އިނގިރޭސި ޕްރިމިއާ ލީގުގައި ހޮނިހިރު ދުވަހުގެރޭ އެވަޓަން އަތުން އާސެނަލް ބަލިވިއިރު، މެންޗެސްޓާ ސިޓީން ސައުތެމްޓަން އަތުން މުހިންމު ތިން ޕޮއިންޓް ހޯދައިފިއެވެ.

ހޮނިހިރު ދުވަހުގެރޭ ރަށުން ބޭރުގައި އެވަޓަން އަތުން އާސެނަލް ބަލިވީ 2-1 ގެ ނަތީޖާއަކުންނެވެ.

އަނިޔާގެ ސަބަބުން ކެޕްޓަން ޕިއޭ-އެމެރިކް އޮބާމަޔަން ނުލައި އާސެނަލުން ކުޅުނު މި މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ އެވަޓަނުންނެވެ. މެޗުގެ 22 ވަނަ މިނެޓުގައި އެވަޓަނުން ލީޑު ނެގިއިރު، މި ލަނޑަކީ އާސެނަލުގެ ރޮބް ހޯލްޑިން އަތުން ބައިކޮޅަށް ވަން ލަނޑެކެވެ. އެކަމަކު މެޗުގެ 35 ވަނަ މިނެޓުގައި ލިބުނު ޕެނަލްޓީއަކުން ނިކޮލަސް ޕެޕޭ ވަނީ އާސެނަލަށް ނަތީޖާ އެއްވަރުކޮށްދީފައެވެ. މިއީ އޭރިއާ ތެރެއިން އާސެނަލުގެ އެއިންސްލީ މައިޓްލަންޑް-ނައިލްސްއަށް އެވަޓަނުގެ ޓޮމް ޑޭވިސް ކުރި ފައުލަކަށް ރެފުރީ ދިން ޕެނަލްޓީއެކެވެ. މި މެޗުން އެވަޓަން މޮޅުވީ ފުރަތަމަ ހާފުގެ ފަހު މިނެޓުގައި ޔެރީ މިނާ ކާމިޔާބުކޮށްދިން ލަނޑުންނެވެ.

މި މޮޅާއެކު އެވަޓަން ވަނީ ތާވަލުގެ ދެވަނައަށް ޖެހިލާފައެވެ. ކުޅުނު 14 މެޗުން 26 ޕޮއިންޓާއެކު އެވަޓަން ދެވަނައިގައި އޮތްއިރު، އެއްވަނައިގައި އޮތް ލިވަޕޫލަށް ވަނީ 14 މެޗުން 31 ޕޮއިންޓް ލިބިފައެވެ. އަދި އާސެނަލް އޮތީ ތާވަލުގެ 15 ވަނައިގައި 14 މެޗުން 14 ޕޮއިންޓާއެކުއެވެ.

މީގެ އިތުރުން ހޮނިހިރު ދުވަހުގެރޭ ރަށުން ބޭރުގައި ކުޅުނު މެޗުން ސައުތެމްޓަން އަތުން ސިޓީ މޮޅުވީ 1-0 ގެ ނަތީޖާއަކުންނެވެ.

މި މެޗުގައި ފެނިގެންދިޔަ ހަމައެކަނި ލަނޑު ސިޓީން ކާމިޔާބުކޮށްފައިވަނީ މެޗުގެ 16 ވަނަ މިނެޓުގައެވެ. މި ލަނޑު އެ ޓީމަށް ޖަހައިދިނީ ރަހީމް ސްޓާލިންނެވެ. އޭގެ ފަހުންވެސް ދެ ޓީމުންވެސް ވަނީ މި މެޗުގައި ގިނަ ހަމަލާތަކެއް އުފައްދާފައެވެ. މި މެޗުގައި ސައުތެމްޓަނަށް ދިމާވި އެންމެ ބޮޑު މައްސަލައަކީ ފުރަތަމަ ހާފުގައި އަނިޔާގެ ސަބަބުން އެ ޓީމުގެ އެއްވަނަ ފޯވާޑް ޑެނީ އިންގްސް ބަދަލުކުރަން ޖެހުމެވެ.

މި މޮޅާއެކު ސިޓީ އޮތީ ތާވަލުގެ ހަވަނައިގައި 13 މެޗުން 23 ޕޮއިންޓާއެކުއެވެ. އަދި ސައުތެމްޓަން އޮތީ ތާވަލުގެ ފަސްވަނައިގައި 14 މެޗުން 24 ޕޮއިންޓާއެކުއެވެ.