ރާއްޖެ އަންނަ ފަތުރުވެރިންނަށް ހިދުމަތްދޭ 600 ފެސިލިޓީ އޮޕަރޭޓްކުރަން ފަށާފައިވާކަމަށް ޓޫރިޒަމް މިނިސްޓްރީން މައުލޫމާތު ދީފިއެވެ.

އެ މިނިސްޓްރީގެ ތަފާސްހިސާބުތައް ދައްކާގޮތުން 142 ރިސޯޓެއް މިހާރު އޮޕަރޭޓްކުރަން ފަށާފައިވާއިރު، ރިސޯޓްތަކުން 32،930 އެނދު މިހާރު ފަތުރުވެރިންނަށް ހިދުމަތްދިނުމަށް އޮޕަރޭޓްކުރެއެވެ. މީގެ އިތުރުން 11 ހޮޓަލުގައި 1،458 އެނދު، 134 ސަފާރީއެއްގައި 2,588 އެނދު އަދި 313 ގެސްޓް ހައުސްގައި 5،930 އެނދު ދަނީ އޮޕަރޭޓްކުރަމުންނެވެ. ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން ފަތުރުވެރިންނަށް ހިދުމަތް ދިނުމަށް މިހާރު ޖުމްލަ 42،906 އެނދު ދަނީ އޮޕަރޭޓްކުރަމުންނެވެ.

ކޮވިޑް-19 ގެ ސަބަބުން ގެސްޓް ހައުސްތައް ބަންދުކުރުމަށް ފަހު ފާއިތުވި އަހަރުގެ އޮކްޓޫބަރ މަހުގެ 15 ވަނަ ދުވަހު ގެސްޓް ހައުސްތައް ހުޅުވާލުމުގެ ހުއްދަ ދިނުމާއިއެކު 2021 ވަނަ އަހަރުގެ ޖެނުއަރީ މަހުގެ 25 ވަނަ ދުވަހުގެ ނިޔަލަށް 15 އަތޮޅެއްގެ 47 ރަށެއްގައި ގެސްޓްހައުސްތައް އޮޕަރޭޓްކުރަން ވަނީ ފަށާފައެއެވެ. އެއީ ހއ. އަތޮޅުގެ ދެ ރަށެއްގައި 6 ގެސްޓް ހައުސް، ހދ. އަތޮޅުގެ އެއް ރަށުގައި 2 ގެސްޓް ހައުސް، ށ. އަތޮޅުގައި 1 ގެސްޓް ހައުސް، ނ. އަތޮޅުގައި 1 ގެސްޓް ހައުސް، ބ. އަތޮޅުގެ 5 ރަށެއްގައި 12 ގެސްޓް ހައުސް، ކ. އަތޮޅުގެ 9 ރަށެއްގައި 138 ގެސްޓް ހައުސް، އއ. އަތޮޅުގެ 7 ރަށެއްގައި 71 ގެސްޓް ހައުސް، އދ. އަތޮޅުގެ 8 ރަށެއްގައި 37 ގެސްޓް ހައުސް، ވ. އަތޮޅުގެ 4 ރަށެއްގައި 24 ގެސްޓް ހައުސް، ފ. އަތޮޅުގައި އެއް ގެސްޓް ހައުސް، ތ. އަތޮޅުގައި 1 ގެސްޓް ހައުސް، ލ. އަތޮޅުގެ އެއް ރަށުގައި 2 ގެސްޓް ހައުސް، ގދ. އަތޮޅުގެ 2 ރަށެއްގައި 2 ގެސްޓް ހައުސް އަދި ޏ. އަތޮޅުގައި 9 ގެސްޓް ހައުސްގެ އިތުރުން ސ. އަތޮޅުގެ ތިން ރަށެއްގައި 6 ގެސްޓް ހައުސްއެވެ.

ބަލިމަޑުކަމުގެ ސަބަބުން ފާއިތުވި އަހަރުގެ މާރޗް 27 ވަނަ ދުވަހު ރާއްޖޭގެ ބޯޑަރު ބަންދުކުރުމަށްފަހު އެއަހަރުގެ ޖުލައި 15 ވަނަ ދުވަހު ބޯޑަރު އަލުން ހުޅުވާލިއިރު، ފަތުރުވެރިންނަށް ހިދުމަތްދިނުމުގެ ހުއްދަ ލިބިގެންދިޔައީ ހަމަ އެކަނި ރިސޯޓްތަކަށާއި ސަފާރީތަކަށެވެ. އަތޮޅުތެރޭގެ ރަށްތަކުގެ ގެސްޓް ހައުސްތައް ހުޅުވުމުގެ ފުރުސަތު 2020 ވަނަ އަހަރުގެ އޮކްޓޫބަރ 15 ވަނަ ދުވަހު ލިބިގެންދިޔަ އިރު، މާލެ ސަރަހައްދުގެ ގެސްޓް ހައުސްތައް ހުޅުވުމުގެ ފުރުސަތު ލިބުނީ ޑިސެމްބަރ 14 ވަނަ ދުވަހުއެވެ.