އިންޑޮނީޝިއާގެ އެންމެ މަޝްހޫރު ގާރީ ޝޭޚް ޖައުފަރު އަބްދުއް ރަހުމާނު ގުރުއާން ކިޔަވަމުން ދަނިކޮށް ނިޔާވެއްޖެ

ރީތިކޮށް ގުރުއާން ކިޔެވުމަށް އިންޑޮނީޝިއާގައި އެންމެ މަޝްހޫރު ގާރީ ޝޭޚް ޖައުފަރު އަބްދުއް ރަހުމާން، ރަސްމިއްޔާތެއްގައި ގުރުއާން ކިޔަވަމުން ދަނިކޮށް ކުއްލި ގޮތަކަށް ނިޔާވެއްޖެއެވެ. އޭނާ ނިޔާވި އިރު، ގުރުއާން ކިޔަވަމުން ގެންދާ މަންޒަރު ޓީވީ ތަކުން ވަގުތުން ދިޔައީ ދުރައް ދައްކަމުންނެވެ.

ޝޭޚް ޖައުފަރު ނިޔާވި އިރު އޭނާ ކިޔަވަމުން ގެންދިޔައީ ސޫރަތުލް މުލްކުގެ ދެވަނަ އާޔަތެވެ.

އެ އާޔަތުގެ މާނައިގައި އޮންނަނީ:

"އެކަނލާގެއީ ތިޔަބައިމީހުންކުރެ އެންމެ އަމަލު ރަނގަޅީ ކާކުތޯ އިމްތިހާން ކުރެއްވުމަށްޓަކައި މަރުވުމާއި ދިރިހުރުން އެފެއްދެވި ރަސްކަލާނގެއެވެ. އަދި އެކަނލާގެއީ އަޒީޒް ވަންތަ ގިނަ ގިނައިން ފާފަ ފުއްސަވާ ރަސްކަނލާގެއެވެ."

އާޔަތުގެ ފަހު ބައި ކިޔަވަން ފަށާތަނުން، މަންޒަރުން ފެންނަ ގޮތުން، އޭނާގެ އަޑު ފަނޑުވަމުން ގޮސް ކުޑަކޮށް އިސްދަށަށް ޖެހެއެވެ. އެހިސާބުން މީހުން ކަރިއަށް އަންނަތަން ފެނެއެވެ. އަދި މަޑުމަޑުން ގޮސް ޚަބަރު ހުސްވެގެން ވެއްޓެނީއެވެ. އޭގެ ކުރިން އެއްވެސް އުނދަގުލެއް ހުރި ކަމެއް ގުރުއާން ކިޔަވަމުން ދިޔައިރު އަޑުންވެސް އަދި މޫނުމަތިންވެސް ފާހަގަ އެއް ނުކުރެވެއެވެ.

އަބްދުއްރަހުމާނު ގުރުއާން ކިޔަވަމުން ދިޔަ އިރު އެތާނގައި ތިބި މީހުންގެ ތެރޭގައި އިންޑޮނީޝިއާގެ މިނިސްޓަރ އޮފް ސޯޝަލް އެފެއަރޒް ވެސް ހިމެނިވަޑައިގަންނަވާ ކަމަށް ޕްރެސް ޓީވީން ބުނެފައިވެއެވެ.

ޚަބަރު ހުސްވެގެން ވެއްޓުމާއެކު އޭނާވަނީ ސްޓެރެޗަރަކަށް ލައިގެން ހޮސްޕިޓަލަށް ގެންގޮސް ފައެވެ.

އިންޑޮނީޝިއާއަކީ މުސްލިމުންގެ އާބާދީ އެންމެ ބޮޑު ގައުމެވެ. އިސްލާމްދީން އިންޑޮނީޝިއާއަށް ތައާރުފް ވީ 13 ވަނަ ގަރުނުގެ ތެރޭގައި އުތުރު ސުމަޓްރާ ސަރަހައްދަށެވެ. 16 ވަނަ ގަރުނު ނިމުނު އިރު އިންޑޮނީޝިއާގެ މައި ދީނަށް އިސްލާމްދީން ވެގެން ދިޔައެވެ.