ޔުއެފާ ޗެމްޕިއަންސް ލީގުގައި ޝަޚްތަރު ޑޮނެސްކާ ދެކޮޅަށް ކުޅޭ މެޗުގައި ރެއާލް މެޑްރިޑުގެ ކެޕްޓަން ސާޖިއޯ ރާމޯސްއަށް ނުކުޅެވޭނެކަން ޔަގީންވެއްޖެއެވެ.

ސްޕެނިޝް ލީގުގައި މިދިޔަ ހޮނިހިރު ދުވަހުގެރޭ ލީގަށް އަލަށް ޕްރޮމޯޓުވި ކަޑިޒް އަތުން 1-0 ން ރެއާލް ބަލިވި މެޗުގައި ރާމޯސް ވަނީ ކުޅެފައެވެ. އެކަމަކު އެ މެޗުގައި ރާމޯސްގެ ކަކުލަށް އަނިޔާވި ކަމަށާއި، އެ މެޗުގެ ފަހުން ރެއާލުން ބޭއްވި ފަރިތަކުރުންތަކުގައިވެސް ރާމޯސް ބައިވެރިވެފައި ނުވާ ކަމަށް ރިޕޯޓުތައް ބުނެއެވެ.

ޝަޚްތަރާ ދެކޮޅަށް ކުޅޭ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ރެއާލުގެ ކޯޗު ޒިނެދިން ޒިދާން ބުނީ ރާމޯސްއަށް ލިބުނު އަނިޔާ ސީރިއަސް ނޫން ކަމަށާއި، އެކަމަކު އެ އަނިޔާގެ ސަބަބުން އޭނާ ޓީމާއެކު ފަރިތަކޮށްފައި ނުވާ ކަމަށެވެ. އަދި ކުޅުންތެރިއަކު އެއްކޮށް ފިޓްނުވެ ހުއްޓައި އެ ކުޅުންތެރިއަކު ލައްވާ އޭނާ ނުކުޅުވާނެ ކަމަށާއި، އެހެންކަމުން ޝަޚްތަރު މެޗަށް އެކުލަވާލި ސްކޮޑުގައި ރާމޯސް ހިމަނާފައިނުވާ ކަމަށްވެސް ވަނީ ބުނެފައެވެ.

ރާމޯސްގެ ކަކުލަށް އަނިޔާވި ނަމަވެސް، ރެއާލަށް ކުޅެމުން އަންނަ ބެލްޖިއަމް ތަރި އެޑެން ހަޒާޑް މިހާރު އަންނަނީ އަނިޔާއިން ރަނގަޅުވެ ރެއާލުގެ ފަރިތަކުރުންތަކުގައި ބައިވެރިވަމުންނެވެ. އެކަމަކު ޝަޚްތަރާ ދެކޮޅަށް ކުޅޭ މެޗަށް ރެއާލުން އެކުލަވާލި ސްކޮޑުން އޭނާއަށްވެސް ފުރުސަތު ދީފައެއް ނުވެއެވެ.

ޒިދާން ބުނީ އަނިޔާއިން ރަނގަޅުވެ ހަޒާޑް މިހާރު ފަރިތަކުރަމުން އަންނަ ކަމަށާއި، އެކަމަކު އޭނާ އެއްކޮށް އަދި ފިޓް ނޫން ކަމަށެވެ. އެހެންކަމުން ހަޒާޑް ލައްވާވެސް ކުޅުވާނީ އޭނާ އެއްކޮށް ފިޓްވުމުން ކަމަށް ޒިދާން ވަނީ ބުނެފައެވެ.

ޗެމްޕިއަންސް ލީގުގައި ޝަޚްތަރާ ދެކޮޅަށް ރެއާލް ނުކުންނައިރު، އަންނަ ހޮނިހިރު ދުވަހު ސްޕެނިޝް ލީގުގައި ރެއާލުން ވާދަވެރި ބާސެލޯނާއާ ދެކޮޅަށް ނުކުންނާނެއެވެ. އެހެންކަމުން އެ މެޗުގައި ރާމޯސް އާއި ހަޒާޑަށްވެސް ކުޅުމުގެ ފުރުސަތު ދޭނެ ކަމަށް ރިޕޯޓުތައް ބުނެއެވެ.

ރެއާލުން މި ސީޒަނުގެ ޗެމްޕިއަންސް ލީގުގައި ކުޅޭ ފުރަތަމަ މެޗުގައި ޝަޚްތަރާ ދެކޮޅަށް ނުކުންނާނީ ބުދަ ދުވަހުގެރޭ ރާއްޖެ ގަޑިން 21:55 ގައެވެ.