ފެތުމުގެ ހަރަކާތްތައް ކުރިއަށްގެންދާ ސްވިމިންގ ޓްރެކް ސަރަހައްދު މި މަހުގެ ނިޔަލަށް ނިންމައި، އަންނަ ޖެނުއަރީ މަހު އާންމުންނަށް ބޭނުން ކުރެވޭވަރު ވެގެންދާނެ ކަމަށް ސްވިމިންގ އެސޯސިއޭޝަން އޮފް މޯލްޑިވްސްގެ ނައިބު ރައީސް އިސްމާޢީލް އަލީ ވިދާޅުވެއްޖެއެވެ.
މާލޭ އިރު ދެކުނު ފަރާތުގައި ގާއިމުކޮށްފައިވާ ސްވިމިންގ ޓްރެކްގައި ސިޑިބަރިއާއެކު ފާހަނާ އާއި ފެންވަރާނެ ވަސީލަތްތައް ގާއިމުކޮށްދިނުމުގެ މަސައްކަތް މާޒިޔާ ކޮންސްޓްރަކްޝަނާ ހަވާލުކޮށްފައިވަނީ މިދިޔަ އަހަރުގެ ޖޫން މަހުގެ 20 ވަނަ ދުވަހުއެވެ.
އެފަހަރު މަސައްކަތް ހަވާލުކޮށްފައިވަނީ 120 ދުވަހުގެ ތެރޭގައި ނިންމާ ގޮތަށެވެ. އެކަމަކު ދިރާސާތަކެއް ކުރަން ޖެހުމުން މީގެ ކުރިންވެސް މަސައްކަތް ލަސްވިއިރު، ކޮވިޑް-19 އާ ގުޅިގެންވެސް މަސައްކަތް ވަނީ ލަސްވެފައެވެ.
ރާއްޖެޓީވީގެ "ކުޅިވަރު ފައިލް" ޕްރޮގްރާމުގައި ވާހަކަ ދައްކަމުން އިސްމާޢީލް އަލީ ވިދާޅުވީ ސްވިމިމްގ ޓްރެކް ނިމިގެންދާއިރު އެ ސަރަހައްދަކީ މޫދު ކުޅިވަރުގެ ޕާކަކަށް ވެގެންދާނެ ކަމަށެވެ. އަދި ފަތާ ސަރަހައްދު އާއްމުން ބޭނުންކުރުމަށް ހިތްގައިމު ސަރަހައްދަކަށް ބަދަލުވެގެންދާއިރު، އެ ސަރަހައްދުގައި ޒުވާނުންގެ މެދުގައި މަގުބޫލު ކަމެއްކަމަށްވާ ޑައިވް ކުރާނެ ޕްލެޓްފޯމެއްވެސް ހެދުމަށް މަސައްކަތް ކުރަމުންދާ ކަމަށާއި، އެ މަސައްކަތްވެސް ދެތިން ހަފުތާގެ ތެރޭގައި ނިންމާލެވޭނެ ކަމަށްވެސް ވިދާޅުވިއެވެ.
ޔޫތު މިނިސްޓްރީ އާއި މާލެ ސިޓީ ކައުންސިލާ ވާހަކަ ދެކެވިގެން އިތުރު މަސައްކަތެއް މިހާރު ފެށިފައި އެވަނީ. އެ ސަރަހައްދުން ފެންނާނެ ޒުވާން ޅައުމުރުގެ ކުދިން ޑައިވް ކުރުމަށް ވަރަށް ޝައުގުވެރިވާކަން. މާލެގައި އެ ފުރުސަތެއް އަސްލު ނެތް. އެހެން ކަމުން ޑައިވް ކުރާނެ ޕްލެޓްފޯމެއް އެޅުމުގެ މަސައްކަތް އެ ސަރަހައްދުގައި އެދަނީ ކުރިއަށް. އެ ޑައިވް ޕްލެޓްފޯމްގައި ދެ ލެވަލްގައި ޑައިވް ކުރާނެ ފުރުސަތު ލިބިގެންދާނެ. ޑައިވް ޕްލެޓްފޯމުގެ މަސައްކަތް އެއްކޮށް އަތްދޫކޮށްލެވޭނީ ދެ ހަފުތާވަރު ފަހުން ކަމަށް ލަފާކުރެވެނީ. އެހެން ނަމަވެސް ސްވިމިންގ ޓްރެކުގެ ހިޔާގަނޑު ނިމުމާއެކު އެ ސަރަހައްދު އާންމުންނަށް ހުޅުވާލެވޭނެ.ސްވިމިންގ އެސޯސިއޭޝަން އޮފް މޯލްޑިވްސްގެ ނައިބު ރައީސް އިސްމާޢީލް އަލީ
ސްވިމިންގ ޓްރެކް ސަރަހައްދު ރަނގަޅު ފެންވަރަކަށް ތަރައްގީކުރި ނަމަވެސް، އެ ސަރަހައްދު އޮންނާނީ ކޮންމެ ވަގުތެއްގައިވެސް އާންމުން ބޭނުންކުރެވޭނެ ސަރަހައްދެއްގެ ގޮތުގައި ކަމަށާއި، ސިޑިބަރި ބަންދުކުރުމަށް ނިންމާފައި ވަނީ ރޭގަނޑު 11 ގެ ފަހުން ކަމަށްވެސް އިސްމާޢީލް އަލީ ވިދާޅުވިއެވެ.
ސްވިމިންގ ޓްރެކް ސަރަހައްދަކީ މާލޭގެ ބާރުބޮޑު އަދި ބޮޑުމަގެއް ހިމެނޭ ސަރަހައްދަކަށް ވާތީއާއެކު، އެ ސަރަހަދު ތަރައްގީކުރާއިރު ސަރަހައްދުގެ ރައްކާތެރިކަމަށް ވަރަށް ހާއްސަ ސަމާލުކަމެއް ދީފައިވާ ކަމަށާއި، އެގޮތުން ޕޭމަންޓުން ފެށިގެން މަގަށް ނުނިކުމެވޭނެހެން 400 ފޫޓުގެ ފެންސެއް ޖެހުމަށް ނިންމާފައިވާއިރު، ހަމައެކަނި މަގު ހުރަސްކުރެވޭނެ ގޮތަށް އޮންނާނީ ކަފިހުރަސް ހިމެނޭ ސަރަހައްދުން ކަމަށްވެސް އިސްމާޢީލް އަލީ ވިދާޅުވިއެވެ.
ސްވިމިން ޓްރެކް ސަރަހައްދު ތަރައްގީކުރުމުގެ މަސައްކަތް ކުރިއަށްދާއިރު، އެ ސަރަހައްދުގައި އަންހެން އަދި ފިރެހެން ފެތުންތެރިންނަށް ވަކިން ބޭނުން ކުރެވޭނެ ވަސީލަތް ސިޑިބަރި ދަށުގައި ގާއިމު ކުރެވިގެންދާނެއެވެ. އަދި ސްވިިމިންގ އެސޯސިއޭޝަނުގެ އޮފީހަކާއި، ކޯޗުުންނާއި ވައިޑީޕީގެ ހަރަކާތްތައް ކުރިއަށްގެންދާ ފަރާތްތަކުގެ ސާމާނުތައް ރައްކާކުރެވޭނެ ޖާގަ ހުންނާނެ ކަމަށްވެސް ސްވިމިންގ އެސޯސިއޭޝަނުން ބުނެއެވެ.
މިހާރު ސްވިމިންގ ޓްރެކުގައި މުބާރާތްތައް ބާއްވާއިރު، އެ ސަރަހައްދުގައި ހުންނަނީ ވަގުތީ ޓެންޓްތަކެއް ޖަހާ ހިޔާކޮށްފައެވެ. އެހެންކަމުން އެ ސަރަހައްދު ތަރައްގީކުރެވިގެން ދިޔުމުން މުބާރާތްތައް ބޭއްވުމަށް ވަރަށް ބޮޑު ލުޔެއް ލިބި، ފެތުންތެރިންނާއި އެ ސަރަހައްދު ބޭނުންކުރާ މީހުންނަށް ރައްކާތެރިކަން ލިބިގެންދާނެ ކަމަށް ސްވިމިންގ އެސޯސިއޭޝަނުން ބުނެއެވެ.
