ތަރައްގީ ކުރުމުގައި އޮތް ހަމައެކަނި މަގަކީ އެއްފަސް ކުރުމެއް ނޫން ކަމަށާއި، ރާއްޖެ ތަރައްގީ ކުރުމުގައި ލާމަރުކަޒީކޮށް އެކަން ކުރުމަކީ މުހިންމު ކަމެއް ކަމަށް މިނިސްޓަރ އޮފް ނެޝަނަލް ޕްލޭނިންގ ހައުސިން އެންޑް އިންފްރާސްޓްރަކްޗަރ މުހައްމަދު އަސްލަމް ވިދާޅުވެއްޖެއެވެ.
ސަރުކާރަށް 2 އަހަރު ފުރުމާއި ގުޅިގެން ރާއްޖެ.އެމްވީއަށް ދެއްވި ހާއްސަ އިންޓަރވިއުއެއްގައި މިނިސްޓަރ އަސްލަމް ވިދާޅުވީ ރާއްޖެ ތަރުތީބު ކުރެވިފައި އޮންނާނެގޮތާއި ގުޅޭގޮތުން ގިނަ މަސައްކަތްތަކެއް ކުރެވިއްޖެ ކަމަށެވެ. އެގޮތުން ސްޕެޝަލް ޕްލޭނެއް ތައްޔާރު ކުރެވި އޭގެ ތެރެއިން 3 ސަރަހައްދަކަށް ރާއްޖެ ބަހާލެވިފައިވާ ކަމަށެވެ. އަދި އެ 3 ސަރަހައްދު 6 ރީޖަނަލަށް ބަހާލެވިފައިވާ ކަމަށާއި، އެއިން ކޮންމެ ރީޖަނެއްގައި ގާއިމްކުރަން ބޭނުންވަނީ ކޮން ސޯޝަލް އިންފްރާސްޓްރަކްޗަރ އެއްތޯ އަދި ކޮން އިކޮނަމިކް އެކްޓިވިޓީއެއްތޯ ކޮން ކަހަލަ ޕަބްލިކް އިންފްރާސްޓްރަކްޗާއެއްތޯ އެތަންތާގައި ހުންނަންވީ ކަނޑައަޅާ ވަނީ ނިމިފައެވެ.
އެކަމާއި ގުޅޭ ގޮތުން ސަރުކާރުގެ އެންމެ އިސް ފަރާތްތަކާއެކީގައި އެ މަސައްކަތްތައް ކޮށްފައިވާ ކަމަށް މިނިސްޓަރ އަސްލަމް ވިދާޅުވިއެވެ. އަދި ތަރައްގީގެ މަޝްރޫއުތައް ހިންގާ އިރު، ސްޕެޝަލް ޕްލޭނާ އެއްގޮތަށް މަސައްކަތް ކުރަމުންދާ ކަމަށެވެ.
އަޅުގަނޑުމެން ގަބޫލުކުރާ ގޮތުގައި ދިވެހިރާއްޖެ އުފެދިފައި އޮތް ގޮތުން ލާމަރުކަޒުކުރުން އެއްވަރު ދަތުރުފަތުރާއި. ދަތުރުފަތުރެއް ނެތި ލާމަރުކަޒެއް ނުކުރެވޭނެ. އަޅުގަނޑުމެންގެ ވިސްނުމަކު ނެތް މީހުން އަބަދު އެއްފަސްކުރުމަކީ އެއީ ތަރައްގީ ކުރުމުގައި އޮތް ހަމައެކަނި ގޮތަކީ. ބައެއް ހާލަތްތަކުގައި ބައެއްފަހަރު ޖެހޭ އެއްފަސްކުރަން ވެސް. އެހެންނަމަވެސް އެއީ ޕްރައިމިރިލީ އެކަން ކުރާ ގޮތް ކަމުގައި ނޫން އަޅުގަނޑުމެންނަށް ފެނުނީ. އަޅުގަނޑުމެންނަށް ފެނުނީ އެބަޔަކު ތިބި ތަނަކުން ހިދުމަތް ކައިރި ހިސާބަކުން ލިބޭނެ ތަނަކަށް ދަތުރުފަތުރު އަޅުގަނޑުމެން ގެނެސްދޭންޖެހޭނީ،މިނިސްޓަރ އޮފް ނެޝަނަލް ޕްލޭނިންގ ހައުސިން އެންޑް އިންފްރާސްޓްރަކްޗަރ މުހައްމަދު އަސްލަމް
މިނިސްޓަރ އަސްލަމް ވިދާޅުވީ ދަތުރު ފަތުރުގެ ނިޒާމަކުން ރާއްޖެ ގުޅާލުމަށްޓަކައި ސްޕެޝަލް ޕްލޭންގައި ކަނޑައަޅާފައިވާ ރީޖަންތަކާއި ޒޯންތަކުގައި އެއް ރަށުން އަނެއް ރަށަށް ދަތުރުފަތުރުކުރާނެ ގޮތުގެ ޕްލޭނެއް ތައްޔާރުކޮށް އެކަމަށް ބޭނުންވާނެ އުޅަނދު ފަހަރަކީ ކިހާ ވަރެއްތޯ އަދި ސްޓޭންޑަޑާއި ކޮލިޓީ އަދި އެއްރަށުން އަނެއް ރަށަށް ދަތުރުފަތުރު ކުރާނެ ފެރީ ޝެޑިއުލް ތައްޔާރުކުރެވިފައިވާ ކަމަށެވެ.
މިނިސްޓަރ ވިދާޅުވީ މުޅި ޕްލޭން އެއްކޮށް ތައްޔާރުކޮށް ނިމިފައިވާ ކަމަށާއި، އުއްމީދުކުރީ މި އަހަރުގެ ތެރޭގައި އުތުރުގެ 3 އަތޮޅުގެ ތެރޭގައި ދަތުރުފަތުރުގެ ނިޒާމް ފަށައިގަނެވޭނެ ކަމަށެވެ. އަދި މި އަހަރުގެ ބަޖެޓުގައި އެކަމަށް 100 މިލިއަން ރުފިޔާ ހިމެނިފައިވާނެ ކަމަށާއި، ނަމަވެސް ކޮވިޑް-19 ބަލިމަޑުކަމާއި ގުޅިގެން އަދި ރާއްޖޭގެ މާލީ ތަނަވަސްކަމަށް އައި ދަތިކަމާއެކީގައި އެ މަޝްރޫއު މިއަހަރު ތެރޭގައި ފެށުން މަޑުޖައްސާލާފައިވާ ކަމަށެވެ.
މިއަދު މަޖިލީހަށް ފިނޭންސް މިނިސްޓަރ ބަޖެޓް ހުށަހެޅުއްވި އިރު އެކަންތައް ކުރިއަށް ގެންދިއުމަށްޓަކައި އަންނަ އަހަރުގެ ބަޖެޓުގައި އެކަން ހިމަނާފައިވާނެ. އަޅުގަނޑުމެން ކޮށްފައިވާ ޕްލޭން ތަންފީޒުކުރުން މިއަހަރު ނުފެށުނު ކަންކަން އަންނަ އަހަރު ކުރިއަށް ގެންދާނަން. ޕްލޭނިންގެ ބަޔަށް ބަލާ އިރު އަޅުގަނޑުމެން މިދަނީ ޕްލޭނާ އެއްގޮތަށް. އަޅުގަނޑު ގަބޫލުކުރާ ގޮތުގައި ރާއްޖެއަށް އެންމެ ބޮޑު ބަދަލެއް އަންނާނީ ދަތުރުފަތުރުގެ ނިޒާމުގެ ތެރެއިން. އިރާދަކުރެއްވިއްޔާ އަޅުގަނޑުމެން އެކަން ކުރާނަން. އަޅުގަނޑުމެން އެކަން ކުރާނީ ދުނިޔޭގެ ކޮންމެ ގައުމަކަށް ބެލިކަމުގައިވިޔަސް މީހުން އެކަން ބަލައިގަންނާނެ އަދި ނިޒާމް ބޭނުންކުރާނެ ވަސީލަތްތައް އެ ނިޒާމުގެ ތެރެއަށް ގެނެސްގެން،މިނިސްޓަރ އޮފް ނެޝަނަލް ޕްލޭނިންގ ހައުސިން އެންޑް އިންފްރާސްޓްރަކްޗަރ މުހައްމަދު އަސްލަމް
މިނިސްޓަރ ވިދާޅުވީ ދަތުރުފަތުރުގެ ނިޒާމުގައި ބޭނުންކުރާނީ އެކަމަށް ހާއްސަ ކުރެވިފައިވާ ފެރީތަކެއް ކަމަށާއި، އެ ފެރީތަކަކީ ބޭނުންކުރާ ފަރާތްތަކަށް ލުއިފަސޭހެ އަދި އެއް ރީޖަނުން އަނެއް ރީޖަނާއި ގުޅިފައިވާ ނިޒާމެއް ކަމަށެވެ.
