ގައުމީ ޗެމްޕިއަންކަން ނުވަ ފަހަރު ހޯދާފައިވާ ރާއްޖޭގެ ބެޑްމިންޓަނުގެ އެންމެ ކާމިޔާބު އެއް ކުޅުންތެރިޔާ މުޙައްމަދު އަޖުފާން ރަޝީދު ބެޑްމިންޓަން އެކެޑަމީއެއް އުފައްދައިފިއެވެ.

އަޖުފާން އިންޓަނޭޝަނަލް ބެޑްމިންޓަން އެކެޑަމީ (އޭއައިބީއޭ) ގެ ނަމުގައި އުފެއްދި މި އެކެޑަމީ އަކީ ހުރިހާ އުމުރެއްގެ ބެޑްމިންޓަން ކުޅުންތެރިންނަށްވެސް ތަމްރީނުދިނުމަށް އުފެއްދި އެކަޑަމީއެކެވެ.

އެކެޑަމީއާ ގުޅޭ ގޮތުން މައުލޫމާތުދެމުން އަޖުފާން ބުނީ އެކެޑަމީ އުފެއްދުމުގެ މައިގަނޑު މަގުސަދަކީ ގްރާސްރޫޓް ރަނގަޅު ކުރުމުގެ އިތުރުން ރާއްޖޭގައި ބެޑްމިންޓަން ކުޅޭ މީހުން އިތުރުވެފައިވާއިރު، އެ މީހުންނަށް ފުރުސަތުތަކެއް ތަނަވަސްކޮށްދިނުމަށް ކަމަށެވެ. އެގޮތުން ހަމައެކަނި ރާއްޖޭގައި ކުޅުމުގެ ބަދަލުގައި ބޭރުގެ މުބާރާތްތަކުގައިވެސް ވާދަކުރެވޭ ފެންވަރަށް ކުޅުންތެރިން ތަމްރީނުކުރުމަކީވެސް އެންމެ ބޮޑު އެއް މަގުސަދު ކަމަށް ބުންޏެވެ.

އަދި ގްރާސްރޫޓަށް ހާއްސަ ސަމާލުކަމެއް ދޭއިރު، އޭނާ ބޭނުންވަނީ އެންމެ ތުއްތުކުދީންގެ އުމުރުން 7 އަހަރުން ފެށިގެން އެ ކުޅުންތެރިންނަށް އެންމެ ބޭސިކް ބެޑްމިންޓަން ދަސްކޮށްދިނުމަށްފަހު، އުމުރުން 15 އަހަރުވާއިރު އެ ކުޅުންތެރިން ބައިނަލްއަގުވާމީ ފެންވަރުގައި ވާދަކުރެވޭ ކުޅުންތެރިންތަކަކަށް ހެދުމަށް ކަމަށްވެސް އަޖުފާން ބުންޏެވެ.

އަދި ވެޓްރެންސް ކުޅުންތެރިންނަށް އިތުރަށް ކުޅުމުގެ ފުރުސަތު ހޯދައިދީ، ރާއްޖެއިން ބޭރުގައިވެސް އޮންނަ މުބާރާތްތަކުންވެސް ވެޓްރަސް ކުޅުންތެރިންނަށް ފުރުސަތު ހޯދައިދިނުމަކީވެސް މި އެކެޑަމީގެ އެއް އަމާޒު ކަމަށް އަޖުފާން ވަނީ ބުނެފައެވެ.

އަޖުފާން ބެޑްމިންޓަން އެކެޑަމީއެއް އުފެއްދިއިރު، އޭނާ މިހާތަނަށް ވަނީ ގައުމީ ބެޑްމިންޓަން މުބާރާތުގެ ޗެމްޕިއަންކަން ނުވަ ފަހަރު ހޯދާފައެވެ. މިދިޔަ އަހަރުގެ "މިހާރު އެވޯޑްސް" ގެ އެންމެ މޮޅު ފިރިހެން އިންޑިވިޖުއަލް ކުޅުންތެރިޔާގެ މަގާމުވެސް ހޯދާފައިވާ އަޖުފާން ގައުމީ ތަށި އުފުލާލާފައިވަނީ 2006، 2007، 2008، 2009، 2010، 2011، 2015، 2018 އަދި 2019 ވަނަ އަހަރުއެވެ.