އެމެރިކާގެ އޮހިއޯ ސްޓޭޓްގައި އޮޅުމަކުން ކޮވިޑް ވެކްސިންގެ 2 ޝޮޓް ދިން މީހަކު އެނދުމަތިކުރަން ޖެހިއްޖެއެވެ.

އުމުރުން 91 އަހަރުގެ މި މީހާއަށް އެއް ދުވަހާ ދެފަހަރަށް ކޮވިޑް ވެކްސިން ޖަހާފައިވާއިރު، އޭނާ އެންމެ ފުރަތަމަ ވެކްސިން ޑޯޒް ޖަހާފައިވަނީ މިދިޔަ ޖެނުއަރީ މަހުގެ 22 ވަނަ ދުވަހުއެވެ. ނަމަވެސް ވެކްސިން ޖެހުމުގެ ސަބަބުން ވަރުބަލިވެ، ބޯއަނބުރައިގަނެގެން އޭނާ ވެއްޓުމާއެކު، އޭނާ ވަގުތުން ހޮސްޕިޓަލަށް ގެންދެވުނެވެ. ރިޕޯޓުތައް ބުނާގޮތުން އޭނާ ޖަހާފައިވަނީ މޮޑަރނާ ވެކްސިނެވެ. މި ވެކްސިންގެ ދެ ޑޯޒްގެ ދެމެދުގައި މަދުވެގެން 21 ދުވަސް ހުންނަންޖެހޭކަމަށް ރިޕޯޓުތައް ބުނެއެވެ.

ރިޕޯޓުތައް ބުނާގޮތުން އޭނާއަށް ކޮވިޑް ވެކްސިންގެ ދެވަނަ ޑޯޒް ދިނުމަށް ހަމަޖެހިފައި އޮތީ ފެބްރުއަރީ މަހުގެ 25 ވަނަ ދުވަހުއެވެ. ނަމަވެސް ހޮސްޕިޓަލުން އެރި އިދާރީ އޮޅުމެއްގެ ސަބަބުން އޭނާ ފުރަތަމަ ވެކްސިން ޖެހިތާ 4 ގަޑިއިރު ނުވަނީސް އަނެއްކާވެސް ވަނީ ކޮވިޑް ވެކްސިންގެ ދެވަނަ ޑޯޒް ދީފައެވެ.

ދެވަނަ ޑޯޒް ޖެހުމާއެކު، އޭނާއަށް ނޭވާލަން އުނދަގޫވެ ސިއްޙީ މައްސަލަތަކެއް ކުރިމަތިވުމާއެކު، ވަގުތުން އެޑްމިޓްކޮށްގެން ފަރުވާދޭން ޖެހިފައިވެއެވެ. އަދި ޙާލު ބޮޑުވެގެން ވަކި ހިސާބަކުން ޑޮކްޓަރުންވެސް އުއްމީދު ކަނޑާލިކަމަށް އޭނާގެ ދަރިފުޅާ ޙަވާލާދީ ބޭރުގެ މީޑިއާތަކުން ރިޕޯޓް ކޮށްފައިވެއެވެ. ނަމަވެސް މިހާރު އޭނާގެ ޙާލަތު ކުޑަކޮށް ރަނގަޅުވަމުން އަންނަކަމަށް ރިޕޯޓުތައް ބުނެއެވެ.

މިކަން ހިނގާ ދިޔަ ގޮތް މިހާރު އެ ސްޓޭޓުގެ ކަމާގުޅޭ އިދާރާތަކުން ދަނީ ތަހުޤީޤު ކުރަމުންނެވެ.