ރާއްޖޭގެ ފަތުރުވެރިކަން މިހާރު އޮތް ހާލަތުން ކޮޅަށް ޖެހިއްޖެކަމަށް ގަބޫލުކުރައްވާތީ މުވައްޒަފުންގެ ވަޒީފާ އިއާދަވުމުން ކަމަށް ޓުއަރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން މިނިސްޓަރ މައުސޫމް ވިދާޅުވީ މިދަނޑިވަޅުގައި ހައިރާންވާކަހަލަ ކަންތައްތަކެއް ފެނިގެން ހިނގައްޖެ ކަމަށެވެ. އަދި ފަތުރުވެރިކަން އަރައިގަނެވޭނޭ ބުނާ ބަހުގެ މާނައަށް ބަލާ އިރު، ކުރިން ހުރި އަދަދަށް މީހުން އައުންތޯ ނުވަތަ ހުރިހާ މުވައްޒަފުންނަށް ވަޒީފާ ލިބުންތޯ މިއީ އުފައްދަން ޖެހޭ ސުވާލެއް ކަމަށެވެ. އަދި ރާއްޖޭގެ ފަތުރުވެރިކަން މިހާރު އޮތް ހާލަތުން އަރައިގަނެވުނުކަމަށް ބެލެވޭނީ ހުރިހާ މުވައްޒަފުން ވަޒީފާއަށް ނުކުތީމަ އަދި ބަންދުކޮށްފައި ހުރި ހުރިހާތަނެއް ހުޅުވުމުން ކަމަށް މިނިސްޓަރ ވިދާޅުވިއެވެ.
މުސާރަ އުނިކޮށްފައި ހުރި މުވައްޒަފުންނަށް މުސާރަ ލިބުނީމަ. އެމީހުންނަށް އިތުރަށް ޓިޕްސް ލިބެން ފެށީމަ. މި ހުރިހާ ކަމެއްވާން އަދި ދުވަސްކޮޅެއް ނަގާނެ. އެހެންނަމަވެސް ފަތުރުވެރިން އަންނަ މާކެޓްތަކަށް ބަލާ އިރު، ބައެއް މާކެޓްތަކުން މިހާރު 2019 ފަހަނައަޅައި ހިނގައްޖެ. އެ މުގުރާލެވިއްޖެ. އަނެއްބައި މާކެޓްތައް ނުފަށާ. ހާއްސަކޮށް މެދުއިރުމަތީގެ މާކެޓްތައް ނުފަށާ. މިހާރު 37 އިންސައްތަ ވަރު މިއުޅެނީ 2019 ވަނަ އަހަރާ އަޅާ ބަލާއިރު ދަށުގައި. އެހެންނަމަވެސް ހުރިހާ މާކެޓްތައް ހުޅުވުމުން އަޅުގަނޑުމެންނަށް ޔަގީންވާނެ ފުލްކޮށް ކުރީގެ އަދަދަށް އައީކަން،ޓުއަރިޒަމް މިނިސްޓަރ ޑރ. އަބްދުﷲ މައުސޫމް
ރާއްޖޭގެ ޓުއަރިސްޓް ބެޑް ކެޕޭސިޓީ 95 އިންސައްތައިގައި އޮޕަރޭޓް ކުރަމުންދާކަން ފާހަގަ ކުރައްވާ މިނިސްޓަރ ވިދާޅުވީ ކުރީގައި ވަޒީފާގައި އުޅުނު 95 އިންސައްތަ މީހުން ވަޒީފާއެއް ހިނގައްޖެތޯ ބަލަން ޖެހޭ ކަމަށެވެ. ނަމަވެސް ހުރިހާ އެންމެން ނުދާ ކަމަށާއި، މިކަމާއި ގުޅިގެން ރިސޯޓް މެނޭޖްމަންޓްތަކާއި ވާހަކަ ދައްކަމުން ގެންދަވާ ކަމަށެވެ.
މިނިސްޓަރ ވިދާޅުވީ މުވައްޒަފުންގެ އެއްވެސް ކަހަލަ ޝަކުވާއެއް އަދި ހިޔާލެއް ހުށަހަޅަން ބޭނުންވާ ނަމަ އެ ފުރުސަތު ހުޅުވާލެވިފައިވާ ކަމަށެވެ. އަދި ރިސޯޓްތަކުގައި މިހާރު މަސައްކަތް ކުރާ މުވައްޒަފުން ވެސް ކަމެއް ގޯސްކޮށް ހިނގާނަމަ އެ މައުލޫމާތު ހިއްސާ ކުރެއްވުމަށް އެދިވަޑައިގެންނެވިއެވެ. ޓުއަރިޒަމް މިނިސްޓްރީން ވަނީ މިކަމަށް އީމެއިލް އެޑްރެހަކާއި ފޯނު ނަންބައެއް ގާއިމްކޮށްފައެވެ.
