ރާއްޖޭގެ ހުރިހާ ރައްޔިތުންނަށް ބޯހިޔާވަހިކަން ހޯދައިދޭންޖެހޭ ވާހަކައަކީ އެމަނިކުފާނުގެ މުޅި ސިޔާސީ ހަޔާތުގައިވެސް ދައްކަވަމުން ގެންދަވާ ވާހަކައެއް ކަމަށާއި އަދިވެސް ހުއްޓާނުލާ އެވާހަކަ ދައްކަވާނެކަމަށް އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ކުރިޔަށް އޮތް ކައުންސިލް އިންތިޚާބުގެ ކެމްޕެއިން ރަސްމީކޮށް ފެށުމަށް ބޭއްވި ރަސްމިއްޔާތުގައި ވާހަކަދައްކަވަމުން ރައީސް ނަޝީދު ވިދާޅުވީ ރާއްޖޭގެ ރައްޔިތުންނަށް ބޯހިޔާވަހިކަން ކަށަވަރުވާން ޖެހޭކަމަށެވެ. އަދި އެމްޑީޕީން ސަރުކާރުގައި ދެމި ތިބޭނަމަ އަދި ސިޔާސީ މަސައްކަތުގައި ދެމިތިބޭނަމަ އެއީ ރާއްޖޭގެ ރައްޔިތުންނަށް ދަރާފައިވާ ބޮޑު ދަރަންޏެއް ކަމަށް ނަޝީދު ވިދާޅުވިއެވެ.
އެންމެ ފަހުން ބޭއްވި އިންތިޚާބުގެ ކެމްޕެއިންގައިވެސް މާލޭގެ ރައްޔިތުން ކައިރީ އެމްޑީޕީން ގޯތި ކަނޑާފައި ދޭނެ ވާހަކަ ބުނެފައިވާނެ ކަމަށް ނަޝީދު ވިދާޅުވިއެވެ.
އަޅުގަނޑުމެން ސަރުކާރުގައި ދެމި ތިބޭނަމަ އަޅުގަނޑުމެން ސިޔާސީ މަސައްކަތުގައި ދެމިތިބޭނަމަ އެއީ އަޅުގަނޑުމެން ރާއްޖޭގެ ރައްޔިތުންނަށް ދަރާފައިވާ ބޮޑު ބޮޑު ބޮޑު ދަރަންޏެއް. އެކަން ގަބޫލުކުރަން ޖެހޭނެ. ޚާއްސަކޮށް މިމާލޭގައި ދިރިއުޅޭ ނިކަމެތި ރައްޔިތުންނަށް. އެންމެފަހުން ނިކުތް އިންތިޚާބުގައިވެސް އަޅުގަނޑު މެން ބުނިން ގޯތި ކަނޑާފައި ދޭނަމޭ. އޭނާ އެބައަހާ އަޅުގަނޑު ގާތުގައި ކޮބާހޭ އެބިންކޮޅު. އޭނާ އެބައަހާ ކޮބާހޭ ތިމަންނަގެ ފްލެޓް، ތިމަންނަގެ ބޯހިޔާވަހިކަން. އަޅުގަނޑުމެންގެ ސިޔާސީ ހަޔާތް ބިނާވެފައި އިންނާނީވެސް ކުރިޔަށް ގެންދަނީވެސް އެމުހިންމު މަސައްކަތް ހަގީގަތަކަށް ހެދުމަށް. އަޅުގަނޑު އިތުބާރު ކުރަން ރައީސް އަށް. އަޅުގަނޑަށް އެނގޭ ރައީސް އާ އެކީގައި މިކަން ކުރެވޭނެކަން. އަޅުގަނޑަށްވެސް އެނގޭ އަޅުގަނޑުމެންނަށް މިކަން ކުރެވޭނެކަން. އަޅުގަނޑުމެން މިތިބީ 2021 ވަނަ އަހަރުގައިކަން އެކަންވެސް ސާފު.އެމްޑީޕީގެ ރައީސް ، ރައީސް މުހައްމަދު ނަޝީދު
ބޯހިޔާވަހިކަމުގެ ވާހަކަ ދައްކަވަމުން ރައީސް ނަޝީދު އިތުރަށް ވިދާޅުވީ ތަކުރާރުކޮށްވެސް ވިދާޅުވާން އޮތް ވާހަކައަކީ މިހާތަނަށްވެސް ރައްޔިތުންނަށް ބޯހިޔާވަހިކަން ލިބިފައިވަނީ އެމްޑީޕީގެ ނިޒާމުގެ ތެރެއިން ކޮންޓްރެކްޓް ކުރެވިގެން އަޅާފައިވާ ފްލެޓްތަކުން ކަމުގައެވެ. ރައީސް ޔާމީންގެ ސަރުކާރުގެ 5 އަހަރު ހޭދަކުރެއްވީ ފްލެޓް އެޅުމުގައި ނޫންކަމަށް ވިދާޅުވެ ނަޝީދު ވިދާޅުވީ ޔާމީން ސަރުކާރުގައި މީހުން ވައްދާފައިވާ ފްލެޓްތަކަކީ އެމްޑީޕީން އުފެއްދި ކޮންޓްރެކްޓްތަކެއްގައި އަޅާފައިވާ ފްލެޓްތަކެއް ކަމަށެވެ.
އެމްޑީޕީން ތިބޭފުޅުންގެ އުންމީދުތައް ބޮލާލާ ޖަހައެއް ނުލާނެ. މާލޭ ރައްޔިތުންނަށް އަދި މުޅި ރާއްޖޭގެ ހުރިހާ ރައްޔިތުންނަށް އެއީ ކުޅުދުއްފުއްޓަކަސް ފޯއްމުލަކަސް އައްޑު އަކަސް ބައިބޯ ކޮންމެ ރަށަކަށްވެސް ބޯހިޔާވަހިކަން މިދަނީ އިންތިހާއަށް މައްސަލައަކަށް ވެގެން. އެމައްސަލަ ގުނަވެގެން ގުނަވެގެން އައި ދެން ނެރުނު މައްސަލަ މާލެއިން މިއަދު މިފެންނަނީ. ރާއްޖޭގެ ހުރިހާ ރަށެއް އެހެން ވާކަށް އަޅުގަނޑަށް ކަށަވަރު އަޅުގަނޑުމެން ދުލެއް ނުކުރާނެ.އެމްޑީޕީގެ ރައީސް ، ރައީސް މުހައްމަދު ނަޝީދު
ނަޝީދު ވިދާޅުވީ މިހާރު ކައުންސިލްތަކުގެ ޤާނޫނަށް ގެނެސްފައިވާ ބަދަލުތަކާއެކު ކައުންސިލްތަކަށް ފްލެޓް އެޅުމުގެ ޖާގަ ލިބިދޭ ކަމަށެވެ. ބިން މިލްކުކުރުމާއި ބިމުން ވިޔަފާރި ކުރުމުގެ ބާރު ކައުންސިލްތަކަށް މިހާރު ޤާނޫނުން ލިބިދޭކަމަށް ނަޝީދު ވިދާޅުވިއެވެ. ކައުންސިލްތަކަށް ޤާނޫނީ ގޮތުން ނުދޭ އެއްވެސް ބާރެއް ނެތްކަމަށާއި އެހެންކަމުން މިހާރު ދެއްކޭނެ އެއްވެސް ހުއްޖަތެއް ނޯންނާނެކަމަށް ނަޝީދު ވިދާޅުވިއެވެ.
ކުރިޔަށް އޮތް އިންތިޚާބުގައި އެމްޑީޕީގެ ފަރާތުން ކައުންސިލްތަކުގެ މޭޔަރުންނަށް ކުރިމަތިލައްވާފައިވާ ފަރާތްތަކުގައި ފްލެޓް އެޅުމުގެ ވިސްނުން ހުންނާނެކަމަށް ނަޝީދު ވިދާޅުވިއެވެ. އަދި މާލޭގެ ރައްޔިތުންނަށް ބޯހިޔާވަހިކަން އެމްޑީޕީން ހޯދައިދޭނެކަމަށް ވިދާޅުވެ ނަޝީދު ވިދާޅުވީ މާލޭގެ ރައްޔިތުން އެއުންމީދު ގެއްލުވާލައިގެން ނުވާނެކަމަށެވެ.
