އިޓާލިއަން ލީގުގައި ހޮނިހިރު ދުވަހުގެރޭ ކުޅުނު މެޗުން ޕާމާ އަތުން ފަސޭހަކަމާއެކު އެންމެ ފަހުގެ ޗެމްޕިއަން ޔުވެންޓަސް މޮޅުވެއްޖެއެވެ.

ރަށުން ބޭރުގައި ކުޅުނު މި މެޗުން ޔުވެންޓަސް މޮޅުވީ 4-0 ގެ ނަތީޖާއަކުންނެވެ.

މި މެޗުގައި ޔުވެންޓަސްގެ ފަރާތުން މޮޅު ކުޅުމެއް ފެނިގެންދިޔައިރު، މެޗުގެ 23 ވަނަ މިނެޓުގައި އެ ޓީމުން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ މިޑްފީލްޑަރު ޑެޖާން ކުލުސެވްސްކީއެވެ. އަދި އޭގެ ތިން މިނެޓު ފަހުން އަލްވާރޯ މޮރާޓާ ނަގައިދިން ހުރަހަކުން އިތުބާރު ފޯވާޑް ކްރިސްޓިއާނޯ ރޮނާލްޑޯ ވަނީ ޔުވެންޓަސްއަށް ލީޑު ފުޅާކޮށްދީފައެވެ.

މި މެޗުގެ ދެވަނަ ހާފުގައިވެސް ޔުވެންޓަސްއިން ރަނގަޅު ކުޅުމެއް ދެއްކިއިރު، މި ހާފު ފަށައިގެން ތިންވަނަ މިނެޓުގައި އެ ޓީމުން ވަނީ އިތުރު ލަނޑެއް ޖަހާފައެވެ. މި ލަނޑުވެސް އެ ޓީމަށް ކާމިޔާބުކޮށްދިނީ މެޗުގައި މޮޅު ކުޅުމެއް ދެއްކި ރޮނާލްޑޯއެވެ. އަދި މެޗުގައި ޔުވެންޓަސްއިން ޖެހި ހަތަރުވަނަ ލަނޑު މެޗު ނިމެން ހަތަރު މިނެޓަށް ވެފައި ވަނިކޮށް ކާމިޔާބުކޮށްދިނީ މޮރާޓާއެވެ.

މި މޮޅާއެކު ޔުވެންޓަސް އޮތީ ތާވަލުގެ ތިންވަނައިގައި 13 މެޗުން 27 ޕޮއިންޓާއެކުއެވެ. ހަމަ އެ އަދަދަށް ޕޮއިންޓް ހަމަކޮށްގެން ދެވަނައިގައި އޮތީ އެއް މެޗު މަދުން ކުޅެފައިވާ އިންޓަ މިލާނެވެ. އަދި އެއްވަނައިގައި އޮތް އޭސީ މިލާނަށް 12 މެޗުން ވަނީ 28 ޕޮއިންޓް ލިބިފައެވެ. މީގެ އިތުރުން ޔުވެންޓަސް އަތުން ބަލިވި ޕާމާ އޮތީ ތާވަލުގެ 15 ވަނައިގައި 13 މެޗުން 12 ޕޮއިންޓާއެކުއެވެ.