ރާއްޖޭގެ ފަތުރުވެރިކަން ހަމައަކަށް އެޅި ރަނގަޅުވާނީ ޖުލައި މަހުގެ ތެރޭގައި ކަމަށް ޓުއަރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.

ރާއްޖެ ޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން މިނިސްޓަރ މައުސޫމް ވިދާޅުވީ ކޮވިޑާއި ގުޅިގެން ފަތުރުވެރިކަމަށް އައި ލޮޅުމާއެކު އަލުން ދާއިރާ ހުޅުވާލިނަމަވެސް، ފަތުރުވެރިން އަންނަ އަދަދާއި ދޭތެރޭގައި ހިތްހަމަ ޖެހިވަޑައިނުގަންނަވާ ކަމަށެވެ. ފަތުރުވެރިން އައިސް ބެޑްކެޕޭސިޓީ ފުރުނު ނަމަވެސް ކެޕޭސިޓީގެ މައްސަލަ އެބަހުރި ކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ ފަތުރުވެރިކަން ހަމައަކަށް އެޅުވޭނެ ކަމަށް މިބަލީ އެކި އެންގަލްތަކުން އެކަން ވެގެން ކަމަށާއި، ރަޝިއާ މާކެޓުން އާންމު ހާލަތައްވުރެ މަތީގައި އޮތް އިރު، އިންޑިއާ މާކެޓް ވެސް އޮތީ ހަމަ އެގޮތަކަށް ކަމަށެވެ. އަދި ބައެއް ލަގްޒަރީ ރިސޯޓްތައް އާންމު ހާލަތަށްވުރެ މާ މަތީގައި އޮތް އިރު، ދުވަހަކުވެސް ނުހޯދާހާ ފައިދާ މިދިޔަ ޑިސެމްބަރުގައި ހޯދާފައިވާ ކަމަށެވެ.

އެހެންނަމަވެސް ސަފާރީ ސެކްޓަރ އަކީ ބޮޑު އިންވެސްޓްމަންޓްތަކެއް އަދި ނުލާހިކު ބޮޑު ހަރަދެއް ހިނގާކަމެއް ކަމަށެވެ. ނަމަވެސް ހުރިހާ ސަފާރީތަކަށް ބޭނުންވާ އޮކިއުޕެންސީއެއް ނުލިބޭ ކަމަށާއި، މި ހާލަތުގައި ސަފާރީއަކުން މީހަކު ޕޮޒިޓިވްވެއްޖެ ނަމަ މުޅި ސަފާރީ ކަރަންޓީންކުރަން ޖެހޭ ކަމަށެވެ. އަދި މުޅި އާމްދަނީއަށް ގެއްލުންވެ, އަންނަން ތިބޭ ފަތުރުވެރިން އެހެންދިމާލަކަށް ޑައިވަރޓް ކުރަން ޖެހޭ ކަމަށެވެ.

މީގެ އިތުރުން ވެލާނާ އިންޓަރނޭޝަނަލް އެއަރޕޯޓް ބޮޑުކުރުމަށް އައި ޕްލޭނާ އެއްގޮތަކަށް މަސައްކަތް ނުދާ ކަމަށާއި، އެ މަސައްކަތް ތަންކޮޅެއް ފަހަތުގައި އުޅޭ ކަމަށެވެ. އަދި މި ދުވަސްވަރަކީ ސޯޝަލް ޑިސްޓެންސިންގ ބަހައްޓަން ޖެހޭ ދުވަސްވަރެއް ކަމުން، އެއަރޕޯޓުގައި ވެސް ތާށިކަމެއް އެބަހުރި ކަމަށް މިނިސްޓަރ ވިދާޅުވިއެވެ. ނަމަވެސް އެއަރޕޯޓް ޓީމުން އެކަމަށް ވެސް ހައްލު ގެންނަން މަސައްކަތް ކުރައްވަމުން ގެންދަވާ ކަމަށް މިނިސްޓަރ ފާހަގަކުރެއްވިއެވެ.

ރާއްޖޭގެ ފަތުރުވެރިކަމުގެ ބޮޑެތި މާކެޓްތައް އަދިވެސް ބަންދުވެފައިވާއިރު، ކޮވިޑްގެ ހާލަތުގައި ރާއްޖޭގެ ފަތުރުވެރިކަމަށް އައު މާކެޓުތައް ތައާރަފްވަމުންދާކަން އިންޑަސްޓްރީގެ އިސް ފަރާތްތަކުން ފާހަގަ ކުރެއެވެ.  އެހެންނަމަވެސް ފަތުރުވެރިކަން އެއްކޮށް ރިކަވަރ ވާނީ ޔޫރަޕުގެ މާކެޓްތައް ހުޅުވިގެން ކަމަށާއި، އަންނަ އަހަރު ފެށިގެންދާނީ ރާއްޖޭގެ ޓޫރިޒަމް ކޮވިޑް-19ގެ ކުރިން އޮތް ހާލަތުގައި އޮވެގެންކަމުގެ އުންމީދު އެބަ އޮތްކަމަށް ދާއިރާގެ ތަޖްރިބާކާރުން ބުނެއެވެ.

ކޮވިޑް-19ގެ ސަބަބުން ރާއްޖޭގެ ބޯޑަރު ބަންދުކުރުމާއިއެކު ފަތުރުވެރިކަން ހުއްޓިގެން ދިޔަނަމަވެސް ފާއިތުވި އަހަރުގެ ޖުލައި 15ގައި ބޯޑަރު ހުޅުވާލުމާއިއެކު ރާއްޖެ އަންނަ ފަތުރުވެރިންގެ އަދަދު ދަނީ އެއްދުވަހުން އަނެއް ދުވަހަށް އިތުރުވަމުންނެވެ. އެގޮތުން 2020 ވަނަ އަހަރު ނިމުނުއިރު ރާއްޖެއަށް 555,494 ފަތުރުވެރިން އައިސްފައިވާއިރު، މިއަހަރުގެ މިހާތަނަށް ދެލައްކައަށްވުރެ ގިނަ ފަތުރުވެރިން ވަނީ އައިސްފައެވެ