ކުޅިވަރަށް އަމިއްލަ ފަރާތަކުން ކުރާ އެއްމެ ބޮޑު އިންވެސްޓްމެންޓަކަށް ވެގެންދާނީ އޮލިމްޕިކް ސައިޒުގެ ސްވިމިންގ ޕޫލް ކޮމްޕްލެކްސްއަށް ކުރެވިގެންދާ އިންވެސްޓްމެންޓް ކަމަށް ސްވިމިންގ އެސޯސިއޭޝަން އޮފް މޯލްޑިވްސްގެ ނައިބު ރައީސް އިސްމާޢީލް އަލީ ވިދާޅުވެއްޖެއެވެ.
ސަރުކާރުގެ ފުރަތަމަ 100 ދުވަހުގެ ވައުދުތަކުގެ ތެރޭގައި ހިމެނުނު ކުޅިވަރުގެ ވައުދުތަކުގެ ތެރެއިން ނުނިމި އޮތް ވައުދުތަކުގެ ތެރޭގައި ހިމެނޭ ސްވިމިންގ ޕޫލް ކޮމްޕްލެކްސް އަޅާ ސަރަހައްދަކީ ދުވާ ޓްރެކް ސަރަހައްދު ކައިރީގައި ކުރިންހުރި ކުނިގޮނޑު އޮތް ބިމެވެ. އޮލިމްޕިކް ސައިޒްގެ ސްވިމިންގ ޕޫލް ކޮމްޕްލެކްސް އަޅާނެ ބިން ލިބި، އެ ބިން ސާފުކުރުމުގެ މަސައްކަތް ފަށާފައިވަނީ މިދިޔަ އަހަރުގެ އޯގަސްޓް މަހުގެ ތެރޭގައެވެ. އަދި މިދިޔަ އަހަރުގެ ޑިސެމްބަރު މަހުގެ ތެރޭގައި އެ ބިމުގެ އަމަލީ މަސައްކަތް ފެށިއިރު، ފުރަތަމަ މަރުހަލާގެ މަސައްކަތް ހަވާލުކޮށްފައިވަނީ ރަޝީދު ކާޕެންޓަރީ އެންޑް ކޮންސްޓްރަކްޝަން (އާރްސީސީ) އާއެވެ.
ރާއްޖެޓީވީގެ "ކުޅިވަރު ފައިލް" ޕްރޮގްރާމްގައި ވާހަކަ ދައްކަމުން އިސްމާޢީލް ވިދާޅުވީ ސްވިމިންގ ޕޫލަކީ ވަރަށް ތަފާތު ކޮންސެޕްޓަކަށް ހެދިގެންދާނެ ތަނެއް ކަމަށާއި، ކުޅިވަރުގެ އެންމެ ޒަމާނީ ވަސީލަތާއެކު ހެދިގެންދާ މި އަގުބޮޑު ސްވިމިންގ ޕޫލުގެ އިންވެސްޓްމެންޓަކީ އަމިއްލަ ފަރާތެއްގެ ދީލަތި އެހީއެއް ކަމަށެވެ.
ގާތްގަނޑަކަށް 50 މިލިޔަން ރުފިޔާ ޚަރަދުވާނެ ކަމަށް ބެލެވޭ މި މަޝްރޫއު ނިމޭއިރު މުޅި އިމާރާތް ހުންނާނީ އެންމެ ޒަމާނީ ވަސީލަތުން ފުރިހަމަވެ، އެންމެ ބޮޑެތި މުބާރާތްތައް ބޭއްވޭނެ ފެންވަރަށް ކަމަށް އިސްމާޢީލް އަލީ ވިދާޅުވިއެވެ.
މި ފައިސާ އަކީ ހެޔޮ އެދޭ ފަރާތަކުން ދީފައިވާ ފައިސާއެއް. އަޅުގަނޑު ބުނާނީ މިއީ ކުޅިވަރަށް އަމިއްލަ ފަރާތަކުން ވެދޭ އެންމެ ބޮޑު ހޭދަ ކަމަށް. ގާތްގަނޑަކަށް މި ޕްރޮޖެކްޓަށް 50 މިލިޔަން ރުފިޔާ ޚަރަދުވާނެ.ސްވިމިންގ އެސޯސިއޭޝަން އޮފް މޯލްޑިވްސްގެ ނައިބު ރައީސް އިސްމާޢީލް އަލީ
ސްވިމިންގ އެސޯސިއޭޝަން އުފެދުނުތާ 46 އަހަރު ވެފައިވާއިރު، އޮލިމްޕިކް ސައިޒުގެ ސްވިމިންގ ޕޫލެއް އެޅިގެންދިޔުމަކީ ފެތުންތެރިންނަށް ލިބޭނެ ވަރަށް ބޮޑު ހިތްހަމަޖެހުމެކެވެ.
އިސްމާޢީލް އަލީ ވިދާޅުވީ ދެ ފަންގިފިލާއަކަށް ހެދުމަށް ނިންމާފައިވާ މި އިމާރާތުގެ ދެވަނަ ފަންގިފިލާގައި ހުންނާނީ މުބާރާތް ބާއްވާ އޮލިމްޕިކް ސައިޒުގެ ސްވިމިންގ ޕޫލް ކަމަށާއި، އެއީ 12،000 މީހުންގެ ތަނަވަސް ޖާގަ އާއެކު ހެދިގެންދާނެ ޕޫލަކަށްވާއިރު، އެންމެ ތިރީގައި އޮންނާނީ ވާމް-އަޕް އަދި ވާމް-ޑައުން ކުރާނެ އިތުރު 50 މީޓަރުގެ ޕޫލެއްގެ އިތުރުން ޖިމްގެ ވަސީލަތާއި ވެހިކަލް ޕާކިންނެއް ކަމަށެވެ.
އަދި ޕޫލް ހެދުމަށް ނިންމާފައި ވަނީ އެކަމަށް ގާބިލު ކުންފުނިތަކަށް "އިންވިޓޭޝަނަލް ބިޑިންގ" އަކުން ހުޅުވާލައިގެން ކަމަށާއި، ޕޫލުގެ އަމަލީ މަސައްކަތް އަންނަ އަހަރުގެ ފެބްރުއަރީ މަހުގެ ތެރޭގައި ފެށިގެންދާނެ ކަމަށްވެސް ވިދާޅުވިއެވެ. އަދި އޮލިމްޕިކް ސައިޒުގެ ސްވިމިންގ ޕޫލަކީ ހުޅުމާލޭގައި މިހާރު ފެތުންތެރިން ބޭނުންކުރަމުންދާ ޕޫލުގެ ހަތަރު ގުނަ ކަމަށާއި، މަސައްކަތް ހަވާލުކުރާ ކުންފުންޏަކުން އެ މަސައްކަތް ނިންމައި، ދޮޅު އަހަރު ދުވަހުގެ ތެރޭގައި ބޭނުން ކުރަން ފެށޭވަރު ވާނެ ކަމަށްވެސް އިސްމާޢީލް އަލީ ވިދާޅުވިއެވެ.
މަސައްކަތްކޮށްދޭނެ ފަރާތެއް އައްޔަންކުރާއިރު އަޅުގަނޑުމެން ނިންމާފައި މި ވަނީ އެ މަސައްކަތަށް ދޮޅު އަހަރު ދިނުމަށް. އެއީ ކުރިއަށް ހުރި ބޮޑެތި މުބާރާތްތަކަށް ފެތުން ތެރިން ތަމްރީނުކުރުމަށް ބޭނުންވާ ވަގުތުވެސް ހޯދުމަށް. މިހާބޮޑު މަސައްކަތަށް ވާތީ އާންމު ބިޑަކަށް ވުރެން ބޮޑަށް މިކަމަށް ގާބިލު ކުންފުނިތަކަށް އިންވިޓޭޝަން ފޮނުވައިގެން އެކަން ކުރަން ނިންމާފައި ވަނީ. އެހެން ނަމަވެސް އެކަން ކުރާނީ ކޮމިޓީއެއް ނެގިގެން، ފައިސާ ބޭނުންކުރާނެ އާންމު އުސޫލުތަކާ އެއްގޮތަށް.ސްވިމިންގ އެސޯސިއޭޝަން އޮފް މޯލްޑިވްސްގެ ނައިބު ރައީސް އިސްމާޢީލް އަލީ
މާލޭގައި އޮލިމްޕިކް ސައިޒުގެ ސްވިމިންގ ޕޫލެއް އެޅުމުގެ މަސައްކަތް ކުރިޔަށްދާއިރު، ފެތުމުގެ ހަރަކާތްތައް މިހާރު ކުރިއަށްގެންދާ ސްވިމިންގ ޓްރެކް ސަރަހައްދު ޒަމާނީ ފެންވަރަށް ތަރައްގީކޮށް، މި މަހުގެ ނިޔަލަށް ނިންމައި، އަންނަ ޖެނުއަރީ މަހު އާންމުންނަށް ބޭނުން ކުރެވޭވަރު ވެގެންދާނެ ކަމަށްވެސް ސްވިމިންގ އެސޯސިއޭޝަނުން ބުނެއެވެ.
