އައްޑޫ ސިޓީ މީދޫ އެކުވެރިންގެ ޗޭނު ޖަމުޢިއްޔާއިން އިންތިޒާމުކޮށްގެން މީދޫގެ މުއައްސަސާތަކަށް ހުޅުވާލައިގެން ކުރިއަށްގެންދާ އަންހެނުންގެ ނެޓްބޯޅަ މުބާރާތުގެ ސެމީފައިނަލަށް ޓީމުތައް ދަތުރުކޮށްފިއެވެ.

"އެމްއީސީ ބަދެހިކަޕް" ގެ ނަމުގައި ކުރިއަށްދާ މި މުބާރާތުގެ ސެމީއަށް ދަތުރުކޮށްފައިވާ ޓީމުތަކަކީ ހުޅުދޫ ޔޫތާއި، ހުދު ހުދާއި، ޕޮލިސް ރެކްރިއޭޝަން އަދި އައްޑޫ ފިޝަރީޒް ކޮމްޕްލެކްސްއެވެ.

ހުޅުދޫ ޔޫތު ސެމީއަށް ދަތުރު ކުރީ ކުޅުނު ހުރިހާ މެޗަކުން މޮޅުވެ 12 ޕޮއިންޓް ހޯދައިގެންނެވެ. އަދި ހުދު ހުދު ސެމީގެ ޖާގައެއް ކަށަވަރުކުރީ ތިން މެޗުން މޮޅުވެ ނުވަ ޕޮއިންޓާއެކުގައެވެ. އެޓީމު ގްރޫޕް ސްޓޭޖުގައި ބަލިވެފައި ވަނީ ހުޅުދޫ ޔޫތު އަތުންނެވެ.

ގުރޫޕް ބީން ޕޮލިސް ސެމީގެ ޖާގައެއް ކަށަވަރުކުރީ ހުރިހާ މެޗަކުން މޮޅުވެ، ނުވަ ޕޮއިންޓާއެކުގައެވެ. ގުރޫޕް ބީގެ ވާދަވެރިކަން ބޮޑުވެގެން ދިޔައިރު، މި ގުރޫޕުގައި އެމްޕީއެލް އާއި އައްޑޫ ފިޝަރީޒް ކޮމްޕްލެކްސް އެއްވަރުވިއިރު، ސެމީގެ ޖާގަ ކަނޑައެޅީ ބޯލް ޝޫޓަށް ބަލައިގެންނެވެ. އެގޮތުން އެމްޕީއެލަށްވުރެން އައްޑޫ ފިޝަރީޒް ކޮމްޕްލެކްސްއަށް ޕޮޓް އިތުރަށް ހޯދާފައިވުމުން ސެމީގެ ޖާގަ އެޓީމަށް ވަނީ ކަށަވަރުވެފައެވެ. ގްރޫޕް ސްޓޭޖުގައި މި ދެ ޓީމުވެސް އެއް މެޗުން މޮޅުވެ، އެއް މެޗު އެއްވަރު އަދި އެއް މެޗުން ވަނީ ބަލިވެފައެވެ.

ނުވަ ޓީމާއެކު މި މަހުގެ 11 ވަނަ ދުވަހު ފެށި މި މުބާރާތުގެ ގުރޫޕް ސްޓޭޖުގެ މެޗުތައް އާދިއްތަ ދުވަހުގެރޭ ނިމިފައިވާއިރު، ސެމީފައިނަލް މެޗުތައް ކުޅުމަށް ހަމަޖެހިފައިވަނީ އަންގާރަ ދުވަހުއެވެ.

ނުވަ ޓީމު ދެ ގުރޫޕަކަށް ބަހާލާފައިވާއިރު، މުބާރާތް ފަށާފައި ވަނީ ޖުމްހޫރީ ދުވަހުގެ މުނާސަބަތާއި ގުޅުވައިގެންނެވެ. މީދޫ އެކުވެރިންގެ ޗޭނު ޖަމުޢިއްޔާގެ ފަރާތުން މައުލޫމާތު ދެއްވި ގޮތުގައި އެ ޖަމުޢިއްޔާގެ ފަރާތުން މި ފަދަ މުބާރާތެއް ރާވައި ހިންގުމުގެ މަގުސަދަކީ މީދޫ މުއައްސަސާތަކުގެ މެދުގައި އެކުވެރިކަން އާލާކޮށް ކުޅިވަރުގެ ރޫހު ދިރުވައި، މީދޫ ޒުވާނުންގެ މެދުގައި އެކުވެރިކަން ބަދަހިކުރުމާއި، ޒުވާނުންގެ ހުނަރުތައް ދައްކާލުމުގެ ފުރުސަތު ހުޅުވާލުމާއި، މުޖުތަމައުގެ ތެރޭގައި އިޖުތިމާޢީ ދުޅަހެޔޮކަން އިތުރުކޮށް، ކުޅިވަރުގެ ރޫހު އާލާކުރުމެވެ.

މުބާރާތަށް ވަރަށް ބޮޑު އެއްބާރުލުމެއް މުއްސަސާތަކުން ދީފައިވާއިރު، މުބާރާތް ކުރިއަށްދަނީ މުއްސަސާތަކުގެ މެދުގައި ވަރަށް ބޮޑު އެކުވެރިކަމަކާއެކު ކަމަށް މީދޫ އެކުވެރިންގެ ޗޭނު ޖަމުޢިއްޔާއިން މައުލޫމާތުދެއެވެ.