ދިރާގު ދިވެހި ޕްރިމިއާ ލީގުގެ ފުރަތަމަ ބުރުގައި މާޒިޔާ ސްޕޯޓްސް އެންޑް ރެކްރިއޭޝަނާއި ކުލަބު ވެލެންސިއާ ބައްދަލުކުރާ މެޗަކީ މި ބުރުގެ ފައިނަލް މެޗު ކަމަށް ވެލެންސިއާގެ ކޯޗު މުޙައްމަދު އާތިފް (އާތީ) ބުނެފިއެވެ.

މި ދެ ޓީމުވެސް މިހާތަނަށް ލީގުގައި ދެ މެޗު ކުޅެފައިވާއިރު، ފުރަތަމަ ދެ މެޗުން މޮޅުވި ހަމައެކަނި ދެ ޓީމަކީ ވެލެންސިއާ އާއި މާޒިޔާއެވެ. އެގޮތުން ފުރަތަމަ މެޗުގައި ކުލަބު ގްރީން ސްޓްރީޓްސް އަތުން 1-0 ން ވެލެންސިއާ މޮޅުވިއިރު، ދެވަނަ މެޗުގައި ޔުނައިޓެޑް ވިކްޓަރީ (ޔޫވީ) އަތުން ފަސޭހަކަމާއެކު 4-0 ން ވެލެންސިއާ ވަނީ މޮޅުވެފައެވެ. އަދި މާޒިޔާއިން ކުޅުނު ފުރަތަމަ މެޗުގައި ޔޫވީ އަތުން 4-0 ން މޮޅުވިއިރު، ދެވަނަ މެޗުގައި ވަނީ ގްރީން ސްޓްރީޓްސް އަތުން 7-1 ގެ ތަފާތު ބޮޑު ނަތީޖާއަކުން މޮޅުވެފައެވެ.

ލީގުގައި ހޮނިހިރު ދުވަހުގެރޭ މާޒިޔާއާ ދެކޮޅަށް ނުކުތުމުގެ ކުރިން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި އާތީ ބުނީ މި މެޗަކީ މި ބުރުގެ ފައިނަލް މެޗު ކަމަށް ދެންނެވިދާނެ ކަމަށާއި، މި މެޗުން މޮޅުވާ ބަޔަކަށް މި ބުރުގައި ކޮންމެވެސް ހިސާބަކަށް ދިއުމުގެ ފުރުސަތު ބޮޑު ކަމަށެވެ. އަދި ޓެކްޓިކަލް ޑިސިޕްލިން ހިފަހައްޓައިގެން، ފޯމޭޝަން ރޫޅާނުލައި ކުޅެފިއްޔާމު، މި މެޗުން ވެލެންސިއާއަށްވެސް މޮޅެއް ހޯދޭނެ ކަމަށް އާތީ ވަނީ ބުނެފައެވެ.

ވެލެންސިއާ މެޗުގެ ކުރިން މާޒިޔާގެ ކޯޗު މުޙައްމަދު ނިޒާމް (ނިޒާމްބެ) ބުނީ ލީގުގައި މި ވަގުތު ހާލަތު އޮތްގޮތުން މިއީ ވާދަވެރި މެޗެއްގެ ގޮތުގައި ވެދާނެ ކަމަށާއި، އެކަމަކު މިއީ ލީގުގެ މަގާމެއް ކަނޑައަޅާނެ މެޗެކޭ ބުނަން އަދި އަވަސް ކަމަށެވެ. އަދި ވެލެންސިއާގެ ވަކިވަކި ކުޅުންތެރިންނަށް ވިސްނައިގެން ޓީމު ރޭވުމުގެ ބަދަލުގައި މުޅި ޓީމަށް ވިސްނަން ޖެހޭ ކަމަށާއި، ވަކިވަކި ކުޅުންތެރިންނަށް ވިސްނައިފި ނަމަ، އެ ޓީމުގައި ތިބޭ އެހެން ކުޅުންތެރިންނަށް ފުރުސަތުތަކެއް ލިބިގެންދާނެ ކަމަށްވެސް ނިޒާމްބެ ބުންޏެވެ.

ދިރާގު ދިވެހި ޕްރިމިއާ ލީގުގައި މާޒިޔާ އާއި ވެލެންސިއާ ބައްދަލުކުރާ މެޗު ފަށާނީ ހޮނިހިރު ދުވަހުގެރޭ 21:00 ގައެވެ.