މަރުގެ މައްސަލައެއް ނުބެލުމަށް ދަށު ކޯޓުންނާއި ހައިކޯޓުން ނިންމި ނިންމުން ޕްރޮސެކިއުޓަރ ޖެނެރަލް (ޕީޖީ) އޮފީހުން ސުޕްރީމް ކޯޓުގައި އިސްތިއުނާފް ކުރުމުން، އެ މައްސަލަ ދައުލަތާ އެއްކޮޅަށް ނިމިއްޖެއެވެ.
މި މައްސަލައަކީ 2017 ވަނަ އަހަރުގެ ސެޕްޓެމްބަރމަހުގެ 24 ވަނަ ދުވަހު މާފަންނު އައިޓަމްސް ފިހާރަ ކައިރީގައި ތޫނު ހަތިޔާރު ބޭނުންކޮށްގެން ހިންގި ގޭންގު މާރާމާރީއެއްގައި، ވ.ކެޔޮދޫ ދޭލިޔާގޭ މޫސާ އަޙްމަދު މަރާލި މައްސަލައެވެ. އެގޮތުން މި މައްސަލައިގައި ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ކުށުގެ ދައުވާ އުފުލާފައިވާ އިބްރާޙިމް ސައްމާޙް އަހުމަދު ފަތުހީގެ ފަރާތުން ޝަރީއަތުގެ ކުރިން ހުށައެޅި ހުށައެޅުމަކާއި ގުޅިގެން އޭރު ކްރިމިނަލް ކޯޓުން ވަނީ އެ ދައުވާ ބަލާނެ ތަނެއް ނެތްކަމަށް ނިންމާފައެވެ. އަދި އެ ނިންމުން ދައުލަތުން ހައިކޯޓުގައި އިސްތިއުނާފް ކުރުމުން ހައިކޯޓުންވެސް ވަނީ ކްރިމިނަލް ކޯޓުގެ ނިންމުމަށް ތާއީދުކޮށްފައެވެ.
އެހެންނަމަވެސް، މި މައްސަލަ ސުޕްރީމް ކޯޓުގައި އިސްތިއުނާފު ކުރުމުން ސުޕްރީމް ކޯޓުގައި ކުރިއަށްދިޔަ އަޑުއެހުންތަކަށްފަހު ބުރާސްފަތި ދުވަހު ވަނީ އެ ދައުވާ އަލުން ބެލުމަށް ކްރިމިނަލް ކޯޓުގެ މައްޗަށް އަމުރު ނެރިފައެވެ. ޢެގޮތުން މި މައްސަލައިގައި ވަކާލާތު ކުރައްވާފައިވަނީވެސް ޕްރޮސެކިއުޓަރ ޖެނެރަލް ހުސައިން ޝަމީމްއެވެ. އަދި މިއީ ޕީޖީއަކު މިގޮތަށް ސުޕްރީމް ކޯޓުގައި ހިނގަމުންދިޔަ މައްސަލައެއްގައި ވަކާލާތު ކުރައްވައި ނިންމެވި ފުރަތަމަ މައްސަލައެވެ.
މި މައްސަލައިގައި ސުޕްރީމް ކޯޓުން ކުރި ޙުކުމުގައި ބުނެފައިވަނީ، ޤާނޫނުގައި ޚާއްސަ އުސޫލުތަކެއް ކަނޑައަޅާފައިވަނީ އިންސާފު އަވަސްމިނެއްގައި ހޯދައިދިނުމަށް ކަމަށެވެ. ނަމަވެސް މިއިން މުއްދަތެއް ފަހަނައަޅައިގޮސް ކުށްވެރިއަކު ވީއްލުމަކީ ޤާނޫނުގެ މަޤްސަދެއް ނޫންކަން ސުޕްރީމް ކޯޓުގެ ޙުކުމުގައި ފާހަގަކޮށްފައިވެއެވެ. އަދި ބޮޑު ކުށެއްގައި 15 ދުވަހުގެ ތެރޭގައި ހެކި އެއް ނުކުރެވިދާނެކަން ފާހަގަކޮށް ސުޕްރީމް ކޯޓުން ބުނީ، އެ މުއްދަތުގެ ތެރޭގައި ހެކި ނުލިބިއްޖެނަމަ ތަޙުޤީޤު ކުރުމަށް ނުވަތަ ދައުވާ ކުރުމަށް އެކަށޭނަ ކުރު މުއްދަތެއް އިތުރު ކުރުމުގެ އިޙުތިޔާރަކީ ޕީޖީ އޮފީހަށް ލިބިފައިވާ މުތުލަޤު ބާރެއް ކަމަށެވެ.
މި މައްސަލަ ކްރިމިނަލް ކޯޓުން އަލުން ބެލުމަށް ނިންމާފައިވަނީ ސުޕްރީމް ކޯޓުގައި މި މައްސަލަ ބެއްލެވި ފަނޑިޔާރުންގެ އިއްތިފާޤުންނެވެ. އެގޮތުން ސުޕްރީމް ކޯޓުގައި މި މައްސަލަ ބެއްލެވި ފަނޑިޔާރުންގެ ބެންޗުގައި ހިމެނިވަޑައިގަންނަވަނީ ފަނޑިޔާރު މުޙައްމަދު އިބްރާޙިމްއާއި، ފަނޑިޔާރު ހުސްނުއްސުޢޫދުގެ އިތުރުން، ފަނޑިޔާރު އަލީ ރަޝީދު ހުސައިންއެވެ.