ރައްޔިތުންގެ ކަންބޮޑުވުންތައް އަޑުއެހުމަށް "ޖަޒީރާ ސައްލާ" ނަމުގައި ސަރުކާރުން ކުރިއަށްގެންދާ ޚާއްސަ މަޝްވަރާ ބައްދަލުވުމުގެ ފުރަތަމަ މައުޟޫއަށް ޚިޔާލު ހުށަހެޅުމުގެ ފުރުސަތު ހުޅުވާލައިފިއެވެ.

މި ޙަރަކާތަކީ ސަރުކާރުގެ ސިޔާސަތުތައް ތަންފީޒުކުރާ ފަރާތްތަކަށް ރައްޔިތުންގެ ޚިޔާލާއި ކަންބޮޑުވުންތައް އަދި ޝުޢޫރުތައް ޙިއްޞާކުރުމަށް ފުރުޞަތުދިނުމުގެ ގޮތުން ބާއްވާ ޙަރަކާތެކެވެ. އެގޮތުން މި ޙަރަކާތާބެހޭ ތަފްސީލު ކުރިއަށް އޮތް ދުވަސްތަކުގައި ހާމަކުރާނެކަމަށް ސަރުކާރުން މީގެ ކުރިން ވަނީ ބުނެފައެވެ.

އެކަމާ ގުޅޭގޮތުން ހޯމަ ދުވަހު ސަރުކާރުގެ ރަސްމީ ޓްވިޓަރ އެކައުންޓުން ކުރި ޓްވީޓެއްގައި ބުނީ، ޖަޒީރާ ސައްލާގެ ފުރަތަމަ މަޝްވަރާ ބައްދަލުވުމަށް ޚިޔާލު ހުށަހެޅުމުގެ ފުރުސަތު ހުޅުވާލާފައިވާ ކަމަށެވެ. އަދި މިފަހަރުގެ މައުޟޫއަކީ "ކޮވިޑް އިޖާބައާ ގުޅޭ މަޝްވަރާތައް" ކަމަށްވެސް ސަރުކާރުން ހާމަ ކޮށްފައިވެއެވެ.

މި މަޢުޟޫއާއި ގުޅޭގޮތުން ކުރަން ބޭނުންވާ ސުވާލެއް އޮތްނަމަ، 27 ޖެނުވަރީ 2021 ވާ ބުދަ ދުވަހުގެ މެންދުރު ފަހު 2:30 ގެ ކުރިން ސުވާލު ކުރުމަށް ވަނީ އެދިފައެވެ. ޓްވިޓަރ މެދުވެރިކޮށް ސުވާލު ފޮނުވުމުގެ ފުރުސަތު ހުޅުވާލާފައިވާއިރު، އެކަމަށް ޚާއްސަ ހޭޝްޓެގް (JazeeraSalla#) ބޭނުން ކުރުމަށްވެސް ވަނީ އެދިފައެވެ.

މި މައުޟޫއަށް ރައްޔިތުން ކުރާ ސުވާލުތަކަށް ޖަވާބުދެއްވާނީ ރައީސުލްޖުމްހޫރިއްޔާގެ އޮފީހުގެ ތަރުޖަމާނު މުޙައްމަދު މަބްރޫކު އަޒީޒްގެ އިތުރުން، ހެލްތް އިމަރޖެންސީ އޮޕަރޭޝަންސް ސެންޓަރ (އެޗްއީއޯސީ) ގެ ތަރުޖަމާނު ޑރ ނަޒްލާ ރަފީޤެވެ.

މި ސަރުކާރުން ވެރިކަމަށް އައުމަށްފަހުވަނީ ރައްޔިތުންގެ ޚިޔާލު ހޯދުމަށް ތަފާތު އެކި ފަހަރު މަތިން ރައްޔިތުންނާ ބައްދަލުކޮށްފައެވެ. އެގޮތުން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙްވެރިކަމަށް ވަޑައިގެން ވަނީ "ޖަޒީރާ ހޮޅުއަށި" ނަމުގައި ރާއްޖޭގެ އެކި ޞަރަޙައްދުތަކުގައި މަޝްވަރާ ފޯރަމުތައް ބާއްވަން ފަށްޓަވާފައެވެ. މި ބައްދަލުވުންތަކުގައި ރައީސުލްޖުމްހޫރިއްޔާއާއި ސަރުކާރުގެ އިސްވެރިންގެ އިތުރުން އެކި މުއައްސަސާތައް ޒިންމާދާރުކުރުވުމަށްޓަކައި މުއައްސަސާތަކުގެ އިސްވެރިން ވެސް ވަނީ ބައިވެރިވެފައެވެ.

މީގެ އިތުރުން މުޖުތަމަޢުގައި ޒުވާނުންނަށް ކުރިމަތިވެފައިވާ ދަތިތަކާ ބެހޭގޮތުން މަޝްވަރާކުރުމަށް "ޒުވާނުންގެ ހޮޅުއަށީ"ގެ ނަމުގައިވެސް ޚާއްޞަ ހަރަކާތްތަކެއް ވަނީ ފަށާފައެވެ. ކޮވިޑް-19ގެ ސަބަބުން ބައްދަލުވުންތައް ބޭއްވުން ހުއްޓުމަކަށް އައުމުން މި ސިލްސިލާ މެދުކެނޑިފައިވާއިރު، އައު ނަމެއްގައި ރައްޔިތުންގެ ކަންބޮޑުވުންތައް އަޑުއެހުމަށް "ޖަޒީރާ ސައްލާ" ބާއްވަން ނިންމުމުން މިކަމަށް ތަޢުރީފްކޮށް ސޯޝަލް މީޑިއާގައި ދަނީ ޝުޢޫރު ފާޅުކުރަމުންނެވެ.