ވޮލީބޯޅަ އެެސޯސިއޭޝަން އޮފް މޯލްޑިވްސް (ވީއޭއެމް) ގެ ރައީސްގެ މަގާމަށް ކުރިމަތިލަނީ ވަރުގަދަ ޓީމަކާއެކު ކަމަށް އިލްޔާސް ވަހީދު (އިއްލަ) ވިދާޅުވެއްޖެއެވެ.

ދުނިޔޭގެ ވޮލީބޯޅައިގެ މައި ޖަމުޢިއްޔާ އެފްއައިވީބީ އާއި އޭޝިއަން ވޮލީބޯލް ކޮންފެޑެރޭޝަން (އޭވީސީ) އިސްވެ އޮވެ، އުފައްދާފައިވާ "އެޑްހޮކް ކޮމިޝަން" އިން ވަނީ ވީއޭއެމުގެ މައްސަލަ ނިންމުމާއެކު، ވީއޭއެމުގެ ނޯމަލައިޒިން ކޮމިޓީން އަންނަނީ ވީއޭއެމުގެ އިންތިޚާބު އަންނަ އޭޕްރީލް މަހުގެ އެއްވަނަ ދުވަހު ބޭއްވުމަށް މަސައްކަތްކުރަމުންނެވެ.

މީގެ ކުރިން 2008 ވަނަ އަހަރުން ފެށިގެން 2013 ވަނަ އަހަރަށް ވީއޭއެމުގެ ނައިބު ރައީސްގެ މަގާމު އަދާކުރެއްވި އިއްލަ، ރައީސް ކަމަށް ކުރިމަތިލާނެކަން އިޢުލާން ކުރައްމުން ވިދާޅުވީ އޭނާގެ ފަހަތުގައި އޮތީ ވަރުގަދަ ވޮލީބޯޅައިގެ ޓީމެއް ކަމަށާއި، އެ ޓީމު ވަރަށް އަވަހަށް އިޢުލާން ކުރައްވާނެ ކަމަށެވެ.

މީގެ ކުރިން ނިއު ރޭޑިއަންޓާއި ވިޗެންޒާއަށްވެސް ކުޅެފައިވާ އިއްލަ އޭރު ހިމެނިފައިވަނީ ރާއްޖޭގައި އުފެދުނު އެންމެ މޮޅު ލިބަރޯ ކުޅުންތެރިންގެ ތެރޭގައެވެ. ސްކޫލުތަކުގެ މެދުގައި ވޮލީބޯޅައިގެ ފޯރި ގަދަވެގެންދިޔައިރު، އީޕީއެސް ސްކޫލުން ވޮލީބޯޅައިގެ ތަށި މިލްކުރިކުރި ޓީމުގެ ލިބަރޯއަކީވެސް އިއްލައެވެ.

އިއްލަ ވިދާޅުވީ ވޮލީބޯޅަ އަކީ އިންޑޯ ކުޅިވަރަކަށްވާއިރު، ވޮލީބޯޅަ މުބާރާތްތަކާއި ވޮލީގެ ގިނަކަންކަން ކުރަމުން ދަނީ މާލޭގައި ކަމަށާއި، އެކަން ބަދަލުކޮށް މުޅި ރާއްޖެއަށް ވޮލީބޯޅަ ފަތުރާލައި، ވޮލީބޯޅައިގެ ޙަޤީޤީ ފެންވަރު މުޅި ރާއްޖެ ހިމެނޭނެ ގޮތަށް އޭނާގެ ޓީމުން ނެރެދޭނެ ކަމަށެވެ.

އެންއެސްއޭ ވޮލީބޯޅަ ޕޫލުން ފެށިގެން ވޮލީބޯޅައިގެ ތެރޭގައި ހަރަކާތްތެރިވާ އިއްލައަކީ ވޮލީބޯޅައިގެ ރެފުރީއެއްގެ އިތުރުން ވޮލީބޯޅަ ކޯޗެކެވެ.

ބޮޑު މައްސަލަގަނޑެއްގެ ތެރޭގައި އަހަރަކަށް ވުރެން ގިނަ ދުވަސްވެފައިވާ ވީއޭއެމުގެ މައްސަލަ އެފްއައިވީބީން ހައްލުކޮށް، ވީއޭއެމުގެ އިންތިޚާބު އަންނަ މަހު ބޭއްވުމަށް ނިންމާފައިވާއިރު، ރަސްމީކޮށް އަދި އިތުރު ކެންޑިޑޭޓެއް ރައީސް ކަމަށް ކުރިމަތިލާނެކަން އިޢުލާން ކޮށްފައެއް ނުވެއެވެ.