ފްރެންޗް ލީގުގައި ބުދަ ދުވަހުގެރޭ ލޮރިއެންޓް ބަލިކޮށް އެންމެ ފަހުގެ ޗެމްޕިއަން ޕީއެސްޖީން ލީގުގެ އެއްވަނައިގައި އޮތް ލިލްގެ ފަހަތުގައި ވިއްދައިފިއެވެ.

އަމިއްލަ ދަނޑުގައި ކުޅުނު މި މެޗުން ޕީއެސްޖީ މޮޅުވީ 2-0 ގެ ނަތީޖާއަކުންނެވެ.

މި މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، ދެވަނަ ހާފު ފަށައިގެން ހަވަނަ މިނެޓުގައި ޕެނަލްޓީއަކުން ކީލިއަން އެމްބާޕޭ ވަނީ ޕީއެސްޖީއަށް ލީޑު ނަގައިދީފައެވެ. މިއީ އޭރިއާ ތެރެއިން އެމްބާޕޭއަށް ލޮރިއެންޓުގެ އެންޑްރޫ ގަވީލޯން ކުރި ފައުލަކަށް ރެފުރީ ދިން ޕެނަލްޓީއެކެވެ. އަދި އެ ފައުލާ ގުޅިގެން ގަވީލޯނަށް ރެފުރީ ވަނީ ސީދާ ރަތް ކާޑެއް ދައްކާފައެވެ.

އަދި ލޮރިއެންޓުގެ އެއް ކުޅުންތެރިއަކު މަދުވުމުގެ ފައިދާނަގައި ޕީއެސްޖީން މި މެޗުގައި ލީޑު ފުޅާކޮށްފައިވަނީ 61 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ އެވަޓަނުގެ ލޯނު އެއްބަސްވުމެއް ދަށުން ކުޅެމުން އަންނަ މޮއިސް ކީންއެެވެ. މި ސީޒަނުގައި ކީން މޮޅު ކުޅުމެއް ދައްކަމުން އަންނައިރު، އޭނާ ވަނީ މިހާތަނަށް ފްރެންޗް ލީގުގައި ހަ ލަނޑު ޖަހާފައެވެ.

މި މޮޅާއެކު ޕީއެސްޖީ ދެވަނައިގައި އޮތީ ކުޅުނު 15 މެޗުން ލިބުނު 31 ޕޮއިންޓާއެކުއެވެ. އެއްވަނައިގައި އޮތް ލިލް ވަނީ ބުދަ ދުވަހުގެރޭ ޑިޖޯން އަތުން ރަށުން ބޭރުގައި 2-0 ން މޮޅުވެފައެވެ. އެއާއެކު އެ ޓީމަށް ވަނީ 15 މެޗުން 32 ޕޮއިންޓް ލިބިފައެވެ.