ރާއްޖޭގައި ޓްރާންސްޝިޕްމަންޓް ޕޯޓެއް ތަރައްގީނުކުރެވި މިހާރު މާ ލަސްވެއްޖެ ކަމަށް އިކޮނޮމިކް މިނިސްޓަރ ފައްޔާޒް އިސްމާއިލް ވިދާޅުވެއްޖެއެވެ.
މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)ގެ ރަށްވެހިފަތިސް ކެމްޕެއިން ޖަލްސާގައި ވާހަކަދައްކަވަމުން މިނިސްޓަރ ފައްޔާޒު ވަނީ ރާއްޖޭގައި ޓްރާންސްޝިޕްމަންޓް ޕޯޓެއް ތަރައްގީކުރުމަށް ދިރާސާތައް ހަދައި ނިމިފައިވާ ކަމަށެވެ. އަދި ޕޯޓް ތަރައްގީކުރުމަށް މާރޗް ނޫނީ އޭޕްރިލް މަހު އެކްސްޕްރެޝަން އޮފް އިންޓްރަސްޓަށް ހުޅުވާލެވިގެންދާނެކަމަށް މިނިސްޓަރ ވިދާޅުވިއެވެ.
މީގެ އިތުރުން މިޖަލްސާގައި ވާހަކަދައްކަވަމުން މިނިސްޓަރ ވަނީ ހއ. އަތޮޅުގައި ބޯޓު ބަނުމުގެ މަސައްކަތްކުރުމަށް ވަކީ ޚާއްސަތަނެއް ގާއިމުކުރުމުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އާއި ގުޅިގެން ކުރިއަށްގެންދާ ކަމަށް ވިދާޅުވެފައެވެ.
މިފްކޯގެ ފެލިވަރު ތަރައްގީކުރުމުގެ ޕްރޮޖެކްޓްގެ މަސައްކަތް ވަރަށް ބާރަށް ކުރިއަށްދާ ކަމަށް ފާހަގަކުރައްވައި ވަރަށް އަވަހަށް ޓެންޑަރިންގ މަރުހަލާ ފެށިގެންދާނެ ކަމަށް މިނިސްޓަރ ވަނީ ވިދާޅުވެފައެވެ. އަދި ހަނިމާދޫގައި އެއަރޕޯޓް ތަރައްގީކުރުމުގެ މަސައްކަތް ހަލުވި މިނެއްގައި ކުރިއަށްގެންގޮސް، ހއ ގެ ފަތުރުވެރިކަން ތަރައްގީކުރުމަށް ރިސޯޓްތައް ތަރައްގީކޮށް އެނދު އިތުރުކުރުމުގެ މަސައްކަތް ޓޫރިޒަމް މިނިސްޓްރީއާއި ގުޅިގެން ކުރިއަށްދާ ކަމަށް މިނިސްޓަރ ވިދާޅުވިއެވެ.
