ރ.ހުޅުއްދުފާރުން ކޮވިޑް-19ގެ ކޭސްއެއް ފެނުމާއި ގުޅިގެން އެރަށް ވެސް މޮނިޓަރިންގެ ހާލަތަށް ގެނެސްފިއެވެ.

ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ)ން ބުނީ ހުޅުދުއްފާރުން ޕޮޒިޓިވްވި މީހާއަކީ މިމަހުގެ 4 ވަނަ ދުވަހު އުނގޫފާރަށް ދަތުރުކޮށްފައިވާ މީހެއް ކަމަށެވެ.

މިކޭސްއާ ގުޅިގެން ކޮންޓެކްޓް ޓްރޭސިންގެ މަސައްކަތްތައް ކުރިއަށްދާ ކަމަށް އެޗްއީއޯސީން ބުނެއެވެ.

އުނގޫފާރުން ކޮވިޑް-19 ގެ ކޭސްތަކެއް ފެނިފައިވާތީ އެރަށަށް އަރާ ފައިބާފައިވާ މީހުންގެ މައުލޫމާތު ހޯދުމުގެ މަސައްކަތް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ފަށާފައިވަނީ މިމަހުގެ 20 ވީ ހޮނިހިރު ދުވަހުއެވެ.

އެޗްޕީއޭއިން ބުނީ، އުނގޫފާރުން ކޮވިޑް-19ގެ ޕޮޒިޓިވް ކޭސްތަކެއް ފެނިފައިވާތީ، 2 މާރިޗް 2021 ގެ ފަހުން އުނގޫފާރުގައި އުޅެފައި އަތޮޅުތެރޭގެ އެއްވެސް ރަށަކަށް ގޮސްފައިވާ ފަރާތެއްވާނަމަ، ވީ އެންމެ އަވަހަކަށް އެރަށެއްގެ ހޮސްޕިޓަލް/ހެލްތް ސެންޓަރަށް އެންގެވުން އެދޭ ކަމަށެވެ. އަދި މިތާރީޚްގެ ފަހުން އުނގޫފާރަށް ގޮސްފައިވާ ފަރާތެއްވާނަމަ، އުނގޫފާރުން އަނބުރާ ރަށަށް އައި ދުވަހުން ފެށިގެން 10 ދުވަސްވަންދެން ކަރަންޓީނުގައި ތިބުމަށް ވެސް އެޗްޕީއޭއިން ވަނީ އަންގާފާއެވެ.

އުނގޫފާރުން ނެގި ރެންޑަމް ސާމްޕަލަކުން މީހަކު ޕޮޒިޓިވްވެ، އެރަށް މޮނީޓަރިންގގެ ހާލަތަށް ގެނެސްފައިވަނީ މިމަހުގެ 19 ވީ ހުކުރު ދުވަހުގައެވެ. އުނގޫފާރު މޮނީޓަރިންގގެ ހާލަތަށް ގެނެސްފައިވާއިރު މިދިޔަ އަހަރުގެ އޮކްޓޯބަރުމަހުގެ ތެރޭގައިވެސް ނެގި ރެންޑަމް ސާމްޕަލަކުން މީހަކު ޕޮޒިޓިވްވެ އެ ރަށް ވަނީ މޮނީޓަރިންގއަށް ލާފައެވެ.