާބުން ނޮކައުޓް މުބާރާތެއްގައި ކުޅޭ ގޮތަށެވެ. އަދި ގްރޫޕް ސްޓޭޖުގެ ތިންވަނައަށް ދާ ޓީމަށް ޔޫރޮޕާ ލީގުގެ ޖާގަ ލިބޭ ގޮތަށް އޮތްއިރު، އެންމެ ފުލުގައި އޮންނަ ޓީމު މުބާރާތުން ކަޓާނެއެވެ.

ޗެމްޕިއަންސް ލީގުގެ ފޯމެޓް ބަދަލުކުރަން އެންމެ ފުރަތަމަ ހުށަހެޅުނު ޕްރޮޕޯސަލުގައި އޮތީ އަށް ޓީމުގެ ހަތަރު ގްރޫޕް ހެދުމަށްފަހު، ގްރޫޕް ސްޓޭޖުގައި ކޮންމެ ޓީމަކަށް 14 މެޗު ލިބޭ ގޮތަށް ހެދުމަށެވެ. އެކަމަކު މާ ގިނަ މެޗުތަކެއް މުބާރާތުގައި ކުޅެން ޖެހި، ޝެޑިއުލް ރޭވުމުގައި ދަތިތަކެއް ދިމާވާނެތީ، އެ ޕްރޮޕޯސަލް ވަނީ އަނބުރާ ފޮނުވާލާއެވެ.

ޗެމްޕިއަންސް ލީގުގެ އައު ފޯމެޓާ ބެހޭގޮތުން ލަސްވެގެން މި އަހަރުގެ ކުރިން ގޮތެއް ނިންމަން ޔުއެފާއިން އަމާޒުހިފާފައިވާއިރު، އައު ފޯމެޓަށް އަމަލުކުރަން ފަށާނީ 2024 ވަނަ އަހަރެވެ.