ދިރާގު ދިވެހި ޕްރިމިއާ ލީގުގައި އާދީއްތަ ދުވަހުގެރޭ ކުލަބު އީގަލްސް އަތުން ޓީސީ ސްޕޯޓްސް ކުލަބު މޮޅުވެއްޖެއެވެ.
ގައުމީ ފުޓްބޯޅަ ދަނޑުގައި ކުޅުނު މި މެޗުން ޓީސީ މޮޅުވީ 2-0 ގެ ނަތީޖާއަކުންނެވެ.
މި މެޗުގައި ދެ ޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔައިރު، މެޗުގެ ވަރަށް ކުރީކޮޅު އީގަލްސް އަބްދުﷲ ސަމީހު މޫސާ (ސަމިއްޓޭ) ފޮނުވާލި ހަމަލާއެއް ވަނީ ގޯލުގެ ހުރަސް ދަނޑިއަށް އަމާޒުވެފައެވެ. އެކަމަކު މެޗުގެ 15 ވަނަ މިނެޓުގައި ޓީސީން ވަނީ ލީޑު ނަގާފައެވެ. ނިޝާމް މުޙައްމަދު ރަޝީދު ދިން ޕާހަކުން މި ލަނޑު ޓީސީއަށް ކާމިޔާބުކޮށްދިނީ އެ ޓީމުގެ ކެޕްޓަން މުޙައްމަދު އައްޒާމެވެ.
އޭގެ ފަހުން މެޗުގެ 21 ވަނަ މިނެޓުގައި ނަތީޖާ އެއްވަރުކުރަން އީގަލްސްގެ ހަސަން ރާއިފް އަޙްމަދު (ހަންނަ) އަށް ވަނީ އޭރިއާ ތެރެއިން ރަނގަޅު ފުރުސަތެއް ލިބި ބޭކާރުވެފައެވެ. އަދި އޭގެ ތިން މިނެޓު ފަހުން ޓީސީގެ އިބްރާހީމް އަބްދުލް ވާހިދު (ވާޑު) ފޮނުވާލި ހަމަލާއެއް އީގަލްސްގެ ގޯލްކީޕަރު މުޙައްމަދު ސިނާހު ވަނީ ދިފާއުކޮށްފައެވެ.
މި މެޗުގައި ޓީސީއަށް މައްސަލަތަކެއް ދިމާވީ މެޗުގެ 66 ވަނަ މިނެޓުގައި އެ ޓީމުގެ ޑިފެންޑަރު އަލީ ޝާމިސް (ތޮއްޕޭ) އަށް ދެވަނަ ރީނދޫ ކާޑާއެކު ރަތް ކާޑެއް ދެއްކުމުންނެވެ. އެއާއެކު އީގަލްސްއިން ކުޅުން ރަނގަޅުކުރިއިރު، މެޗުގެ 76 ވަނަ މިނެޓުގައި އެ ޓީމުގެ ޒައިން ޒަފަރު ވަނީ ނުރައްކާތެރި ހަމަލާއެއް އުފައްދާފައެވެ. އެކަމަކު އެ ހަމަލާ ޓީސީގެ ގޯލްކީޕަރު މަމަދޯފް އާޒާދް ވަނީ ދިފާއުކޮށްފައެވެ.
އޭގެ ފަހުން އީގަލްސްއިން މެޗު ކޮންޓްރޯލް ކޮށްގެން ކުޅުނު ނަމަވެސް، މެޗު ނިމެން ދެ މިނެޓަށް ވެފައި ވަނިކޮށް ޓީސީން ވަނީ އިތުރު ލަނޑެއް ޖަހާ ލީޑު ފުޅާކޮށްފައެވެ. ކައުންޓަ އެޓޭކެއްގައި މި ލަނޑު އެ ޓީމަށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި ޒަޔާން ނަސީރެވެ. އަދި އޭގެ މިނެޓެއް ފަހުން އީގަލްސްގެ ކެޕްޓަން ހުސެއިން ޝިފާއު ޔޫސުފް (ކުރޯ) ފޮނުވާލި ހަމަލާއެއް ވަނީ ގޯލުގެ އަރިމަތީ ދަނޑިއަށް އަމާޒުވެފައެވެ.
މެޗަށްފަހު ޓީސީގެ ކޯޗު މުހައްމަދު ޝާޒްލީ (ޝާޒް) ބުނީ މި މެޗުގައި ޓީސީ ކުޅުންތެރިން ވަރަށް ހިތްވަރުކުރި ކަމަށާއި، އެއް ކުޅުންތެރިއަކު މަދުވުމުންވެސް އެކަތިގަނޑެއްގެ ގޮތުގައި މޮޅުވުމުގެ ރޫހުގައި އެ ކުރި މަަސައްކަތް ފާހަގަކުރާ ކަމަށެވެ.
އީގަލްސްގެ ކޯޗު މުޙައްމަދު ޝިޔާޒް (މޯހަން) ބުނީ ޓީސީ އަތުން ބަލިވިއިރު، މި މެޗުގައި އެ ޓީމުގެ ކުޅުންތެރިންގެ ފަރާތުން ވަރަށް ގިނަ ގޯސްތަކެއް ފެނުނު ކަމަށެވެ. އަދި ޓީމުގެ ކުޅުންތެރިންގެ ފެންވަރު ދުވަހެއް ދުވަހަކަށް ދަށަށް ދަމުން އަންނަ ކަމަށްވެސް މޯހަން ބުންޏެވެ.
އީގަލްސް އަތުން ޓީސީ މޮޅުވިއިރު، މިއީ ލީގުގައި ޓީސީން ހޯދި ފުރަތަމަ މޮޅެވެ. އަދި މި ސީޒަނުގެ ޗެރިޓީ ޝީލްޑް ކާމިޔާބުކުރި އީގަލްސްއިން ލީގުގައި މިހާތަނަށް ކުޅުނު ދެ މެޗުންވެސް ވަނީ ބަލިވެފައެވެ.
