ޤައުމަށް ޙާލަތެއް ކުރިމަތިވެފައި ނެތް އިރުވެސް ވޭތުވެދިޔަ ސަރުކާރުގެ ދަރަނި ނުހަނު ބޮޑު ކަމަށް ބަޖެޓް ދިރާސާކުރަމުން އަންނަ ކޮމިޓީގެ މުޣައްރިރު ކިނބިދޫ ދާއިރާގެ މެމްބަރ މުހައްމަދު ނާޝިޒު ވިދާޅުވެއްޖެއެވެ.
މިހާރު ސަރުކާރުން ހުށަހަޅާފައިވާ ބަޖެޓަކީ ބުއްދި ސަލާމަތުން ހުރެގެން މީހަކު ވޯޓުދޭނެ ބަޖެޓެއް ނޫން ކަމަށާއި، ބަޖެޓް މިހާރު އޮތް ގޮތަށް ފާސްކޮށްގެން ރައްޔިތުން ފުނޑިގެން ދާނެ ކަން ފާހަގަ ކުރައްވައި ބަޖެޓް އަނބުރާ ގެންގޮސް 25 ބިލިއަން ރުފިޔާއަށް ކުޑަކުރަން މަޖިލީހުގެ މައިނޯރިޓީ ލީޑަރު އޭދަފުށި ދާއިރާގެ މެމްބަރު އަހުމަދު ސަލީމް ވަނީ ގޮވާލައްވާފައެވެ. އަދި އިދިކޮޅުގެ ބައެއް އިތުރު މެމްބަރުންވެސް ވަނީ ބަޖެޓަށް ފާޑު ވިދާޅުވެ ވާހަކަ ދައްކަވާފައެވެ.
އެކަމާ ގުޅޭގޮތުން ރާއްޖެޓީވީގެ "ފަލަސުރުޙީ" ޕްރޮގްރާމްގައި ވާހަކަ ދައްކަވަމުން ނާޝިޒް ވިދާޅުވީ، އިދިކޮޅުން އެފަދަ ވާހަކަ ދެއްކުމުން ސީރިއަސްކޮށް ނަންގަވަންވެސް އުނދަގޫ ކަމަށެވެ. އެގޮތުން ވެރިކަން ނިމިގެން އައިރު ޔޫޒަބަލް ރިޒާވްގައިވެސް ހުރީ 200 މިލިއަން ޑޮލަރުކަން ފާހަގަ ކުރައްވައި ނާޝިޒް ވިދާޅުވީ، އެއީ އެއްވެސް އިޤްތިސާދީ ޚާއްސަ ޙާލަތެއް ނައިސް، އާމްދަނީ އަށް ދަތިކަމެއް ނައިސް އަދި ރާއްޖޭގެ އެރައިވަލްވެސް އަންދާޒާ ކުރި ވަރަށް އިތުރުވަމުން އައިއިރުގެ ޙާލަތު ކަމަށެވެ.
އޭގެ އިތުރުން، ވެރިކަން ފެށިގެން އައިއިރު 30 ބިލިއަނުގައި ހުރި ދަރަނި ވެރިކަން ނިމުނު އިރު ހުރީ 80 ބިލިއަނާ ގާތަށް އަރާފައިކަން ފާހަގަ ކުރައްވައި ނާޝިޒް ވިދާޅުވީ، އޭރު ރާއްޖޭގެ ވަސީލަތްތައްވެސް ގެންދިޔައީ ބަހާ ހުސް ކުރަމުން ކަމަށެވެ.
ފުރަތަމަ ކަމަކަށް އެ ބޭފުޅުން އެކަހަލަ ވާހަކައެއް ދެއްކީމާ ސީރިޔަސްކޮށް ނަގަންވެސް އަޅުގަނޑަށް އުނދަގޫ. އަޅުގަނޑުމެންނަށް ފުރަތަމަ ބަޖެޓެއް އައިއިރު. ވެރިކަން ނިމިގެން އައިރު ޔޫޒަބަލް ރިޒާވްގައިވެސް 200 މިލިއަން ޑޮލަރު އޮތީ. މިއީ އެއްވެސް އިގްތިސާދީ ޚާއްސަ ހާލަތެއްނައިސް އާމްދަނީ އަށް ދަތިކަމެއް ނައިސް އެސްޓިމޭޓް ކުރި ވަރަށް ރާއްޖޭގެ އެރައިވަލް އިތުރުވަމުން އައިއިރު ހާލަތުގައި އިން އެއްޗެއް. ދަރަނި އައީ ބޮޑުވަމުން 30 ބިލިއަނުގައި ހުރި އެއްޗެއް ހަވާލުވިއިރު ވެރިކަން ނިމުނުއިރު 67-80 ބިލިއަނާ ގާތަށް އަރައިގެން ގޮސްފައިއޮތީ. އެހެންވީމާ އެވަރަށް ކަންކަން ގެންގޮސްފައި މިވަރުގެ ހާލަތެއް ރާއްޖެއަށް ދިމާވެގެން އައިއިރު ރާއްޖޭގައި ހުރި ރިޒޯސަސްވެސް ބަހާ ހުސްކޮށްލައިފި. ރަށްތަކާއި އެއްޗެހި ބަހައިގެން ދިޔަގޮތް. އެކަހަލަ ކަންކަން ހިނގައިގެން ދިޔައިރު އޭރު މަގާމުގައިއާ މަޖިލީހުގައި ތިބި ބޭފުޅުންނަށް އެކަން ނުފެނި މިއަދު މިވާހަކަ ދެއްކީމަ ކަންބޮޑެއް ނުވޭ. އެބޭފުޅުން އެ ވާހަކަ ދައްކަނީ ކިހާ އިހްލާސްތެރިކަމެއް ހުރިނަމަ މިއަދު ހުރިކަންތައް ރަނގަޅަށް ސިފަކުރެވޭނެބަޖެޓް ކޮމިޓީގެ މުޣައްރިރު މެމްބަރު މުހައްމަދު ނާޝިޒު
ނާޝިޒް އިތުރަށް ވިދާޅުވީ، ދަރަނި މޭންޖް ކުރަން މިހާ އުދަގޫ ޙާލަތަށް ކަންކަން ދިޔައީ އޭރުގެ ސަރުކާރުން ކަންކަން ކޮށްފައިވާ ގޮތުގެ ސަބަބުން ކަމަށެވެ.
އަންނަ އަހަރަށް ލަފާކުރާ ދައުލަތުގެ ބަޖެޓްގެ ޖުމްލަ އަދަދަކީ 34.7 ބިލިއަން ރުފިޔާއެވެ. މީގެ ތެރެއިން ޚަރަދުގެ ގޮތުގައި ހިނގާނެކަމަށް ބެލެވެނީ 33.3 ބިލިއަން ރުފިޔާއެވެ. މި ފައިސާގެ 62.3 އިންސައްތަ ހޭދަވަނީ ރިކަރަންޓް ހަރަދަށެވެ. އަދި ކެޕިޓަލް އެކްސްޕެންޑިޗަރއަށް ހަރަދުވަނީ 37.7 އިންސައްތައެވެ. ބާކީ 1.5 ބިލިއަން ރުފިޔާ ހަރަދުކުރުމަށް ކަނޑައަޅާފައިވަނީ ދައުލަތުގެ ދަރަނި އަދާކުރުމަށެވެ.
