ފްރާންސްގެ ޕެރިހުގައި ބުރާސްފަތި ދުވަހު ބަޑިން ހަމަލާ ދިން މީހާ އަކީ ކަރީމް ޗޯރްފީ ނަމަކަށް ކިޔާ މީހެއް ކަމަށާއި އޭނާ އަކީ ކުރީގައި ޖިނާއީ ދައުވާތަކެއް ސާބިތުވެފައި ހުރި މީހެއް ކަމަށް ޕެރިހުގެ ޕްރޮސިކިއުޓަރު ބުނެފިއެވެ.
ޕެރިހުގެ މަޝްހޫރު މަގެއް ކަމުގައިވާ ޗެމްޕްސް އެލިސީސްގައި ބަޑިޖެހުމުގެ ހާދިސާ ހިނގިއިރު، ބަޑިން ހަމަލާދިން މީހާ މަރާލުމުގެ ކުރިން، އޭނާ ވަނީ އެއް ފުލުހަކު މަރާލައި ދެ ފުލުހަކު ޒަޚަމްކޮށްލާފައެވެ.
ކަރީމް ޗޯރްފީ ގެ ފުރާނަނެތް ހަށިގަނޑު ކައިރީ، އޭނާ އިސްލާމިކް ސްޓޭޓް (އައިއެސް) ގެ ހަރަކާތްތައް ދިފާއުކޮށްފައިވާ ނޯޓެއް، ފުލުހުންނަަށް ވަނީ ފެނިފައެެވެ.
ކަރީމް ޗޯރްފީ ގެ މައްޗަށް ދައުވާ އުފުލާ ޕެރިހުގެ ޕްރޮސިކިއުޓަރު ފްރަންސުއާ މޮލިންސް ވިދާޅުވީ، ޗޯރްފީ އަކީ ހަަތަރު ޖިނާއީ ދައުވާއެއް ސާބިތުވެފައިވާ މީހެއް ކަމަށެވެ. މޮލިންސް އިތުރަށް ވިދާޅުވީ ހަމަލާ ދިން މީހާ ފުލުހުންތަކެއް މަރާލުމަށް ބޭނުންވާ ކަމަށް ބުނެފައިވާ ކަމަށާއި އެހެންނަމަވެސް އޭނާ އަކީ އިސްލާމް ދީނުގެ ހައްދުފަހަނައަޅައި ދިޔުމާ، ސީދާ ގުޅުމެއް އޮތް މީހެއް ކަމެއް އަދި އެނގިފައި ނުވާ ކަމަށެވެ.
ރޮއިޓާސް އިން ބުނާގޮތުން ހަމަލާ ދިން މީހާ އާއިލާގެ ތިން މީހަކު ފްރާންސް ފުލުހުން ވަނީ ހައްޔަރުކޮށްފައެވެ.
އިސްލާމިކް ސްޓޭޓް (އައިއެސް) ގެ ނޫސް އެޖެންސީ، "އަލްއަޢްމާޤް" އިން ކުރިން ބުނެފައި ވަނީ ޕެރިހުގެ މަގަކަށް ހަމަލާ ދިން މީހާ އަކީ އައިއެސް އަށް ނިސްބަތްވާ ހަނގުރާމަވެރިއެއް ކަމަށްވާ އަބޫޔޫސުފް އަލްބެލްޖީކީ ކަމަށެވެ.
ފްްރާންސްގެ ރިޔާސީ އިންތިޚާބުގެ ފުރަތަމަ ބުރު އާދީއްތަ ދުވަހު ބާއްވާއިރު ސަލާމަތީ ޚިދުމަތްތަކުން ވަނީ ސަލާމަތީ ކަންކަން ވަރަށް ވަރުގަދަކޮށްފައެވެ.
