މެންޗެސްޓާ ސިޓީގެ ތަޖުރިބާކާރު ފޯވާޑް ސާޖިއޯ އަގުއޭރޯ ކޮވިޑް-19 އަށް ޕޮޒިޓިވްވެއްޖެއެވެ.

ކޮވިޑަށް ޕޮޒިޓިވްވިކަން އުމުރުން 32 އަހަރުގެ އަގުއޭރޯ ހާމަކޮށްފައިވަނީ ބުދަ ދުވަހުގެރޭ ކުރި ޓްވީޓަކުންނެވެ.

އަގުއޭރޯ ވައިރަހަށް ޕޮޒިޓިވްވިއިރު، މި މަހުގެ 10 ވަނަ ދުވަހުގެރޭ އިނގިރޭސި އެފްއޭ ކަޕުގެ ތިންވަނަ ބުރުގައި ދެވަނަ ޑިވިޝަނުގެ ބާމިންހަމް ސިޓީ އަތުން 3-0 ގެ ނަތީޖާއަކުން ސިޓީ މޮޅުވި މެޗުގެ ކުރިން ކޮވިޑަށް ޕޮޒިޓިވްވި މީހަކާ ކޮންޓެކްޓްވުމާ ގުޅިގެން، އެ ދުވަހުން ފެށިގެން އަގުއޭރޯ ހުރީ އެކަހެރިވެގެންނެވެ.

އެކަހެރިވެގެން ހުއްޓައި އަގުއޭރޯ ކޮވިޑަށް ޕޮޒިޓިވްވިއިރު، މީގެ ކުރިން ކޮވިޑާ ގުޅިގެން އޭނާއަށް ވަނީ ސިޓީން ކުޅުނު ތިން މެޗެއް ގެއްލިފައެވެ. އެހެންކަމުން ވައިރަހަށް ޕޮޒިޓިވްވުމާއެކު އޭނާއަށް އިތުރު މެޗުތަކެއް ގެއްލޭނެއެވެ.

ކޮވިޑުގެ އިތުރުން އަނިޔާގެ ސަބަބުންވެސް އަގުއޭރޯއަށް ވަނީ މި ސީޒަނުގައި ގިނަ މެޗުތަކެއް ގެއްލިފައެވެ. އެގޮތުން މި ސީޒަނުގައި މިހާތަނަށް އަގުއޭރޯ ސިޓީއަށް ކުޅެދީފައިވަނީ އެންމެ ފަސް މެޗެވެ. އަދި މި ސީޒަނުގެ ޕްރިމިއާ ލީގުގައި އަދި މިހާތަނަށް އަގުއޭރޯ ލަނޑެއް ޖަހާފައެއް ނުވެއެވެ.