ހިއުމަން ރައިޓް ކޮމިޝަން އޮފް ދަ މޯލްޑިވްސް، އެޗްއާރްސީއެމްގެ ފަސްވަނަ ދައުރާ ހަވާލުވިއިރު ހުރި ހުރިހާ މައްސަލަތަކެެއް އެއް މަސްދުވަހުގެ ތެރޭގައި ބަލައި ނިންމާފައިވާކަމަށް އެ ކޮމިޝަނު ހާމަކޮށްފިއެވެ.

އެޗްއާރްސީއެމުން ވަނީ އެ އިދާރާގެ 2020 ވަނަ އަހަރުގެ މަސައްކަތްތަކުގެ ތަފްޞީލު ހާމަކޮށް އަހަރީ އާންމު ރިޕޯޓު ނޫސްވެރިންނާ ހިއްސާކޮށްފައެވެ. މި ރިޕޯޓްގައި ހުރި ކަންކަން ފާހަގަކޮށް އެޗްއާރްސީއެމްގެ ފަސް ވަނަ ދައުރުގެ 4 މެމްބަރުން ބައިވެރިވި ނޫސްވެރިންގެ ބައްދަލުވުމުގައި ވަނީ ވޭތުވެ ދިޔަ އަހަރުގެ ސެޕްޓެމްބަރ މަހުގެ 8 ވަނަ ދުވަހު ކޮމިޝަނާ ހަވާލުވުމަށް ފަހު ގިނަ މަސައްކަތްތަކެއް ކޮށްފައިވާކަމަށެވެ. އެގޮތުން ކޭސް މެނޭޖްމަންޓް ސިސްޓަމް ވަރުގަދަކުރުމާއި، މައްސަލަ ބެލުމުގެ ކަންކަން ހަރުދަނާކުރުމަށް މުއައްސަސާތަކާ ގުޅިގެން މަސައްކަތްކޮށްފައިވާކަން މެމްބަރުން ފާހަގަކުރިއެވެ. އެޗްއާރްސީއެމްގެ މެމްބަރުން ވަނީ ފަސްވަނަ ދައުރާއި މެމްބަރުން ހަވާލުވިއިރު ހުރި ހުރިހާ މައްސަލަތަކެެއް ސެޕްޓެމްބަރު މަސް ނިމުމުގެ ކުރިން އެޓެންޑްވެ ބަލާފައިވާކަމަށް ބުނެފައެވެ.

2020 ވަނަ އަހަރު އައު ކޮމިޝަނުން އަމިއްލައަށް އިސްނަގައިގެން 157 މައްސަލައަކާއި، ކޮމިޝަނަށް ހުށަހަޅައިގެން 510 މައްސަލައެއް ބަލާފައިވާކަމަށް ވިދާޅުވިއެވެ. މިދިޔަ އަހަރު އޭގެ ކުރީ އަހަރާއި އަޅާބަލާއިރު، ކުޑަކުދިންނާ ގުޅޭ މައްސަލަތަކާއި، ވަޒީފާގެ މާޙައުލުގައި އިންސާނީ ހައްޤުތައް ގެއްލުމުގެ މައްސަލަތަކުގެ އިތުރުން ބިދޭސީންގެ އަސާސީ ހައްޤުތައް ގެއްލިގެން ބަލާފައިވާ މައްސަލަތައް ވަރަށް ބޮޑަށް އިތުރުވެފައިވާކަން 2020 ވަނަ އަހަރުގެ އަހަރީ ރިޕޯޓުން ވަނީ ހާމަވެފައެވެ. މީގެ ތެރެއިން ވެސް ބިދޭސީންނާ ދެކޮޅަށް ހިންގޭ ލާއިންސާނީ އަމަލުތައް އިތުރުވެފައިވާކަން ފާހަގަކޮށް އެޗްއާރްސީއެމުން ވަނީ މިކަންކަން ހުއްޓުވުމަށް ނެޝަނަލް އިންކުއަރީއެއް މިއަހަރު ފަށަން ނިންމާފައިވާކަން ހާމަކޮށްފައެވެ.

މީގެ އިތުރުން ރާއްޖޭގައި އިންސާނީ ހައްޤުތަކުގެ ކަންކަން އިތުރަށް ހަރުދަނާކޮށް، އާންމުން މި ހައްޤުތަކަށް އިތުރަށް އަހުލުވެރިކުރުވުމަށް އިންޓަގްރޭޓެޑް ހިއުމަން ރައިޓްސް ޕްރޮގްރާމެއް ފެށުމަށް އެޗްއާރްސީއެމުން ދަނީ ތައްޔާރުވަމުންނެވެ. ކޮމިއުނިޓީ އެންގޭޖްމަންޓް ސްޓްރެޓަޖީގެ ދަށުން ހިންގާ މި ޕްރޮގްރާމްގައި ހުރިހާ އުމުރުފުރާއެއްގެ އެކި ގްރޫޕްތަކަށް ނިސްބަތްވާ، މުޖުތަމަޢުގެ އެންމެން ޝާމިލުކުރުމަށް އަމާޒު ހިފާފައިވާކަމަށް އެ ކޮމިޝަނުން ހާމަކުރެއެވެ.